《香港革命戰》(上): [16-計劃之外] PART 2
我同阿風依然企喺手術室出面，黑黑綠綠既走廊中間...
阿月話要喺綽姿進行換腦手術之前，單獨同佢傾D野先。
所以阿月就帶左綽姿入房，我同阿風就喺呢道等...
「阿日...你覺得真係行得通?」阿風行到我身邊問。
『你指邊樣先?』其實我覺得樣樣都掂...
「我指既係綽姿...阿月既計劃，我不嬲都好放心!之但係...綽姿佢...」阿風欲言又止...
你地真係奇怪...
其實最唔放心既應該係阿月...
但你地就硬係信晒佢既決定...
唔好話救左阿月返黎呢三年，早喺之前，我已經托地獄裏面既行者留意佢既情況。
初初只係想搵人暗中保護佢，但後來發現阿月不時都會做一D危險既行動!
又不顧身份走去幫D下等人...
有陣時我都會懷疑，係唔係因為阿月咁魯莽，所以先會俾國安局同李軍佢地發現佢係我地既人!
如果唔係，咁天衣無縫既計劃又點會有人起疑心?
『唔知喎...阿月話得咪得囉...』你地咁聽阿月話嘛，咁就唔好質疑咁多啦。
「係姐...之但係...綽姿岩岩先得知佢家姐既死訊...」阿風繼續欲言又止...
『唔知喎...阿月話得咪得囉...』我邊知阿月咁多...
「唔係喎!阿月都無話過得架喎!」阿風開始緊張起黎...
『唔知喎...無咩?』我無留意咁多...
「喂!你唔好咩都唔知啦!你緊唔緊綽姿架?」阿風好緊張咁追問。
『我梗係緊張綽姿啦!不過係你地話無問題架嘛!』話我唔緊張綽姿?
我都不知幾咁緊張綽姿!
我有責任照顧綽姿...
我有責任保護綽姿!
我應承過綽瑩唔可以俾綽姿冒險!
但照而家咁睇，綽姿黎梗既任務，會俾之前計劃既更加危險...
「咁你著緊D得唔得丫?」阿風用上責怪既語氣同我講。
『我唔係唔想著緊，但我可以點呢?好似你地頭先咁講，我地已經去到大直路，究竟前面係終點?定係山崖我地都唔知...咁我地仲可以點?』我真係諗唔到辦法喇!
阿風無聲出，只係眼定定望住我...
『我地而家...只可以...做好自己要做既事...』我望住喺空氣中飄下飄下既綠色粒子...
做好自己要做既事...
「阿日!你要對自己有信心D!」老豆企係我面前，踩住我把高振動EVE粒子刀...
『我對自己已經好有信心架喇!』我趴左喺地下道，忍住淚咆哮...
「咁點解你會趴左喺地下?」老豆用佢手上既高振動EVE粒子刀指住我。
『我...我根本就唔夠你打!』我唔敢正視老豆...
「我既兒子...」老豆喺地上拎起左我把高振動EVE粒子刀，「你既劍術不下於智海...」
老豆拎住我把高振動EVE粒子刀揮左幾下...
“嗡...嗡...”刀身發出嗡嗡聲...
「只係你缺乏左一D好重要既野...」老豆將我把刀飛到我面前!
“颼!”高振動EVE粒子刀插到地上!
「你從來都唔相信你自己做得到...你缺乏一顆信心去做好自己要做既事...」老豆再次用佢手上既高振動EVE粒子刀指住我。
信心?
做好自己要做既事?
「拎起你把刀!再黎擊倒我!」
信心...
做好自己要做既事...
信心...
做好自己要做既事...
「哥?你有無聽到丫?可以喇~」阿月既聲聲將我由回憶帶返黎現實...
『可...可以咩?』我真係無聽到阿月講D乜...
應該話就連阿月同綽姿出返黎都唔知...
「我話~綽姿可以接受換腦手術喇!一D都唔專心...」阿月谷起面...
『真係可以?』我望一望綽姿...
「嗯~」綽姿帶住微笑回答。
綽姿竟然會...笑?
咁多年黎，我都未見過綽姿笑...
呢個陳月...究然對綽姿做過D乜黎?
