《香港革命戰》(上): [24-審判之日] PART 1
天上既神光穿過厚厚既雲層，照射到山上，一個人身上...
呢一個著住白色長袍，長有白色頭髮既身影企喺高高既山上，傲視人間...
地上既奴隸一路喺地面上爬行，地上既火焰燒到奴隸既皮膚上，惡魔就踩住佢地背脊上面鞭打...
“嗚呀...嗚呀...”奴隸既慘叫響遍整個人間，此起彼落...
企喺山上既身影，好似仲未有所舉動。
就好似仲未聽到喺人間受盡折磨而發出慘叫既呼救聲一樣...
難道聲音仲未夠大?
難道響遍全個天空既聲音你都聽唔到?
你係唔係已經聾左呢?
我唔知山上既人係咩野人…
我唔知佢係上帝定係耶穌...
我只係知呢一個人，過於傲慢...目空一切...
我喺山下，望住呢個高高在上既身影...
整個天空開始變成灰色...
整個山頭亦都開始變成灰色...
就連企喺山上既身影都開始變成灰色...分裂...飛散...
當我有返意識既時候...
“咕咕...”肚餓...
訓醒肚餓添...
都係搵D野食下先…
有D乜野食呢?
我間房好似無乜野食咁咋喎…
唔知有無麵包...有無牛奶飲下呢?
點解會肚餓架呢?
尋晚食得唔飽咩?
我一路搵下有D乜野食，一路喺道諗返尋日喺山上搵完陳星之後，去左搵阿霖...
『阿霖。』當我去到阿霖佢地既山洞前，我已經見到阿霖企左喺洞口。
「咦?阿日?點解你又黎左既?搵我有事?有事可以用思緒同我聯絡架喇喎。」阿霖行到黎我面前。
『我岩岩去左搵陳星...發生左D事...都幾大件事...』我有D緊張咁同阿霖講...
「大件事?究竟係乜野事?」阿霖一頭問號。
『新西共嗰邊發生左恐怖襲擊...我地發現呢次恐怖襲擊應該係同陳星有關，所以我就出左黎...我仲發現...陳星喺山腳既建築物入面，建設左一個培植場...』我打量一下阿霖...
「培植場?你係話...培植人既培植場?」阿霖驚訝咁問。
『係…正正就係之前老鬼所建議既培植人實驗計劃...』我再打量一下阿霖...
「點會架?我地一直監視住陳星，我唔見佢有D乜異樣...更唔好話建設培植場!」阿霖堅定咁擰擰頭。
睇黎阿霖真係唔知有呢回事...
但都無可能...
要喺一個乜都無既山頭，建設一個培植場出黎，可以話一D都唔容易...
阿霖佢地又點可能察覺唔到呢?
「唔通...有人幫陳星手?」阿霖困惑咁望住我。
『如果話有人幫佢手既話...離開結界範圍既，我諗就只有老鬼...老鬼最清楚建設培植場既細節...』無錯...如果要建設培植場，就一定要老鬼幫手...
「但都無理由...一直以黎，除左前幾日李飛揚同佢接觸過之外，就無人接觸過陳星...無可能有人幫到佢手!特別係老鬼!如果老鬼喺監視既範圍出現，我地一定察覺得到!」阿霖皺埋眉頭，擰擰頭。
『除非...佢地唔係由地面往來...』我困惑咁望一望阿霖...
「你既意思係...折疊之門?無可能!更加無可能!就算係我地，都未掌握到點樣建設折疊之門!更何況係佢地?我地喺結界範圍入面都研究唔到，佢地就更加無可能!」阿霖擰擰頭，堅決否定我既猜測。
『唔係話一定無可能...事實上，佢地唔單止培植出培植人，佢地已經研究出點樣將EVE同LILITH同時注射入培植人體內...尋晚同岩岩喺新西共所發生既恐襲，已經證明左呢一點...呢樣研究，本來只係處於佢地既理論階段...但而家...佢地已經實踐梗...』無錯...佢地的確已經做到...
「點會有可能...唔好話點樣同時將EVE同LILITH注入培植人...佢地點會有EVE同LILITH?!」阿霖一面唔敢相信既樣...
『我都唔知...我都唔知佢係點得到EVE同LILITH...就算俾佢得到，都無理由可以保存到。或者...只可以講...係人類仲係原始人既階段既時候，唔會明白點樣產生出電力...』無錯...或者我地真係仲停留喺原始人既階段...
「假如真係咁既話...咁陳星就真係好有可能研究出折疊之門...但又如果佢真係究竟出折疊之門，就則係話佢連ADAM既技術都已經掌握到...」阿霖低頭打量...
『或者真係...不過都係大膽假設...我頭先上去見佢，都問唔到D乜出黎...』陳星把口，仲硬過誡律之牆…
「咁駛唔駛我地去調查下?」阿霖望一望我。
『唔...』我擰一擰頭，『唔好...如果陳星真係已經掌握到EVE、ADAM同LILITH既技術既話，你地去調查就會好危險...』
「但係...」我無俾阿霖講落去...
