自掘墳墓: 兩個人
小儀的手機沒電了，頓在前面待我追上。
「Talon哥，仲以為你出左咩事。」小儀鬆一口氣。
「我先冇咁容易有事，更何況所有人都唔會。」我自信地微笑。
「我地應該等埋Ocean？」
「唔好，邊行邊等會比較effective，可以當探下路，幫到大家。」我說。
「一於就咁啦。」
我和小儀肩並肩，緩慢地前進，警覺地環視四周，生怕死於毒蛇或者亂箭之下。
「呢度特別靜……」小儀撥弄頭髮，冷靜地說。
之前沾在身上的臭湖水已經乾透了，唯獨小儀的右腳褲邊有燒焦的痕跡，幸好沒燒壞皮膚。
墓道的確異常的安靜，或許是常常說笑的Ocean不在吧。
對，小儀的安全感很多都來自Ocean的關懷，現在的分散想必令她內心不安吧，多談點話也許是好事。
「係呀？咁我講下嘢啦！」我試圖為對話帶些色彩：「我有冇講過Ocean以前嘅智障嘢。佢咪唔食得辣嘅？有次玩Game佢輸左，罰食譚仔三少辣，佢食左一個半鐘之餘仲飲左三包蜜瓜奶同一支水，之後我地瘋狂恥笑。」
「哈，係呀，真係少少都頂唔到，仲要佢每次食嘢都要走芽菜同蔥，唔係佢就會逐條逐條夾走，好煩架。」小儀笑了一會。
「真係唔明佢點溝到你囉……你地仲要不斷放閃，可恥呀！」我裝作生氣。
「哈哈，等Talon哥遲D餐出Pool飯啦。」
「唉，我就……」
「小心！」小儀叫道。
這句話來之突然，我還沒反應過來，小儀就一把拉住我。
「你差少少就會跌落去……」小儀緊張地說。
面前原來是個無底深洞，長約四米，大約是港鐵車廂的闊度。由於手電筒光源有限，一不小心就要摔往地府見閻羅王了。
「嘩，嚇死。」冷汗由頭冒到腳底：「呢度……似乎要跳過去。」
「我應該得，但係你……」小儀面露怯色。
「本尊曾經係跳遠第二架，唔好睇低我。」我苦笑，心中盤算著如何是好。
「咁……好啦……我跳先啦。」小儀二話不說，簡單一躍就跳了過去，不費吹灰之力。
我看著就是無奈，想起小儀一直都在學舞，身手靈活，自己那個跳遠第二則是中一的事情，而且是碰運氣贏得的。
我拍了拍右腳大腿，心中不要不要的，唯求上天保佑了。
我將鐵鏟拋到對面，退後兩步，擺了個好姿勢，拍照放上Instagram應該會有好幾個「心心」讚好的。然而，起跑到邊緣後就剎停下來，因為我害怕了……真的蒙羞。
「唉……」小儀也是摸著額頭，無法直視。
可惡，我這樣顏面何存。我可是刺客的代表。
我再次後退，心數三後不顧一切地衝上去，可到了邊緣後雙腳無力，又停了下來。
「你同Ocean一樣咁廢囉……」小儀恥笑。
她這麼一說，幾乎氣得吐血而死，我才高八斗，學富五車，身子不過就差了一點，更何況我右腳帶傷，我只是稍微遲疑一下罷了。
我絕不容許自己再次龜缩，這次不看地面，只看目的地。我鼓起勇氣，破釜沉舟，直接從原地踏步起跳。我一躍而飛，本以為輕鬆就過，卻發現彈跳力不足，只有雙手到達對面，整個下身凌空掛著，嚇個半死。小儀看著緊張，趕忙過來拉起我。好不容易才脫離險境，我躺在地上，半死不活地喘氣，果然平常運動非常重要。
我拿了鐵鏟，拼勁站直身子，小儀總算可憐我，安慰幾句，果然女孩子比較溫柔體貼。
「我OK，繼續走啦。」我再次苦笑。
「小心D呀。」小儀提醒。
