夾錢中左六合彩頭獎, 但keep飛果個唔見左...: (33)

「咩事咁撚巴閉呀!」我一行入睡房範圍, 就聽到泥頭大聲道。 

「你地快啲睇下。」大舊打開左個特大衣櫃。 

「仆街! 唔好同我講, 你特登叫我地入來就係為左睇呢幾件浴袍呀下」發仔生氣道:「你要沖涼咪自己沖先咯, 我仲有對波數未清呀!」 

「你擘大對眼睇清楚啲先啦。」大舊道。 

聽大舊咁講, 我同呀美都行近左啲去睇。 





原來係個櫃啲浴袍後面, 仲擺左一個綠色既保險箱。 

「車, 呢舊野間間酒店都有家啦。」發仔不屑道。 

「咪住, 你睇下保險箱中間既螢幕寫咩?」紅棍插道。 

發仔皺眉道:「痾…橋…牌…?」 

「屌你, 係Occupied 。」紅棍好介意個ed既發音:「 即係有野係箱入面呀! 矇撚!」 





「會唔會我地尋晚擺啲野入去呀?」我問道。 

「好有可能, 你地有無印象係咩來?」大舊問道。 

「斷估唔係花生掛。」發仔摸一摸褲袋道。 

「最衰個箱要密碼先開到啦。」大舊苦惱道。 

「密碼呢味野求其撞下就得啦。」發仔道。 





「就知你唔識英文家喇。」紅棍指住保險箱上面既一張說明書道:「人地大大隻字寫住只允許入錯一次密碼家喳。」 

「車, 睇死佢又係無鎖家啦。」 

當發仔隻手掂到個箱既時候, 箱既表面突然爆出兩下電光。 

「屌! 電撚死我呀!」發仔痛苦道。 

「抵撚死! 呀美, 下次妳都戴個電Bra者。」我建議道。 

「好衰家。」呀美尷尬咁擰轉個身。 

「咁睇來我地無人知密碼係咩啦。」大舊問道。 

「鬼咩, 我連個密碼有幾多個位都唔知呀。」紅棍垂頭喪氣道。 





「呢樣野要知反而唔難。」大舊一講完, 就係個數字盤上按左幾下。

1234567 

螢光幕隨即顯示: Incorrect 

「大舊你唔係低能到以為咁就可以撞岩啊?」發仔沒好氣道。 

「如果係你set既話依家可能己經中左喇, 但係我咁做只係想試下呢部機最多可以打到幾多個number者。」大舊解釋道。 

「即係話依家個密碼可能有成七個位啦。」紅棍道。 

「嘩! 簡單啲講, 我地要係0至9呢組數字, 抽7個number任意組合, 換言之即係有……屌! 中學一定有教過家, 條算式好似係咩10 P 7 定係10 C 7咁家。」泥頭道。 





「C7?! 我知呀, 有傳佢可能返曼聯喎。」發仔道。 

「邊有可能呀, 人地係皇馬踢得好地地。」我回應道。 

紅棍無俾我地叉開, 繼續潑冷水道:「泥頭, 俾你諗到條算式都無用, 唔通你攞手指來計咩? 就算真係俾你計到喇, 咁又有咩意思, 我地依家得番一次機會喳。」 

「唔好嘈住, 俾啲時間我, 我一定計到家。」泥頭仲係唔死心。 

「計mud春呀, 我唔識計數都知, 要係咁多個組合撞岩一組number, 分分鐘難過中六合彩呀。」紅棍道。 

六合彩?! 呢個term突然令我靈光一閃。 

「我知道個密碼係咩啦!」我興奮到大叫左出來。