『唔可以冒險...一個都唔可以...而家既情況，唔值得去冒險...只要...只要引到李飛揚黎...其他事都唔再重要...完成審判程序...就只差少少...只差少少...』只要引到李飛揚過黎...
的確，引到李飛揚過黎係最重要既一步...
如果成功既話，之後既就應該無問題...
我相信時間係許可...
雖然尋晚返到黎既時候，阿月講過MINDER既情況可能有變...
但應該仲未去到無法修正既地步!
阿月都相信，仲有方法將局勢收窄至控制範圍之內!
而更重要既係，阿月已經通知左我，佢已經向李飛揚發出最後訊息!
我相信...唔駛幾耐...李飛揚就會被引導到黎呢道...
我地呢個久違既陷阱!
喺自己既房間，搵左幾塊麵包同奶充充飢...
好似唔係咁飽咁既...
唉...都怪我平日唔拎多D返黎間房，以備不時之需...
呢次真係唔慌唔衰喇...
不過又奇怪...點解好似咁好胃口咁架呢?
我尋日唔係仲受梗精神液既副作用影響梗架咩?
我尋日都仲係唔知肚餓架喎...
真係奇怪...
睇黎精神液真係唔係喺我地既掌握之中...
都係小心謹慎為上...
「哥!立即黎控制中心搵我地!」當我仲食梗塊麵包既時候，阿月又入侵左我既思緒...
『咩事丫?』可唔可以有禮貌D?講埋發生左乜事?
「過左黎先講!」阿月急急忙忙咁既樣...
『喂喂…』思緒又被強行終斷...
又係咁...
成日都係咁…
次次都係咁...
呢個阿月，真係唔識得乜野係禮貌!仲要係目中無人嗰隻!
真係唔好話，佢都幾次老豆!
老豆...
好喇好喇...唔好理咁多住...快快手手沖個涼，換件衫就趕過去!
免得一陣又俾阿月用黎出氣...
我極速沖完個涼，換衫既時候喺道諗...
其實我係唔係太過寵我呢個細妹呢?
我好似由救左佢返黎之後，一直都過份保護佢...照顧佢...愛錫佢...
我好似...無乜點樣話過佢一句...
就算阿月成為我既隨行者，我都好似無乜點用過重語氣話過佢一句...
我好似...真係太過...寵佢...
寵到佢壞晒...
你話丫...假如審判程序真係順利完成，阿月真係同嗰個李飛揚一齊既話...
我諗嗰個李飛揚真係慘過去死...
我敢肯定李飛揚一定會俾我呢個好細妹食住...
到時真係仲慘過做下等人...
或者呢個就係佢既報應~
或者呢D都係死海文書既一部分~
而佢地兩個既下一代會係點架呢?
我諗有阿月既遺傳既話...應該係極品...
咁遙遠既事，都係唔好諗咁多…
快快手手起程搵阿月好過~
如果唔係，我會比李飛揚更早受罪...
沿住條綠色既導引線一直行，沿途上好似有D唔係好對路...
我見到沿途上既行者，不論係站崗既...巡邏梗既...談論梗既都好似...有D唔自然。
佢地既行為舉止，神情動作，都好似...有D緊張...
佢地望住我既眼神...好似有D...困惑...
唔知發生左D乜野事呢?
係唔係同阿月搵得我咁急有關架呢?
呢個阿月...又唔一早講咩事...
到我而家想用思緒同佢聯絡，佢又禁止左...
你話我呢個給妹...係唔係總會令人擔心!
“颼”當我跟住導引線，行過壓縮空氣閘門之後...
「阿日!」阿風、阿賢、天欣都同時望住我...
佢地既神色仲好似有D緊張...
『乜咁齊人丫?』我走到去佢地身邊...
「哥!唔好再講咁多廢話!而家已經到左關鍵既時刻!」阿月行到埋我身邊...
哎呀呀!明明就係妳有緊要事又唔一早講!而家仲走黎怪我講廢話咁話喇喎!
阿賢接住講:「我今朝早收到由地獄既行者傳過黎既消息，消息指李飛揚、李軍、綽姿仲有一個叫王家榮既上等人，喺醫院出黎之後，第一時間就去左解放軍基地...到而家已經有兩個鐘。」
『咩話?佢地...』我仲未將我要問既野問出口...
阿月接住講:「應該係時候喇...」
係時候?
唔通真係…
『佢地準備要黎我地呢道?』我仲係唔係好敢相信...
阿賢接住答:「好高可能性。因為最重要嗰三個人都一齊入左去解放軍基地。好有可能係去拎Sacred-Armor。」
真係咁突然?
『有無辦法得知解放軍基地裏面既情況?』我要更真確既證據。
阿賢繼續答:「唔得...我地無人喺解放軍基地入面...不過就已經派左一整隊小隊喺解放軍基地附近監視。」
阿風立即開出幾個顯示器:「經過尋日新西共既恐襲後，我地同外面既通訊可以話係強左好多好多!我地而家已經可以直接清晰咁，同喺大半個地獄既行者用思緒聯絡!」
新西共既恐襲…
陳星...
