自掘墳墓: 死亡的窺視
疼痛感瀰漫全身，然後聚焦在右腳上。
我痛得滿臉淚水，視線從模糊，到漸黑，然後到刺眼的白光，回到現實世界的光影。四周滿是吵吵鬧鬧的人聲，但耳鳴的感覺令我難受得幾乎暈過去。
鐵鏟擱在一邊，而右腳軟弱無力，我像瘸子一樣只能在地上蠕動。首先映入眼簾的人是John，他右手提著手槍，然而更放不開的是那顆夜明珠，緊緊牢在另一隻手中。
其他人都緩緩地站起來，小儀一站起身子都跑來察看骨折傷勢，Ocean本想過來幫忙，卻被她止住了。
我意識模糊，但隱約感受到小儀在用盡一切辦法減輕痛楚。
過一會兒，小儀示意安叔和Ocean將我拉到牆邊，讓我坐起來，然後將腰包裡的藥丸和清水灌進口裡。我識趣地吞下藥丸，然後閉眼休息，不知為何，世界彷彿恢復穩定，人聲逐漸變得清晰。
身體筋疲力盡，但疼痛的感覺總算逐漸消散。我不斷喘氣，彷彿剛從地獄中爬回人間。
我一開眼便見滿臉擔憂的小儀，頭先的騷動使她頭髮散亂，但樣子依然是如此清新，如此麗質。
「又係你！！！」Ocean的語氣是隨時殺人的節奏。
「喂喂你冷靜少少，咁大聲鬧我都冇用啦。」John知道自己闖了大禍，之前的氣勢盡然消失。
「塔隆、小儀，我都話呢個人會害死我地！」Ocean看著我們。
「John，今次真係你嘅錯，點解你可以咁貪心？」安叔也站在我們那邊。
「又話盜墓世家？少少危機意識都冇，仲要連累埋我地！」Ocean的怒火難以平息。
貪念——蒙住人的眼睛，令人迷失理智。
「連咁樣嘅引誘都受唔住，都唔知你有咩用。」小儀也加入罵戰，跟男友站在一線。
「我……我……」John反駁不了。
「呢類盜墓賊，只不過係偷死人嘢嘅流氓，眼裡面得錢！連自己老豆姓咩都可以唔記得！」Ocean破口大罵。
「夠啦！咳咳！」我強忍痛楚，提高聲調。
Ocean和小儀驚訝地看著我。
「塔隆，你俾個賤人搞到咁，我幫你鬧緊佢呀！」Ocean說道。
「冇用架，咳咳，呢種人，唔需要理會，唔值得。」我看著John，冷淡地說道。
Ocean怒目盯著John，他似乎感到愧疚，低下頭說不出話來。
「唉。而家情況點？」安叔將話題換掉。
罵戰結束，眾人環視四周，面色都不太對。
我們身處的地方正是剛才的墓室。然而，一切都反轉了。棺材和屍體違反地深吸力，置在「地上」，而我們則是站在平坦的「墓頂」。所有雕刻都上下倒轉，形成更奇怪的圖案。
「好……奇怪。」小儀覺得詭異。
「係唔科學。」Ocean也察覺事情的不合理之處。
「安叔……你覺得呢？」我無力地說，寄望作為建築學專家的他能夠弄清一切。
「唔知道，根本冇可能會咁，頭先嘅震盪只係維持左十幾秒，間房冇可能喺咁短時間內調轉所有嘢。頭先你地有冇感覺到咩？」安叔問大家。
「冇，震震下我就失平衡跌左落地，然後就發覺棺材同乾屍都唔見左，而家先知……我地喺天花。」Ocean組織剛才的事情。
「我同你一樣……」安叔說道。
「我有些少唔同……」小儀說道：「我一直都係捉住牆邊，雖然驚到合埋眼，不過我肯定即使到最後跌左落地都冇放過手。但係一開眼就變成咁。」
「邏輯上根本冇可能。」安叔說。
「John呢？」我問道。
「我？吓？你講咩？」John心不在焉。
「我地問你偷左粒夜明珠之後見到乜嘢同發生咩事！」Ocean不耐煩地道。
「我……我俾一股力量推落牆，然後我一眨眼就發現墓室嘅架構變到完全唔同，就係而家嘅情況。」John說道。
「咩力量？唔好亂吹！」Ocean威脅道。
「冇吹水！我都唔知道嗰下推力係點嚟……」
「根本九唔搭八！」Ocean不滿地說。
「我仲奇葩……」我無奈說道，此時止痛藥的效用似乎發揮出來了。
