出電梯後, 紅棍於總統套房既門前問道:「我地都無房卡, 點入去呀?」 

呀美微笑道:「由於呢間房比較特別, 有房卡都未必入到去。」 

「咁點呀, 唔通真係要奧巴馬先住得呀?!」發仔問。 

呀美搖搖頭, 道:「咁又唔係, 不過房門必須要用登記入住果個人既指模先開到。」 

「即係邊個呀?」泥頭問。 





「仲使講既, 呢個身份梗係得我先襯得起啦。」發仔將手指放左係門柄右面既指模探測器上。 

一盞紅燈亮起。 

Failed 

「屌, 邊撚度有可能係你。」泥頭砵開左發仔隻手, 隨即將自己既拇指放上去。 

Failed 





「俾你做總統就死得啦, 全民皆雞都似呀, 睇我啦!」紅棍又走埋過來試。 

「等等!」呀美緊張道。 

「咩事呢?!」紅棍隻手硬生生咁停左係空中。 

「如果連續三次都唔岩既話, 系統會自動封鎖全層, 之後仲會有保安過來捉我地家。」呀美解釋道。 

「咁得番一次機會喳喎。」泥頭道。 





「咩者, 唔俾我岩既。」紅棍不耐煩道, 然後伸手想按落去。 

我迅速扣住佢地手腕, 道:「唔合理, 你唔似係識搞入住手續既人。」 

紅棍諗左一諗, 對住大舊道: 「咁講即係你啦, 平時呢啲野都係你做既。」 

大舊語帶猶豫道:「照道理應該係, 但我唔知自己飲醉左酒之後, 仲會唔會理呢啲婆媽野。」 

「會唔會係呀恆?」呀美問。 

「無可能, 我出哂名怕煩。」我肯定咁答。 

「無計啦, 大舊唯有你試下家啦。」泥頭道。 

大舊將隻手慢慢伸向指模器, 平時淡定既佢呢個時候居然有啲手震。 





喀嚓。 

發仔一手就推開左度門。 

「超, 搞咁大壇龍鳳, 原來度門一直都無鎖。」

門一開, 率先映入眼簾既係一個270度既環迴海景。 


但同萬家燈火既維港夜景唔同, 係我地眼前既, 只係一片漆黑既深海。 

望住海上面翻來覆去既暗湧, 唔知點解,我有種不寒而慄既感覺。 

啪啪。 





呀美擊左兩下掌之後, 房間即時亮起柔和既燈光。 

「嘩……」 

房內既擺設極盡奢華, 有水晶雕造既茶几, 有白狐皮製既梳發, 就連放係吧檯上面既酒杯, 隻隻杯腳都鑲住一粒細小既鑽石。 

「好, 依家萬事具備, 只欠東宮。」發仔搓搓手向住呀美道。 

「等左呢刻好耐喇。」泥頭興奮到成隻落街散步既狗咁。 

面對住兩個如狼似虎既咸濕佬, 呀美退到我身旁, 道:「呀恆, 你真係要俾佢地咁做?!」 

望住呀美淚光盈盈既眼眸, 我潛伏住既大男人宇宙終於爆發, 於是道:「邊個夠膽搞呀美, 就即係同我過唔去!」 

佢地兩個窒左一窒, 對望左一眼之後道:「痴撚線既, 過唔去咪過唔去咯。」 





「紅棍, 大舊, 快啲來幫拖呀!」我見勸佢地唔掂,即時求救道。 

只見紅棍坐左係張按摩椅上面, 嘆住紅酒道:「我依家先感受到發仔平時既樂趣。」 

發仔道:「爽呀呢, 醒包花生過你, 乖乖地唔好插手呀。」 

「紅棍你個含家鏟……你地唔好亂來呀!」我氣急敗壞道。 

就係我同呀美俾佢地逼到埋墻角果陣, 房既另一邊突然傳來大舊焦急既叫聲。 

「你地快啲過來睇下!」 

泥頭躁狂道:「又點撚樣呀!想過下手癮都咁難?!」 





但我深知發仔既性格, 所以係泥頭句野都未講完既時候, 我己經擋左係Phoenix前面。 

一陣摧心裂肺既痛楚從胸部傳來。 

「咦?呀恆, 睇唔出你都好好肉地喎。」發仔道。 

「唔好撚玩啊!快啲同我入來!!」大舊暴喝道。 

「呢筆數有排同你計。」發仔講完「鼠」一聲就標左入去。