一部又一部纖幼既機械身軀,正一步一步向住火海一片既廢墟進迫。

機械既身軀顯得相當冰冷...

完全無血性...

完全無感情...

纖幼既機械腳踩過殘舊既地面...





踩爛地上既骷嘍頭骨...

佢地既所到之處並無任何生命跡象...

頹垣敗瓦之中,就只係得風煙...

呢種環境...係戰爭?

邊個發動既戰爭?





又係為左乜野而發動戰爭?

機械人軍隊繼續喺大街上行軍...

“轟轟轟轟轟轟”腳踏聲響片天際...

究竟呢班機械人係由邊道黎?

係天上派黎既使者?





定係來自地獄既惡鬼?

佢地係為邊個而戰?

當我仲喺道打量梗呢班機械兵團既來歷之時,佢地同時間擰過頭過黎...

一個又一個倒三角形面罩一至咁望過黎...

望住我...

眼前既千軍萬馬開始變成灰色...

慢慢分裂...粉碎...飄散...

當我再次睜開雙眼既時候,我望到藍色既天空...白色既雲朵...





當然我唔係喺結界以外...

望住又纖幼又冰冷既機械手...

我係喺控制艙之內...

尋日進行左一整日特訓,估唔到可以瞓埋喺控制艙入面...

我係唔係練得太攰?

或者係...

要控制防禦者RU真係要花好大量既精神...





不過無問題既...

我仲頂得住...

休息左一晚,精神都回復過黎。

而且我已經完全適應與防禦者RU之間既連接。

而家呢個機械身軀,就好似自己既身體一樣。

我感受到風既流動...

我感受到陽光既溫暖...

我感覺到公路既粗糙...





我有觸覺。

我而家正正就係保持梗100%同步率...

唔止而家,就連頭先瞓著左都係一樣。

我既同步率一直都保持喺100%水平,無時無刻...

天欣真係厲害!

俾佢Train足一日,真係可以令一個對防禦者RU毫無認識既初哥,訓練到完全掌握。

而家既我控制住防禦者RU唔單止可以跑跑跳跳,仲可以純熟咁使用輔助功能。





好似話距離顯示、路線引導、提示板、溫度、濕度、能量...全部都可以隨心所欲咁Call出黎!

進展真係好順利...

要一直都咁順利!

我起一起身,企係公路上面...

行兩步,行到欄杆前...

望住面前既大海...

我地好快就得到解放…

只要一步一步向前...

呢個真實既大海好快就屬於我地...

真正既自由!

「阿日,你醒左喇?」耳邊傳黎天欣既聲音...

天欣利用虛擬房間裏面既揚聲器同我講野。

『嗯,醒左喇。』而家係...9點正...

面前出現既白色顯示板係咁樣寫...

「你都得架喇~從來都無一個行者可以喺控制艙裏面瞓著,你係第一個~」天欣語帶譏諷...

『係咩?控制艙都幾好瞓丫~』我伸一伸展下D筋骨。

真係好似同部機械融為一體咁...

「係你先會話控制艙好瞓架咋...講返正經野,感覺點樣?」天欣用上認真既語氣。

乜我好唔正經咩?

『感覺良好。』我鬆一鬆雙手。

「答好D,答得詳盡D。」天欣向我發出命令。

咁妳想我答妳乜先得架...

又唔問得好D...

『所有野都得心應手。就好似真實既軀體一樣。』夠詳盡喇掛?

「係咁你就要小心D。」天欣突然講出一D我唔明既說話。

『點解要小心D?小心D乜?』咁高同步率唔係一件好事咩?

「小心唔係你同防禦者RU同步,小心係防禦者RU向你同步。」天欣再講D我唔明既野...

『我唔係好明妳既意思。』對住我呢D科技白痴可唔可以講明D?

「雖然話防禦者RU已經脫離左EVE既控制,但你唔好忘記,你係用精神力去控制梗一部機器。」天欣越講我就越唔明...

我知我控制梗一部機器,咁又有咩好小心呢?

「以精神力去控制唔同你用肉體去控制,你會有機會迷失自己。」天欣繼續解釋。

迷失自己?

「曾經有行者試過喺訓練期間,因為太過投入喺防禦者RU之中,佢誤以為機械身體就係自己既肉身。」天欣咁講一講,我開始有D明白...

誤以為機械身體就係自己既肉身,就好似夢境同現實...

夢境過度真實,令到自己分唔清身處係真實,定係夢境之中...

「有幾個行者仲要經過長時間治療,先可以適應返自己既肉身。」

原來可以去到咁嚴重...

的確,我而家都有D迷失...

我真係覺得而家呢種感覺好真實...

比起自己肉身更真實...

而且仲有一種感覺...

「千萬唔好有一種機械身好過肉身既感覺...如果唔係你返唔到轉頭。」天欣囑咐我...