企係手術室出面既我同阿風，望住壓縮空氣幕牆入面既阿月同綽姿。
綽姿已經一絲不掛，準備好走入注滿LCL既黑色管形手術床裏面。
當綽姿瞓落手術床裏面之後，阿月亦行到綽姿身邊...
阿月雙手放到手術床裏面，所謂既催眠儀式開始進行...
「究夠阿月係點樣做到?」阿風同我一齊望住阿月，問左我心裏既問題。
你真係考起我...
阿月從來都無同我解釋過...
『唔知道...我諗我知既比你更少...』我望住阿月回答阿風既疑問。
開始越黎越多EVE粒子飛到阿月身邊...
究夠點可以做到?
點解EVE粒子會俾阿月吸引到?
係阿月向EVE提出有關要求?
無可能...
EVE無可能會接受呢種深度要求...
「連你都唔知?你係佢阿哥黎架喎!」阿風繼續向我提出質問。
『你夠係瘋狂科學家啦~你夠乜都研究唔到啦!』無數既EVE粒子開始喺阿月身邊打轉。
「咁都無計架!每次幫阿月做檢查，EVE粒子都會令儀器Error。」阿風攤開雙手。
講到呢道就真係覺得怪怪地...
平時就算係點都好，EVE粒子唔會無啦啦主動干涉我地既工作...
我地最多都係搞唔掂三者之間既平衡，或者唔得到EVE既准許...
但每次想檢查阿月既時候，EVE粒子都會主動埋黎干擾我地...
『你估會唔會喺阿月搞鬼丫喇?』圍住阿月身邊轉動既EVE粒子越黎越光...
「你咁講則係咩意思?」阿風用上一對猶疑既眼神望住我。
『你估係唔係阿月有心唔俾我地知佢既秘密?』EVE粒子越黎越光，綠光照亮整間手術室。
「點會丫?規條裏面講明我地係唔可以講大話!」阿風好天真咁反對我既質疑。
雖然我地一直都係俾規條約束下生活...
『但可以隱瞞...』EVE粒子開始慢慢散開。
規條中並無話唔可以隱瞞...
就好似嗰兩個人咁...
「但點解要咁做?」阿風仲係毫無頭緒。
『唔知...可能有D野唔想俾我地知...始終阿月係喺地獄長大...』EVE粒子既光芒開始減弱...
「你意思係...阿月想背叛我地?!」阿風反應過敏喇...
阿月絕對唔會背叛我地，呢點我可以好肯定...
『唔係~你諗多左喇...只係...我覺得阿月知道D我地唔知道既野...但因為佢覺得如果俾我地知道既話，會阻礙到我地計劃既進展...所以佢情願隱瞞...』管形手術床開始關上閘門。
「咁複習...我唔明...」阿風摸摸頭...
『我地唔需要明...只要根住做就好...因為我地再無時間去諗咁多...』阿月離開手術室...
時間緊迫到連我自己都感受得到...
換腦手術即將進行...
阿月唔會出賣我地...我深信...
以佢對李飛揚既愛黎睇，佢一定會盡一切所能進行我地既計劃。
呢個喺佢地唯一既出路...
亦係我地SPIRIT既唯一出路...
“噹”阿月由手術室行返出黎。
「你地講梗乜丫~」阿月行到我身邊。
『無~講梗妳點樣可以做到催眠~』我地唔可以講大話，但可以隱瞞。
「因為我同EVE親密囉~」隱瞞，亦都係阿月經常做既事。
『你地話今次既手術會成功嘛?』我繼續專注手術室裏面既情況。
雖然只係睇到黑色既管形手術床喺道轉下轉下，其他乜都睇唔到，但我都係好緊張咁望住入面...
阿風開出一個顯示板:「照數據分析...容器既狀態好穩定。綽姿既狀況都好穩定。一切都好正常，無需要擔心。」
有阿風睇住，我可以好放心。
之但係...
仲有一件事令我好困惑...
『阿月...妳係點樣可以令綽姿笑?』呢樣令我好迷茫...
一直以來，我都覺得綽姿係一個唔識笑既人...
但頭先...
當阿月單獨見完綽姿之後，綽姿竟然會對我笑...
「係女仔之間既秘密~」阿月向我打左個眼色...
秘咩密呀?
呢個時候仲玩玩下...