我叫Ocean將我撐起，然後撿回鐵鏟當老人拐杖。
「我震到飛左上天，正常嚟講應該會跌翻地下，但地深吸力好似調轉左咁，將我拉上墓頂，撞上去嗰下感覺就好似從幾級樓梯跳落嚟咁，唔係完全好大力，算係自然，只不過我有骨折，先會痛得咁犀利。」我將自己的經歷描述給他們。所有人都說誇張和不合理，像是在聽瘋子說話。
「飛上頂？冇理由，我仲感受到地深吸力，點睇都似係間墓室自己調轉左，一定係機關引致。」安叔說。
「有咩機關咁弱智。」Ocean埋怨道。
「安叔，冇可能。」我說道。
安叔疑惑不已，我指了指「墓頂」的棺材和乾屍。
「如果真係機關嘅話，就算棺材唔會跌落嚟，乾屍同埋其他嘢都會跌翻落嚟，先會符合正常嘅地深吸力。」我握著下巴說。
「你想質疑牛頓？」Ocean問我。
「你唔好講呢D啦，Talon哥你想講咩？」小儀殷切地看著我。
我實在不想說出這個「結論」，但他們每個都在等我清楚說明。
「首先，排除機關嘅可能性，你地覺得有冇可能係幻覺，或者夢境？」我嘗試引導他們。
「唔會，頭先震盪引致嘅痛楚同埋傷口就證明左。」小儀說道。
「把槍同酒樽仲喺度。」Ocean說道。
「我支電筒都係。」我對Ocean點頭。
「如果你有想法，不妨直接講出嚟。」安叔想我明示。
我指著墓頂的乾屍們，給了他們最後提示。
「你唔係講緊嗰味嘢……」Ocean似乎明白了什麼。
「你估啱呀，我的確係講緊嗰樣——有鬼。」
眾人陷入沉默，各自深吸一大口氣。
「我唔信呢類嘢，唔好講嘢嚇大家。」安叔說道。
「我都唔想信，但係呢件事根本解釋唔到。」我彷如化身偵探。
「你地頭先冇發現，但係我留意到每件乾屍嘅頭上面都有彈孔，咁就證明左一D嘢……」我繼續推敲。
「係咩？」小儀害怕地問道。
「我未完全證實到，但係我地而家就要去證實。」我說。
接著，我分別指往原本的入口和出口，之前對墓室的設計不明所以，現在卻是一目了然。高聳的「樓頂」，是為了營造密室，不讓我們輕易爬出。
然而，這種高度不足以完全妨礙我們。
「我明白啦，我企喺最底，之後係John，呢位後生仔就踏上去，舉最輕嘅女仔，就應該夠高。」安叔立刻提出最可行的辦法。
「似乎係咁啦。」Ocean也附和。
John則是沒有資格反對，點頭說行。
安叔站到上方對應著出口的牆邊，雙手輕易就撐起John，不知是John體重輕，還是安叔老當益壯，粗壯的手臂就這樣頂著John的腳底。
接著Ocean迅速爬上兩人的身體，安叔面色一轉，人柱抖動一下，但也成功堅持著。最後小儀緩慢地爬上三人，到Ocean的身上時鬆一口氣，然後左腳頂著他的左肩，雙手抓著墓門出口的邊緣。一切似乎順利。
整段過程中我只是站在一邊，幸好爬上的三個人都不是胖子，否則安叔定必受不了。
我看著「墓頂」的乾屍，覺得事情並不簡單，惡夢是不會這麼容易就能破滅。這些乾屍，彷彿是從天國俯視我們，恥笑在人間掙扎的可憐蟲。不，是我們身處地獄，乾屍身處人間。只有身處地獄的「人」，才會拼命想爬回人間。
又或者說，這些乾屍就是我們的未來——五具乾屍，五個不知所措的人類，一把有五顆子彈的手槍，完全吻合。
小儀拼命進行「引體上升」，Ocean向上一推，讓她終於爬上出口……
我正等待她的反應，誰知不消一秒就出了事情。
「啊啊啊啊啊啊啊啊啊！！！！！！！！」
小儀尖叫起來，一退就從半空摔倒「地上」。可是，她的樣貌不像是摔倒地上的疼痛，而是無盡的恐懼和瘋癲，她捲縮身體，不斷向後退，Ocean見狀立刻跑到小儀身邊，抱起絕望的小儀。眼神迷離的小儀可說是三魂不見七魄，雙腳還死命地向後撐。安叔上前問她看見什麼，卻只是看見小儀的嘴唇抖動，彷彿是凍得發僵。即使Ocean不斷安撫，小儀的情緒還是無法恢復，不斷尖叫和反抗。
