[HiHi喇] 大佬叫我入大學收兵......: (20)

一到上層, 我即時拉低個口罩道:「Eric哥你一定要聽我解釋!」 

Eric木無表情咁望住我, 道:「你最好有合理既原因, 坤哥佢好唔高興。」 

「其實係…係因為…」真係要講個理由果時, 我發覺自己口窒到一句野都講唔到。 

Eric死盯住我道:「唔好同我講, 你鐘意左條女呀下。」 

「咪…咪傻啦!」唔知講咩既情況下, 我決定亂吹道: 「 我...我查到條女個老豆原來係某間上市公司既主席, 有錢到仆街, 所以我先想放長線吊大魚喳。」 





Eric問道:「佢既家事你又點會知?」 

我硬住頭皮繼續道:「係…係條女親口同我講家! 依家佢勁冧我, 你只要俾多少少時間我, 我一定可以喺佢身上面錖番一筆, 然後幫會就會有好多錢使, 你話幾好呢!」 

Eric撓起雙手道：「我憑咩信你？」 

我即刻攞左部手機出來，道：「你睇下你睇下，我同條女既Whatsapp係幾咁曖味，係幾咁情意綿綿得家，如果佢無野既話又點會晨早流流用短訊傳情吖，哈哈哈哈…」 

Eric聽到皺哂眉頭，半信半疑道：「好，我就暫且信住你先，不過當你呃完條女啲錢之後，佢點都要出來做雞。而且你唔好忘記，個O Camp聽日就會完，到時你帶唔到一班新血來見坤哥既話，叫定你屋企人收屍啦！」






天己黑，距離出CAMP只係得番一個夜晚。 

點先可以係咁短時間之內收到一班靚交貨呢.... 

究竟邊個係警方既卧底呢… 

采兒又點算呢… 

「喂，做咩玩完City Hunt你就成個苦瓜干咁既？」返中大既途中，采兒走過來關心我。 





「無，頭先撞到果個男人係我啲遠房親戚，佢話我知原來我有個呀叔過左身喳嘛。」我廢嗡道。 

采兒「哦」左一聲, 就放慢腳步墜後左。 

一心以為采兒會安慰我幾句，依家佢咁就行開左，我竟然覺得有啲失望.... 

突然，一個柔軟既軀體好溫柔咁從後攬住左我。 

「o靚妹...妳做咩呀？」我驚訝道。 

「我一唔開心，爹地媽咪就會咁樣攬住我家啦，你唔覺得依家好似有間屋罩住你咁咩？」 

我停下腳步，呆望住采兒緊扣係我胸前既雙手，感受住佢傳遞過來既心跳。 





唔知點解, 我感到一陣莫名其妙既哀傷.... 

「忽得你啃親呀？等我來幫你吖。」毒撚組爸拉開采兒，然後用力咁係我背脊CHOK左野。 

俾佢咁樣銀一銀，我即時神色痛苦咁跪左係地。 

「點呀，見唔見好啲呀？」毒撚組爸關心問道。 

終有一日我會親手捏死你條死毒撚… 

「係呢組爸，我地依家去邊呀？」我覺得采兒係為左岔開話題之至咁問。 

「依家我地要去火炭度食宵咯, 乖女。」毒撚組爸唔知醜咁答道。 

「晚餐都未食就去食宵夜？」采兒問道。 





「係呀，呢個係傳統來家。哈哈。」毒撚組爸笑道。 

基本上，有咩唔合理既事情呢條毒撚都會賴落去啲傳統度。 

可悲既係，啲Freshmen真係會信到十足十。