的確有一刻我有呢種感覺...

控制防禦者RU行動實在太方便...

而且無咁大危險...

就算喺行動中遇上致命攻擊,都唔會傷到肉身...

大不了都係痛一痛,終斷連接。

「你都係先終斷連接,返返黎現實世界。」天欣好似察覺到我唔多對路...

無錯...

都係首先終斷連接比較好...

如果唔係,就會好似天欣所講...

我眼前開始變黑...

慢慢變黑...

變成黑色既世界...

…………….

…………

……..

….

「阿日...」

係天欣把聲?

「有意識未?」

的確係天欣把聲...

『嗯嗯...』我慢慢睜開眼,迷迷糊糊之下,我見到天欣喺我面前...

控制艙門已經打開。

艙裏面既LCL亦都全部流走晒。

「起唔起到身?」天欣伸出雙手...

『我...』我好似全身都無力...

而且手腳都唔聽使...

應該話全身無一寸肌肉係受控制...

我成身都無晒力...

「黎,等我夫起你,你慢慢用力...慢慢...」天欣將我慢慢拉起...

點會咁架...

頭先控制防禦者RU既時候,我都可以好自然,好順暢...

但而家要控制自己D手手腳腳既時候,就唔聽使...

唔好話要跑跑跳跳,一D力都發唔到...

實在太過唔真實喇...

呢個究竟係唔係我既身體黎架?

我個肉身搭住天欣,天欣就將我既肉身扶離控制艙,放到艙外坐低。

而家既我,就連眼球都唔係好聽使...

「係唔係好似唔屬於自己?你個肉身。」天欣坐喺我隔離...

『嗯...嗯...我...』我連講野都有D困難...

唔係…

應該話就連講野都講唔到...

我D口部肌肉...

我條聲帶...

「呢種就係長時間同防禦者RU同步既後遺症~」天欣將件衫蓋到我身上...

後遺症?

我從來都無聽過原來控制防禦者RU都有後遺症...

「人係唔可以長時間同防禦者RU同步...就算係久經訓練既行者都係一樣。」雖然天欣坐喺我身邊,但我完全感覺唔到佢既存在...

而家既感覺,十足十足尋日岩岩第一次連接防禦者RU既感覺一模一樣...

「人內心本來就有缺憾,一種罪...」天欣欲言又止...

我當然知道天欣想講D乜...

天欣係想講人既貪婪丫嘛…

有邊個會比我更清楚?

我相信喺SPIRIT裏面,無人會比我更清楚...

天欣亦都好了解呢一點。

「你會被更好既野吸引,你會追求更美好既生活...」我無俾天欣繼續講落去...

『有人話...貪婪係進步既...動力...嗄...我唔認同...嗄...』要控制口部肌肉...好難...

但再難,我都要繼續講!

『進步係要有...但...唔可以因為一己之利...貪盡別人應有既一切...嗄...我地應該以族群既利益為依歸!』我唔會俾天欣既心靈動搖!

貪婪,係一種自私既慾望!

我地唔可以俾呢種自私既慾望吞噬!

「睇黎你開始控制得返自己個肉身喇喎。」天欣行左去拎我D衫褲過黎。

『嗯...』我亦都企到起身...

「著好衫,我地去食D野先再訓練過。」

著好晒D衫褲鞋襪,天欣扶住我行出控制中心。

手手腳腳都開始聽使...

如果要為呢個情況定一個同步率指標既話,我諗而家應該有60%...

我點解會同上同步率去界定我既自我控制能力架?

死喇...

睇黎後遺症影響得我好深...

深到連邏輯都出現問題...

「阿日,放鬆D,自然D,唔駛咁緊張。」天欣一邊扶住我,一邊提點我...

真係死得喇…

我竟然要天欣提點我點樣行路...

而家既我真係成個BB咁...

放鬆D...自然D...唔駛咁緊張...

好好咁控制自己既身體...

好好咁行好每一步...

慢慢,我已經可以靠自己雙腳行...

『天欣,我OK架喇...』我將放喺天欣膊頭上面既右手鬆開...

一定要靠自己,唔可以靠人...

好多野都係一樣...

如果只係識得假手於人,無一樣野會係成功!

去到飯堂既時候,我先醒起一樣野...

『係喎…阿月同阿風佢兩個呢?』同時間,我利用思緒向佢地兩個作連接,但接唔通...

「佢地應該仲喺INTRUDER調校梗。」天欣坐到我面前。

『咁都要食野架...唔食野點做到野?』做野都要有氣有力。

「佢地唔單止唔駛食,仲唔駛瞓添~佢地已經成晚無瞓。其實我都無瞓過...成晚都要將你D數據分析再傳俾佢地。」天欣合一合埋眼...

原來...就只有我一個仲大安旨意走去休息...

