「你地仲記唔記得, 我地係中港城將發仔倒吊果陣, 佢身上面跌左啲咩出來啊?」我問道。 

「喂! 啲咁瘀既野可唔可以唔好當住靚女既面前講出來呀。」發仔不滿道。 

「咪十幾包花生同埋幾個condom咁咯, 無咩特別啊。」紅棍道。 

「除左呢啲之外, 仲有一樣野家。」我提點道。 

「果張寫左number既白紙!」大舊第一個get到我講咩。 



「係喎!」其他人如夢初醒。 

「哈,肯定係我尋晚預料到你班牟利一定會唔記得, 所一早寫低左係張紙度啦! 呢啲咪叫先見之明咯!」發仔自豪道。 

「咪撚馬後炮喇, 快啲攞出來啦。」泥頭催促道。 

「唔好睇我平時嘻嘻哈哈咁, 重要關頭佢地成班都要靠哂我家。」發仔對住呀美道。 

「咁都俾佢威番次。」紅棍酸溜溜道。 



但當發仔伸手入褲袋摷左兩摷既時候, 佢面上既笑容突然彊硬左起來。 

「你唔見左我打撚柒你。」泥頭恐嚇道。 

「咁又唔會唔見, 之但係…」發仔尷尷尬尬咁攞左舊類似雲吞咁既野出來。 

「咩來家?! 痴粒粒咁既。」紅棍用兩隻手指張舊野攤開。 

只見紙上既筆跡經己模糊一片, 難以辨認。 



發仔神色忸怩道:「果時俾呀鳳嚇到流哂鼻水, 我見個袋有張紙, 咪隨手攞左來呻兩野咯…」 

「你係咪戇鳩家!」紅棍激到成個彈起。 

「喂, 果時又係你叫我抺番啲口水鼻涕既!」發仔賴得就賴。 

「我忍無可忌啦!」泥頭爆發道。 

「唔使咁慶喎。」我輕鬆道:「其實頭先紅棍提到六合彩果陣, 我己經知道密碼係咩野, 純粹只係想攞發仔張紙來確認下者。」 

「唔好鳩嗡當秘笈啦, 關六合彩咩事呀。」泥頭捏到個拳頭「咯咯」聲 

「一定唔會係我地中獎果六個號碼, 個密碼得七個位…」紅棍道。 

「雖不中, 亦不遠矣。」我故作高深道。 



「快撚啲講啦! 我癲起上來自己都驚呀!」泥頭隻眼如要噴出火來。

「個密碼的而且確係發仔張紙上面果組number。」我不徐不疾道:「但呢set number其實係有意思既。」 


「有咩意思?!」呀美都忍唔住問。 

「就係買六合彩大包圍既金額!」 

全屋頓時dead air左幾秒。 

「即係幾多啊?」發仔問。 

「正確既數目, 係6991908」我答。 



「講起又好似係喎, 我鄉下個叔父都係用成差唔多七百萬先買到家。」紅棍道。 

「而發仔張紙寫既又好似真係呢組number…」泥頭道。 

「6991908, 七個位, 岩岩好…」大舊道。 

「咁仲唔快啲試下。」呀美都好期待。 

「嗱, 最後唔得既話唔好怪我呀。」我事先聲明道。 

「果時你死都死左咯, 仲有咩驚者。」泥頭道。 

「成班仆街…」我駡道。 

始終得番一次機會, 我入密碼果陣非常之小心, 唯恐打錯任何一個數字。 



輸入密碼之後, 我地全都聚精薈神咁睇實個螢光幕。 

CORRECT 

「好野!!」我地好似踢波射入龍門咁開心。 

「呀恆你係得既!」 

「好撚勁!」 

「掂呀!」 

係一片讚嘆聲之中, 我聽到發仔細細聲講:「呀美你睇下,佢連呢啲野都記到, 真係毒撚到呢…」 



「發仔, 個箱由你來開!」我即時道。 

發仔笑左笑, 道:「你估我唔知你籠野呀, 個箱仲有電既話我咪仆街。」 

「有無電你都係仆街來家啦。」我生氣道。 

「你估入面裝咩家喇?」泥頭突然問。 

我地將注意力放番係個箱度。 

「會唔會好似Narnia套戲咁, 一打開就去左另一個世界呀啦。」發仔猜測道。 

「唔會鳩到咁盡掛…」紅棍道。 

「屌, 婆婆媽媽」大舊一手就打開左個箱。 

如果真係Narnia, 我地反而無咁驚訝… 

「孱仔??!!!」