東望洋跑道上密雲滿佈, 黯淡無星。 

寫住「澳門格蘭披治大賽車」既banner被猛烈既海風吹到上下搖擺, 獵獵有聲。 

時值淩晨, 賽車場周圍毫無半點人聲, 氣氛詭異到極點。 

「好一個月黑風高殺人夜。」紅棍率先打破沉默。 

「明明係大熱天時, 點解我成身都覺得好寒咁既。」發仔道。. 





「你好可能係感應到呢度既亡魂…」泥頭陰聲細氣道。 

「你又係度嗡mud春呀。」發仔道。 

「你唔知咩, 聽講係親呢度搞既賽事, 成日都會死人家。」泥頭道:「依家咁岩又係陰氣最盛既子時…」 

「唔好撚講得唔得呀,你明知我最驚呢味野家!」發仔打左個冷震道。 

「屌, 佢地幾時返來家!」紅棍都俾泥頭講到坐立不安。 





「點撚知者, 呀Pat話去準備車喎, 不過去左咁耐, 睇怕都就快返喇掛。」我回答道。 

大舊將失血到半昏迷既孱仔放左係地下, 然後問道。「鳩恆, 呢場仗你有無把握家。」 

我信心爆棚道:「你試過我手車家, 第二啲野我唔敢包, 講到鏈車我從來未淆過。」 

「如果係電單車呢?」發仔指住遠處問道。

前方突然有兩道強光向我地直射過來。 






緊接住就係有如野獸刨哮既引擎聲。 

只見呀Pat係一群大隻佬既簇擁之下出現係兩部電單車既前面。 

「嘩Pat Pat 豬, 呢兩盞車頭燈同妳果對有得揮喎。」發仔道。 

「放低啲槍, 佢讚我身材好者。」呀Pat及時制止左啲手下。 

「喂! 我無話過要同妳鏈電單車喎。」我激動道。 

呀Pat舉起左一張紙, 道:「頭先你簽既呢份合同上面, 白紙黑字寫到明邊個架車率先衝過終點, 就有權叫輸既一方俾兩億自己。不過成份野從來都無話過唔俾用電單車喎。」 

我不服道:「屌, 妳出古惑既, 我唔玩啦!」 

「得, 違約金都係兩億,。」呀Pat 道。 





「咁…咁…」我急到講唔出野。 

「姑且俾兩分鐘時間你地考慮下」呀Pat 氣定神閑道。 

「鳩恆, 呢鋪玩大左喇。」紅棍係我地圍埋左一齊之後道。 

「你唔好同我講你唔識揸電單車呀下。」泥頭道。 

「咁又唔係, 但係我淨係喺大陸揸過綿羊仔喳。」我尷尷尬尬道。 

「咁就夠啦。」大舊雙手搭住我膊頭, 神色堅定道:「其實你係大陸揸過幾年車都仲未死, 實力己經超越左好多世界一級既車手, 俾心機, 我地信你。」 

我深受感動道:「發仔講得岩, 你隻猫真係令你講野好無說服力, 不過我會加油家啦!」 





「點呀, 通完櫃未呀你地。」呀Pat催促道。 

我霸氣地喝出一句老土對白:「屌! 我要妳車尾燈都見唔到!!」

我昂首闊步咁行在去部電單車隔離。 


純黑色既車身上面寫住左YZF-R6既型號, 而車既牌字係YAMAHA。 

講真, 我對電單車真係無咩硏究。 

正確來講, 我都係依家先知YAHAMA除左做吉他之外仲有生產電單車。 

正當我好有型咁騎上架車之際, 背後突然傳來「劈啷 , 劈啷」既聲音。 

「發仔你做mud撚野呀!」我喝道。 





「咁又係你話要條八婆睇唔到你既車尾燈既, 我費事你出醜咪幫你打爛哂佢地先咯。」發仔攞住舊石頭道。 

「你係咪想激撚死我呀!」我嬲到七孔生煙。 

「唔好咁慶住, 鏈車點可以唔聽音樂呢。」發仔攞左部I pod出來:「我幫你set好哂個playlist家啦, 好岩你聽家。」 

「你個死仔又諗得幾周到喎。」我戴上耳筒。 

「要威又點可以唔戴頭盔呢。」泥頭將個銀色既頭盔笠左落我個頭度。 

「一路順風。」大舊拍一拍我背脊。 

「如果你呢鋪死撚左既話, 頭七見啦。」紅棍笑道。 





聽到呢度, 我即刻拉落左個護眼罩, 費事俾佢地見到我眼濕濕。 

我望向隔離, 呀Pat早就己經整裝待發。 

而佢班死仔見賽事就來開始, 亦都退埋左一邊。 

就係呢個時候, 呀美竟然出現左兩部車中間, 仲要換左一身賽車女郎既裝束。 

只見佢舉起一枝旗嗌道:「Ready……」 

「嘩, 呀美扯旗喎。」紅棍道。 

「鳩恆! 經過呀美既時候一定順手揸佢個波呀。」泥頭道。 

「記得聽歌呀!」發仔嗌道。 

「GO!」