「中左邪？」John緊張地說道。
誰知這句話刺激小儀內心的恐懼，她像瞪著鬼一樣看著John，不斷退離他。
「小儀，我係你男朋友呀，馬世海呀。唔好咁啦……我會好傷心。」Ocean流下男兒淚，抱著失控的小儀。
奇蹟就這樣發生，小儀在Ocean的懷裡反應過來，逐漸放鬆身體，不再掙扎……
兩人都哭了，場面非常溫馨。
他們互相都不能失去對方。
哭啼滿臉的小儀一手指著John，吞吐地說：「我……我見到……佢……上下調轉……然後……笑緊……望著我……仲發出嘻嘻聲……」
墓室的溫度隨即下降至零度。
「喂喂喂，你講乜嘢，你嚇到傻左，我點會喺上面！」John驚訝地道。
這下安叔都嚇怕了，遠離不知是人是鬼的John，我也連忙退至Ocean身邊。
「佢撞邪咋！唔好信佢！可能佢先係鬼，想害死我地！」John高聲指罵。
「夠啦，你到底係咩嚟！」我問道。
「擺明係人啦！可能個女人喺上面俾唔乾淨嘅嘢上身！」John反過來指控小儀。
大家的電筒都一致照著John，此刻我終於發現John的「異樣」。
他並沒有影子，完全沒有。
「John……點解你會冇影嘅？」安叔也嚇得面色發白。
「吓？點會可能！」誰知John真的轉頭察看，發現自己並沒有影子，而其餘四人都有：「黐線！！！我唔係鬼呀！！」
「塔隆，我一早講左，喺湖嗰度跌落水嘅就係佢！」Ocean說道。
安叔驚訝地看著Ocean，大叫一聲「你講真？」
「喺懸崖嗰度，我聽到佢嘅笑聲，只不過一直冇講……」我將懸崖上的事說了一遍。
安叔這時瞪大雙眼，心中一定是無法接受。
「喂！阿安，嗰兩條友講你就信！你唔識架！可能三個全部都係一夥！」John事到臨頭還在掙扎。
「John咁你個影……」安叔也不幫他了。
「黐線，成班都害我一個！早知就唔跟你地！」John不斷叫嚷著。
「殺左條友佢！一定係鬼！所有嘢都係佢搞出嚟！」Ocean終於忍不住氣，站起來緊握拳頭。
「Ocean仔！就算係都要冷靜！」安叔嘗試阻止，但Ocean此刻什麼都聽不進去。
大概是意識到自己有生命危險，John舉起手槍，指著準備衝過來的Ocean。
對，一直忘了這個。
「你地每一個人！都係死賤種！都想殺死我係咪！有種就過嚟！」John作出致命警告。
「你！我一早就知你同條女唔係好嘢，害死基地裡面八條友！而家仲要煽動所有人！」手槍對著Ocean和小儀。
「你！死跛腳狗！初初見你正正常常，點知你都係想過嚟害我！你以為自己係邊個？以為自己好聰明？可以拯救所有人？可笑！我話俾你聽！真正嘅鬼係唔會咁明顯俾你發現！一定係匿藏喺你唔知嘅地方！一定係睇上去最無辜嘅！鬼係咁，現實嘅人都係咁！我冇影都一定係個女人做手腳！」手槍對著我。
「John你要冷……」安叔話口未完，手槍就指著他的頭顱。
上方的乾屍彷如在諷刺我們……難道我們的結局真的是這樣？
「你！以為自己係咩大好人！以為自己可以取悅所有人！以為自己可以帶領大家『團結一致』！點知原來講兩句就已經動搖左所謂嘅信任！哈！仲要係三條完全唔識嘅蛋散！」
事態完全失控，他隨時都要開火殺人。
「我唔會俾你地任何一個人！掂到我！」
John雙手顫抖，顯然是不敢主動射擊，但倘若我們其中一個人上前一步，那就難說了。
本想開口談判，誰知Ocean已經咬緊牙關，擺好打架的姿勢：「唔理你係人定鬼，我都要殺左你！！！」
Ocean一步踏上。
「砰！」
槍聲非常響亮，傳來刺耳的回音。