阿月真係講得岩,我係最得閒嗰個...

「係呢...進行左一日特訓,你對防禦者RU有乜睇法?」天欣突然問起我意見。

有乜睇法...

『我覺得防禦者RU的確好好用...可以執行任務之時亦有效保護行者免受傷害...不過...要有效使用防禦者RU就先要接受相關訓練,而且唔可以長時間使用,如果唔係對腦部有影響。』有強大既效益就要付出相等既代價...等價交換...

「睇黎你都已經好了解防禦者RU喇...咁Sacred-Armor呢?」天欣突然講起Sacred-Armor...

『Sacred-Armor…我無真正用過...但以對戰既經驗黎講,Sacred-Armor既效能絕對係高於防禦者RU。』無論對上防禦者RU,定係注射左精神液既我...

「唔...你真係咁諗?」天欣諗左一諗...

『嗯...』我點一點頭,『點解妳會咁問?』

「無…因為我想喺真正接觸Sacred-Armor之前,吸納多D唔同既意見姐。」我地既早餐黎到,天欣亦開始食佢既太陽蛋。

『係喎…當Sacred-Armor正式量產既時候,就要接替防禦者RU既工作。妳都要了解多D Sacred-Armor先得架喎。不過阿風應該會將所有Sacred-Armor既資料俾晒妳架啦~』阿風做事不嬲都好有交帶,絕對唔駛擔心。

「係,阿風已經交左唔少資料俾我,我亦都睇過晒。所以我先想問下其他人既意見。」天欣一邊食,一邊講。

『以我既接觸,我覺得Sacred-Armor真係好完美...』我仲未將我要講既說話講完...

「就係過於完美。」天欣望住我。

過於完美?

的確,Sacred-Armor實在太過強大。

而且付出既代價相對黎講比較細。

接近完美...

『但妳唔好忘記,Sacred-Armor係一件穿著式裝備。假如Sacred-Armor要直接承受超過抵禦既攻擊,或者Sacred-Armor機能失效,使用者就要面對受傷...甚至死亡...』我認真咁望住天欣。

天欣諗左一諗...

『呢D係我地最唔想見到既事。生命只有一次...我地一直都避免有人命傷亡...喺亂世之下...』我地一直都好努力咁去保護我地既人民...

天欣又諗左一諗...

『當Sacred-Armor完成晒所有測試之後,妳就要好好訓練行者。要佢地知道使用Sacred-Armor其實係好危險,比起防禦者RU危險得多。一定要比控制防禦者RU既時候更加小心。』生命係最重要。

天欣點一點頭:「嗯。我知道應該點做。」

更強大既能力,就要付出更強大既代價...

Sacred-Armor雖然好強大,但佢既代價就係會有生命危險。

我地唔可以躲喺控制艙裏面。

我地唔可以借防禦者RU既機械身軀替我地受死...

著上Sacred-Armor之後,就要接受死亡既威脅。

『我諗我都要爭取時間,加強訓練。』同天欣食完早餐,要繼續瞓返喺控制艙。

阿月同阿風都不眠不休咁準備,我無理由可以偷懶。

我唔可以好似阿月所講咁,我係最得閒嗰個。

我地有一個好強大既團隊,唔係因為有部份人特別聰明,唔係因為有超人、有英雄。

我地之所以強大,係因為我地有共同目標。

我地會歇盡所能,完成我地既共同目標。

拋開自私既心,以整體利益為依歸。

呢個本來就係我地SPIRIT既宗旨!

「訓練要開始。」瞓左喺控制艙之後,好快就連接上防禦者RU。

我已經適應到呢個機械身軀。

好快就連觸覺都有埋。

100%同步...

而家對我黎話,要保持100%同步真係唔係一件難事。

天欣已經開始將虛擬房間作出設定,眼前既景象已經變成小欖附近。

不同既敵人已經由四方八方開始出現。

佢地有一D係近戰型,有一D係突擊型,有一D係防禦型,有一D係狙擊型,有一D係潛行型...

各有不同既攻擊模式,防禦方法,進攻技巧...

我一閃,一避...

呢D模擬AI已經難唔到我...

突擊,強奪...

因為我已經玩左成日!

尋日全日就係喺呢道進行呢種攻防訓練。

我已經訓練到可以好好咁控制每一個動作...

一舉手,一投足,得可以得心應手。

我好有信心要同INTRUDER連接難唔到我!

“轟隆”最後一個模擬敵人都俾我摧毀..

「好。呢種訓練已經難唔到你。」天欣好滿意我表現。

我就話你地做得到,無理由我做唔到。

「哥,過黎我道。」阿月突然強行走入我既思緒...

呢個阿月,真係一D禮貌都無...

「嗯,我而家黎。」睇黎係時候...

係時候進行下一步行動!