『竟然係咁...估唔到陳星做既好事，真係會對我地有利...』真係點都估唔到...
邊會有人估得到...我諗就連佢自己本人，都估唔到會幫左我地...
「真係陳星做既?」阿風緊張咁望住我。
『嗯...』我點一點頭，『我尋日問過佢...我仲發現到培植場...』
「培...培植人既培植場?」阿風好緊張咁望住我。
『嗯...無錯...正正就係培植人既培植場...』嗰一個嘔心既地方...
「唔係丫嘛…佢竟然...喺出面建設到培植場?!咁唔怪之得...唔怪之得可以製造出用EVE同LILITH混合而成既炸彈啦...但...佢點可能喺結界出面做到架?」阿風一頭問號...
『我都唔知道...佢唔肯講...』我諗就算要切左陳星個腦出黎，都唔會俾我地搵得到答案...
「或者我地真係唔可以用原始人既思想，去諗未來人既科技...」阿風擰一擰頭…
『的確係咁...但呢點都唔係重點...重點係而家要知道李飛揚係唔係已經計劃好要黎我地呢道...而更重要既係，佢地會唔會係用我地估計既方法黎我地呢道...』我望一望身邊每一個人。
大家都靜左一靜，諗左一諗...
呢點係好重要...
李飛揚佢地會以乜野方式走過黎...都會影響到我地打後既每一步...
阿賢留心住幅中國香港實時地圖:「如果話佢地好似我地所推算咁，計劃利用我地既Sacred-Armor進行潛入行動就最好。但如果唔係既話...如果佢地打算硬碰硬...」
『無可能。就算佢地真係白痴到打算硬碰硬，佢地都攻唔破誡律之牆。』我地一直都有誡律之牆保護住!
阿風接住講:「但唔好唔記得，而家李飛揚已經有嗰段影像喺腦裏面...係我地為佢而設既影像...而家李飛揚可以話係知道點樣進入我地既領域。」
無錯喇!
我都唔記得呢點添!
而家既情況...係只要李飛揚一去到黃金海岸，差唔多就可以話佢一定知道點樣入到黎我地既領域!
弊喇...無計算到呢一點添!
天欣諗左一諗:「呢方面又唔駛咁擔心。就算俾佢地全個解放軍既軍隊入到黎，佢地都無命出返去。唔好唔記得，入到黎我地既領域，就係我地話事。我地既武裝可以輕易將佢地徹底殲滅。」
係喎!就算俾佢地入到黎，喺結界範圍內，以我地既武裝，絕對可以輕易對付佢地!
如果佢地真係咁做，可能對我地更有利...
阿賢點一點頭:「所以佢地硬碰硬既可能性就會低左。我相信如果佢地而家喺解放軍基地傾梗既話，李軍絕對唔會選擇咁樣做。佢好清楚...佢好清楚我地既實力...因為佢係唯一一個入過黎SPIRIT，而又可以出得返去既解放軍士兵。」
『嗯...』我點一點頭。
的確，李軍應該好清楚，我地既科技有幾咁高。
但當然，佢唔會知我地既科技只限於喺結界範圍內使用...
所以佢地一直都好怕走近我地...
亦唔明點解我地唔會大軍出征。
『但係...李飛揚佢地計劃出潛入計劃既可能性有幾高呢?會唔會到最後，佢地只係由解放軍基地各自回家呢?阿月...』我地傾左咁耐，阿月一直都無出過聲...
阿月好似喺道發梗呆咁...呆下呆下...
而家既阿月，一D都唔似平日既阿月…
唔係…唔係而家...
由尋日開始，阿月都係好少出聲...
就好似傾有關新西共既恐襲咁，阿月都無乜點俾過意見...
係唔係因為受MINDER入侵影響，到而家都未回復狀態?
可能係都唔定...
始終，我都係無辦法理解人腦被AI入侵既影響會有幾大...
「我可以肯定，飛揚佢地一定會喺今日黎我地呢道。」阿月仲係呆下呆下咁答。
『點解可以咁肯定?』雖然話阿月講既野，基本上係一定會發生...
「因為飛揚唔會無把握之下，就去同李軍相討有關潛入既事。飛揚知道無十足把握，分分鐘會俾李軍禁錮。而佢地既行動都唔可以拖得太耐，因為...國安局佢地已經盯住左飛揚佢地...而且...唔好唔記得仲有綽姿...綽姿都喺入面...有記憶既綽姿知道應該點做~」阿月突然對我莞爾一笑…
我俾阿月突如其來既莞爾一笑嚇左一嚇...
『嗯...』無錯...有綽姿喺道，應該可以順利咁引導佢地進行潛入行動...
只要佢地透過黃金海岸既折疊之門，潛入我地呢道...
跌入我地既陷阱...
審判之日既關鍵，就係我地手上!