淚眼模糊下,一對粉紅色既波鞋出現喺我眼前。 

「你做咩跪喺度啊...」 

我抬頭一望, 采兒抽泣住咁企左喺我面前。 

我咩都無講就用盡全力攬實佢。 

「嗚嗚…唔好再蝦我…」采兒喊到成個花面貓咁。 





呢一刻, 我先知原來佢對我來講係咁重要。 

情不自禁下, 我給予佢深情既一吻。 

時間, 聲音, 空氣… 通通都好似喺呢一剎那停頓左落來… 

遠處熊熊烈火既襯托下, 如果依家有人幫我地影張相, 相信擺上facebook都一定有唔少人Like。 

我正想伸埋條脷出來既時候,采兒尷尬咁縮左一縮,然後將個頭喱左落我膊頭度。 





o岩既,初吻就打車輪,對佢來講真係激左啲。 

「點解妳會無事既? 個一蚊唔係妳Keep住既咩?」我輕輕撫摸住佢既秀髮道。 

采兒傻更更道:「咩一蚊呀?」 

「City Hunt臨尾有個男人幫妳執果一蚊咯。」 

「哦, 我來食宵既途中, 有個好肥既同學話圍村要收保護費喎, 我咪俾哂啲散錢佢咯, 原本仲諗住用啲錢來買雪糕家...」 





「叻女, 最好以後請妳食多啲。」我將佢攬得更緊。 

采兒小鳥依人道:「好野!采兒最鐘意就係李又德。」 

我微一錯愕, 放開采兒道:「整容都勉強可以話有樣睇, 妳連我全名都知?!」

采兒好緊張咁攬返住我,道:「唔好嬲啦, 其實係我爹地話我知家。」 


我驚訝道: 「幫我整容果個口臭醫生,竟然係你老豆?!」 

「唔準你咁話我爹地呀。」 采兒扁嘴道。 

「咁講即係你一早知我係黑社會派來既卧底啦!」 

采兒點頭道:「嗯,其實喺我入Camp之前,爹地已經千叮萬囑我要小心一個生得好似吳彥祖既人,話佢會專捉人去做雞。我心諗,好地地一個人又點會無啦啦變成雞呢。而且同你相處落,發覺你唔單止唔係壞人,仲要對我好好.... 





采兒越講越怕羞,越講越細聲。 

望住佢情竇初開既冧樣,我忍唔住又想錫佢一啖。 

可惜, 我未掂到佢個嘴,前方就出現左一班行起路上來大搖大擺既街童。 

為首一個穿唇環既MK仔吹口哨道:「著住Camp Tee打車輪, 好有那些年既Feel喎。」然後仲要唱起歌上來:「噢~那些年錯過的大乳,那些年打過的飛機....」 

「大佬, 條女好清純呀!」 

「屌你正呀喂!」 

周圍既街童跟住起哄。 





「哥仔咪撚咁獨食啦, 有好野梗係開心Share家。正所謂龍生龍,虎生虎,染頭既女友,就攞來愛撫。」MK仔伸手想摸采兒個pat。 

「SHARE你老母!」我一腳就踢左佢落地。 

「大佬你無事吖嘛!」佢啲o靚即時衝過去扶佢起身。 

MK仔吐左篤濃痰, 道: 「屌你老味呀, 你肯定係未聽過火炭不死鳥「雷明燈」呢個朵喇!」 

「喝!」 護主犬紛紛抽出萬用刀助陣。 

如果係隻抽既話, 我真係驚都未驚過, 但雷明燈有成五六個手執武器既死忠, 再加上我又要護住采兒, 呢場仗可謂實死無生。 

我即時用個身擋喺采兒前面, 道:「采兒, 妳快啲返去叫飛機班馬過來幫拖。」 

采兒驚慌道:「下...我唔識家...邊度有斑馬啊 …」 





「唔係跑果啲斑馬呀!係要妳叫佢call人來幫手呀! 

「咁.....但係....」 

「快啲去啦!!」 

俾我一喝, 采兒轉身就跑。 

「走得去邊!」雷明追左上去。 

「你咪成個粤語殘片既奸角咁啦!」我一下就捉住左雷明燈既手腕向後拗。 

「屌!唔使理我, 劈撚死佢!」睇唔出雷明燈竟然有番幾分骨氣。 





其他街童即時一擁而上。 

當我留意到佢班o靚個個既衫袖都係藍色果陣時,我腦海中即時浮現起三個字。 

藍翼幫。