「總之...你地D男人唔知咁多架喇~」講完之後，阿月捱左埋個壓縮空氣幕牆道。
又喺道故弄玄虛...
有陣時，我真係會覺得“放心俾阿月去做”呢個觀念係錯...
生死關頭都無時認真...
「嗱嗱嗱~我唔係唔認真架~只係層次唔同~你覺得嚴重，係因為唔喺你掌握之內。但對我黎講，完全喺我股掌之中~所以我可以好輕鬆~」阿月向我伸出食指，搖下搖下...
又係讀心...
妳話妳無用EVE讀取我心靈都無人信!
「總之綽姿既狀況比你想像中好好多~你就放心好喇~」阿月又向我打左個眼色...
放心...
如果我可以好似妳咁，盡在股掌之中我就可以放心...
始終，綽姿對我黎講好重要，我唔可以掉以輕心...
阿風一直留意住顯示器，我同阿月就一路望住手術室裏面...
所謂既換腦手術，則係將兩個人既腦交換。
係真真正正將兩個人既腦切出黎交換。
而因為手術期間所使用既LILITH數量及純度極高...
會嚴重影響腦部細胞運作。
所以，一個人一生只可以換一次。
換言之換過一次之後，就唔可以再換返返黎。
另外一點更加需要注意既係，同容器本身既原核DNA要極度吻合。
最少要有99%近似。
唔係既話...好簡單－排斥。
一般情況，換腦手術只需要半個鐘就完成。
「係喇...阿日，係時後要同傾下有關你注射精神液既事...」阿風一邊留意住顯示板，一邊問。
『想傾D乜?』今次有排煩...
「你唔可以再注射精神液。」阿風毫無保留咁講出口。
『唔得，我仲好需要精神液既幫助!』到左呢D時候，唔靠精神液既話，點同李軍仲有國安局佢地抗衡?
「仲未知死?話俾我知你尋日暈倒既情況。」阿風嚴肅咁望住我。
『咪暈左囉。』穩瞞...
「阿月，妳講!」阿風將箭頭指向阿月。
「哥哥佢尋日揸揸下車突然露出好痛苦既表情，雙手撳住個頭。無幾耐就不醒人事...喺哥哥不醒人事既期間，我留意到佢面上都仲係一直表現出極度痛苦既表情，雙眼不時喺眼皮下面轉動...全身肌肉不時抽搐。我判定哥哥係回憶梗...或者係喺夢中。」阿月答得非常詳盡...
我冷眼望住阿月...
「不可作假見證~」阿月仲要俾個V字手勢我...
平時又唔見妳咁坦白?!
「精神液已經入侵到你思緒既深層喇!」阿風嚴厲咁話我。
『邊有你講得咁誇張...』我試圖淡化一切...
「邊有咁誇?我講少左喇!你唔係唔知架!精神液對腦部精經有幾大影響你唔係唔知?」阿風對我連珠大發...
我都話呢次麻煩架啦...
喺呢D情況，我都係選擇沉默好D...
「唔出聲就得架喇?唔出聲就無事呀?」阿風仲未肯收手...
我望住阿月...
阿月...幫幫手講幾句好話啦...
阿月望一望我，笑笑口扮晒傻咁擰個頭去另一邊...
哎呀!妳個衰女!
枉我當初拼左條命都要去地獄救妳返黎!
而家要妳幫下口都擰咩面?!
「精神液已經入侵到你既深層思緒，你已經控制唔到幾時發作，你已經預測唔到幾時發作，你已開始出現幻覺!再係咁落去，你會迷失喺夢境裏面!」阿風繼續喋喋不休咁追住我。
『我當然知道而且既情況好危險，但無左精神液既幫助，萬一喺地獄執行任務既時候遇上李軍或者國安局，我死硬架...』我無辦法唔講出個真相出黎!
佢地都唔係人類黎...
如果就咁要我用血肉之軀同佢地硬拼，根本就等於自殺...
「我明...之不過...」阿風有D弱化...
『唔好再之不過喇...總之你就繼續幫我整精神液...照現時情況，審判之日好快來臨，我可以支持落去既!』唔可以再俾阿風諗落去。
『OK~你話點就點啦~不過...LILITH又係另一個難題...』阿風搖搖頭，再次留意返綽姿既情況。
的確，LILITH係另一個難題...
