[真人真事][校園][純愛]《婚宴上的重遇》: 第五十三章

之後我著嗰對新波砵
果然好啱腳
完全冇話買大左或者買細左
若凝佢真係好細心,
亦都真係好了解我
竟然會俾佢知道
如果一早講定話買俾我,
我一定唔會要
反而我好似唔係好了解佢
雖然成日都陪住佢,


可能係個心多啦
咁樣跟住嗰幾日就踢班際啦
大家以前玩過班際都知,
班際咁多隊
如果要輪住比賽,
最快都要兩三個禮拜先玩完
我地學校都唔例外
話說我地嗰年中一至中六有十六隊參加
中四,中五各五隊,中六,中三,中二各兩隊,
計埋龍門五打五


行淘汰制
上下半場就各踢十五分鐘,
如果都仲係打和,
之後就直接十二碼
咁話晒我地係年紀上面都有優勢,
我就唔驚一早就出局
不過中五有一隊好勁
呀成,丁仔,呀余佢地三個嗰隊都唔差
對手應該都係得呢兩隊
最好彩嘅係,


抽完籤之後,
呀成,丁仔,呀余佢地嗰隊同好勁嗰隊中五係同一條線
我嗰隊就喺另一條線
亦即係話我地只會喺決賽先會同佢地碰頭
喺決賽之前,
我都係同嗰啲傻仔踢
話晒我地成班都係叫做足球隊
雖然學界唔叻啫
不過喺學校夠用啦
再加上抽到支籤咁好,
應該唔會入唔到決賽掛
當然啦,
入到決賽係唔夠
我梗係想贏埋啦
我諗冇一個人只係會滿足拎第二


如果你覺得係有機會贏嘅話
若凝:「一陣放學就踢第一場,
唔好輸俾班中四
唔係就笑到你面黃 」
我:「唔好講笑啦若凝姐
點會輸 」
若凝:「好有信心喎
足球隊果然係足球隊 」
其實若凝係唔知我地學校足球隊係唔勁
出到去都拎唔到獎
不過我費事同佢坦白啦
難得佢以為足球隊係好野
咁就繼續等佢幻想落去
我:「坐定定睇表演啦 」



咁講真,
中六對中四
仲要中六嗰隊大部分都係足球隊
其實就真係冇得踢
我就唔會講太多足球嘅場面
驚你地覺得悶
同埋實際上都冇乜好講
總之我地第一場就贏左啦,
仲要大勝4比0
小弟都有入波
我仲好記得,
入完之後望一望觀眾席嗰邊
見到若凝佢好開心
因為比賽前我特登望定佢企喺邊度
方便自己陣間一搵就搵到佢,


喺嗰陣我就尷尬
又想望佢,
但又唔想俾佢知我望佢
所以去到最後都係偷偷雞咁樣望
唔知其他人入波嗰陣,
若凝有冇咁興奮呢
你知啦,
毒男就係鍾意幻想
少少就可以諗好多野出嚟
之後我地隊入波,
第一下我都係望住若凝
睇下佢個反應係點,
唔知係咪我自己諗多左,
其他人入波嗰陣佢好似冇咁興奮
唯獨是我入嗰球,


佢好似特別開心咁樣
呢啲野現實唔敢同人講
驚俾人話我係痴線同埋妄想症
雖然我唔否認
俾我ff多一陣啦
踢完波換完衫出嚟
若凝:「幾犀利喎 」
我:「梗係啦使乜講 」
若凝:「全靠我對波鞋咋 」
我:「係喇至叻係你呀 」
若凝:「梗係啦 」
我:「啲人咁渣
唔著鞋都贏啦 」
若凝:「好囂張喎 」
我:「係架,
所以唔好俾人聽到 」
若凝:「又要驚又要講
你咁叻請你飲喇 」
若凝之後俾左支茶字典我
我:「咩事咁好人 」
若凝:「冇呀,
見你咁叻仔入左波
又唔知有冇下次喎
咪請你飲囉 」
我:「硬係要踩下人先安樂
不過多謝晒 」
若凝:「幾時會踢八強 」
我:「今個星期五,
如果贏左嘅話星期一就踢四強 」
若凝:「加油呀 」
我:「輕鬆啦 」
或者若凝唔會知道,
其實我無論點樣踢得好,
入左幾多球波,
拎左幾多個助攻都好
全部野都比唔上若凝頭先嗰句「幾犀利喎」
有邊個會唔想自己女神讚自己架,
我可以答你,
冇一個會唔想
當你得到嗰下讚賞,
真係會好似擁有全天下咁樣
沖昏晒個頭腦.