一路走著，不覺墓道有異象，便主動找話題：「頭先嗰四個人同John而家點呢？」
一直來到這裡，都不見他們的縱影，連聲音都沒有，難不成真的離我們很遠？
又或者……
「會唔會頭先嗰度跌左落去……」小儀不敢想像。
的確有可能……不然這樣的深洞怎麼會騰空出現，應該是陷阱來的。
「唔知Ocean佢地點呢？」小儀回眸一看，除了黑暗什麼都沒有。
「一定冇事嘅，我都信佢啦，怕咩？」我開朗地說：「不過Ocean拍拖嗰陣多唔多弱智嘢？等我八卦下得閒羞辱佢。」
「大把啦，哈哈。」小儀笑說：「你教佢表白嗰下我笑到而家。」
「吓？吓……唔知你講咩。」我表現震驚，結巴了一會。
「我一聽就知道係你教架啦，嘻嘻，只係一直唔講。」
「明明天衣無縫……」
「Ocean咁廢太易發現啦，不過係幾開心嘅……都估佢唔到。」小儀會心微笑。
「唉……」這次輪到我嘆氣，單手摸著額頭。
「嗰個伸手去我頭後面然後變支花出嚟嘅魔術，係教都唔好教佢啦，一早喺衫袖裡面見到朵花。」小儀笑著說：「仲有嗰句『我真係花心，因為你每一個表情我都中意』同埋『你對眼好靚，不過我對眼更加靚，因為我嘅眼神裡面都係你』都應該係你教架啦。」
小儀果然看穿了一切，將我傳授給Ocean的東西一概揭露出來。
「你點知道架……」我只能投降。
「Ocean做呢D嘢嘅時候眼神語氣都會變怪，而得你一向熟呢範……」
「喂喂，唔好講到我成個Player咁啦。」
「其實你想追嘅話一定有人受，真係唔明點解你一直單身。」小儀無奈地說。
「冇合心意嘅對象呀……」
「咁又成日叫苦連天話其他人放閃？自相矛盾。」
「怨下唔得咩？」
這對話沒完沒了，索性說別的事情。
「咁樣嘅話，點解你又受佢表白嘅？以前好多人都暗戀同追過你，條件比Ocean好嘅多的是啦。」我好奇問道。
「因為？Ocean佢係見過嘅人裡面最真實同有義氣嘅人。我以前覺得呢兩個條件唔係好高要求，但係慢慢發覺唔少人連坦誠做自己同恪守情義嘅勇氣都冇。」小儀嘀咕道：「我先唔介意佢嘅身份家境，同埋佢表白有幾樣衰，最少佢比起世界上好多人都有勇氣，咁樣我先覺得有安全感。」
隨著年齡增長，面對的人多了，我們就會慢慢習慣說謊和偽裝，跟別人說是維護大家的感受，但更多時候是為了利益和自保，甚至單單只是怕事，成為戴面具的「懦夫」。我只能說，小儀選擇了對的人。
思考片刻，忽然小儀做了噤聲的動作，我仔細一聽，居然是前方傳來的雜音，似乎是求救和痛苦的聲音。
「出左事？」我壓低聲線。
「你覺得應該點？」小儀問我。
「要去睇下，可能係之前嗰班倖存者都未定。」我彎下身子，緩緩地向前進，果然是另一間墓室的入口。
求救聲越趨明顯，卻分辨不出是誰的聲音。
「似乎係窒息嘅聲……」小儀緊張地說。
「我行先，小心腳步聲。」我身先士卒。
止痛藥的效果很好，這時候已經能控制腳步節奏了。我停在門前，首先映入眼簾的一具脖子被勒斷的屍體，似乎是人為做成的。他手上的手電筒一直亮著，將墓室的大致結構照個出來。
我沒空留意細節，就發現墓室內有兩個身形近乎一樣的傢伙，其中一人單手架著另一人的脖子，將被害者的整個軀體舉起，享受著折磨人的滋味，展開凌厲的笑容。
瞇眼一看，我就立刻後悔了。我嚇得全身發麻，心肺功能彷彿停止了一樣。
眼前的兩個人，都是John。