要製造精神液亦都需要用上大量既LILITH...
我地之前既計算係足夠完成計劃。
但而家...
我已經唔知道會唔會延遲...
甚至能唔能夠啟動審判程序...
或者而家最清楚整個狀況既...就只有阿月...
阿風繼續留意顯示器，我同阿月繼續留意手術室入面既情況。
黑色既管形手術床開始慢慢停落黎...
「手術完成喇，非常之順利。」阿風閂左個顯示器之後，行去手術室門。
我同阿月跟住阿風行入手術室。
行到手術床側邊，管形手術床既閘門開始打開。
我望到LCL裏面瞓左一個大美人...
長長既秀髮喺LCL裏面飄下飄下...
綽姿既容器...
而家呢個女仔就係綽姿...
LCL開始喺空氣中飄散...
整個少女既裸體就展露喺空氣中...
我由手術床抱起左綽姿，殘留喺綽姿身上既LILITH喺空氣中化成藍色粒子...飄散...
我將綽姿放落擔架車上...
『照原定計劃進行。』我望住瞓喺擔架車上既綽姿...好陌生...
縱使我已經親眼見過好多次換腦手術，但我都係好難接受到呢種變化...
一個你熟悉既面孔，變成另一個你陌生既面孔...
「咁嗰個...」我無等阿月講完...
『我會親自處理。』我一定要親自處理。
阿月點一點頭後，就同阿風推左綽姿出手術室。
所謂原定計劃，就係由阿月幫綽姿整理好衣物，送到去阿賢手中。
再由阿賢派出一隊行者同解放軍佢地接頭。
交贖金放肉參呢D野已經做到熟晒，解放軍一定唔會亂黎。
所有野都唔係偶然...
一切都係長久既安排...
地獄裏面既惡魔只係以為我地缺乏糧食，需要物資...
但佢地點都估唔到，呢D只係我地刻意安排既煙幕...
人就係咁...
總會俾眼前既假像呃到...
我地太相信自己既雙眼...
卻忽略左雙眼係最容易受騙...
管形手術床轉左半個圈，閘門亦開始打開。
綽姿既肉身浸透喺LCL裏面...
熟悉既外表...但已經唔係同一個人...
呢種心情真係好矛盾...
雖然已經為佢植入虛構記憶，但佢個腦始終都唔係綽姿...
佢係地獄裏面既上等人...
點都好，以前既記憶佢唔會再擁有。
佢只知道自己叫做梁綽姿，生於境外，有爺爺，有父母...
地獄既惡魔會為佢定一個身份...下等人既身份...
而工作我都為佢安排好...
確保妳可以喺地獄過新生...王嘉雯小姐...
幫綽姿既肉身整理好衣物之後，我抱住佢離開手術室。
抱住綽姿既肉身先知，原來佢同綽瑩一樣都係咁輕...
綽姿真係好似綽瑩...
綽瑩既肉身雖然仲喺屯門領域，但我從來都唔會去搵佢。
始終佢都係一樣，已經成為另一個人...
本來，我應該都要將佢既肉身送出去境外...
「我先唔會俾我既肉身返去背叛我地既人身邊!」我好記得綽瑩有咁樣同我講過...
綽瑩好討厭佢既家人...
就好似我討厭我老豆一樣!
佢地都係背叛者!
但係...
綽瑩既家人有D唔同...
我又唔可以話佢地係全心背叛...
佢地只係忠於我老豆...
梁氏家族一直都係我老豆既親兵...
一直都係直接為我老豆辦事。
毫無疑問，佢地真係非常能幹!
任何任務都可以處理得乾乾淨淨...
特別喺嗰個老鬼...
老鬼知道既野好似都好多...
而老豆佢都好相信呢個老鬼既說話...
每次設計計劃，老豆都一定會同老鬼個別商量...
有陣時，有D秘密任務仲要係得老鬼一個知...
老鬼真係一個好重要既人物...
所以當佢地話要離開SPIRIT，去境外生活，我就決定要保留老鬼既記憶...
雖然唔係好岩規矩，但...無辦法...
情況唔喺我手中...
我無辦法唔咁做...
我知道老鬼只會忠於老豆...
但必要時都要博一博...
抱住綽姿既肉身穿過折疊之門...
行過黃金海岸...
放到Aston Martin既座位上...
我輕輕整理一下綽姿既兩鬢...
仔細望一望...
終於都要走到黎呢一步...
“吼”...
如果要由呢邊過去境外既話，就要兜一個大圈。
無辦法...
我唔可以借元朗領域嗰邊既折疊之門黎用...
就算係阿賢佢地運送肉參都唔可以...
一來元朗領域唔會肯咁樣幫我地...
二來我地都唔想俾佢地知我地做梗D乜!
事實上，自我地分左家之後，就再無同元朗領域或者天水圉領域報告我地計劃既進度。
所以要兜路都無辦法...
只可以自己小心D...
“颼...”
每次經過小欖，我都會好奇問一問...
究竟你而家喺道做梗乜?
被流放既你係唔係已經死左心?
無能為力既你係唔係已經放棄一切?
係唔係只可以睇住我地點死?
「你會自取滅亡。」我唔會忘記你被壓走之時，嗰塊自以為事既臭嘴臉!
話我會自取滅亡?
我睇唔到我會點自取滅亡法!
你呢個傲慢既人，只係識得自以為事!
而家就好好地困喺呢個乜都無既山頭上面，一直受折磨...直到永遠!
*叮*「系統已連接，現在正回復離線前的設定...安全系統已啟動...」
已經走到入地獄...
又要開始提高警覺...
無阿月喺身邊，無任何支援，萬一遇上解放軍或者國安局就麻煩...
當然，解放軍就應該唔會遇上。
因為佢地而家應該忙於為接收肉參作準備...
但國安局...
佢地對被釋放既人都存有疑心...
唔係咁易呃到佢地...
究竟封閉綽姿既記憶係好事定壞事?
會唔會令國安局更加起疑呢?
就算真係起疑，國安局都唔可以無視上等人既身份...希望真係咁...
有陣時真係覺得，做上等人真係唔錯。
所有人都唔敢去質疑你，去管制你。
你鍾意點就點...
要人生就生，要人死就死...
世界都喺你手中，仲需要顧慮D乜?
難怪有咁多人都咁腐敗。
呢個鐘數...
仲算係奴隸返工既時間...
每一條高速公路都好多車...
阿月無幫我改寫自動導航系統，所以我要更加集中精神...
無改寫系統既原因，係因為要留返黎等等幫行者佢地運送綽姿...
如果短時間內修改兩次或長時間控制路面情況，會令MINDER起懷心...
所以而家就要靠我自己。
喺一架又一架巨型貨車中穿梭...
喺一架又一架三層巴士中遊走...
路上並無特別既車輛...
無人跟蹤梗我...
無唔妥...
睇黎一切都好正常...
要一直都正常!
*叮*「注意，系統將會offline。期間將不能再使用任何程式，請小姐小心。」
終於離開左MINDER既管轄範圍，可以放鬆返少少...
喺呢條通往境外既舊公路上面都比較寧靜。
不過今日既天氣總係灰灰沉沉...
好似快要落雨...
微弱既陽光透射到車箱內，綽姿既軀體上...
好安詳...
呢個上等人好似係叫做...嘉雯...
妳或者會以為只係咁唔好彩被我地選中...
事實上我地已經搵左好耐...
要喺呢個世上，搵到另一個人與自己原核DNA相近既其實好難。
仲要咁岩係上等人既話就難上加難。
我地追蹤左妳好耐，監視左妳好耐...
一切都係為左呢一刻...
所以如果妳話妳真係咁唔好彩既話，我只可以話一切都係天意。
但係唔係真係咁唔好彩?
未必...
我會認為妳係好彩嗰一個。
因為...
喺審判之日來臨之前可以得到救贖、解放...
“颼”
衝過紅色小巴之後，已經見到一座一座矮小既白色建築物...
好快就到境外...
其實整條公路都好好跑，我覺得好跑過青山公路。
而且四周既景色亦非常自然...
就連半點嘈雜聲都無...
鳥語花香，世外桃源。
境外...
本來係一個流放逆行者既地方...
你地真係好好野...
竟然可以靠自己，一手一腳親手將呢個地方變成一個世外桃源。
我將Aston Martin駛入細小既圓形交匯處後...
“依”...
終於都黎到...逆行者既聚居地－境外...