公佈committee人選嘅日子係十月頭左右,即係interview嘅一兩個星期後。當日玩鳩我嘅隔黎位同其他friend放學後拉咗我去睇公佈版,見到我畀人揀咗笑到仆街,問我係咪出賣色相收買咗Jenny。佢地平時啲行為真係一打膠都唔夠畀,不過就係因為咁,先至夠難忘。

「屌你地擺我上枱,我點知點解會畀人揀中,可能得我一個in掛。」
另一個friend講:「咁又係,照計你肯賣肉,人地Jenny都唔制,貪你夠柒咩懿哥。」

上回唔記得介紹Jenny,女同學黎講佢算係高,我諗都有一米六幾差唔多米七,算係白白淨淨樣唔差(幾大波),識咗咁耐都keep得幾好,當時都有唔少人追。如果將佢擺喺我班,我諗佢都係數一數二嘅靚女。得罪講句,當年我班嘅女同學唔係咁掂,不過勝在個個都好人。

至於我?得閒打波、機、丁,成績不過不失(中英雙語較好,靠其入U,不過個英文老師好鍾意屌柒我班啲英文水準),無特別嗜好,身高無米八,樣就介乎於吳彥祖與鄧兆尊之間。總而言之,平凡學生哥一個。

以前中學放學真係好過癮,未近公開考試前成堆男人放學後一係去踢波,唔係就去附近篤燒賣食;就算係近考試果期,大家放學都留低一齊操pp,熱血過衝鋒21打神龍寺或者12年曼城拎冠。





作為個社嘅swimming section committee,原來唔係淨係搞關於swimming嘅野,基本上所有社際比賽我都要幫手(屌,不如叫我做administrative committee算數,後來發覺係Jenny見我熟駛鳩我),所以當時都幾忙,是關社際嘅野係cover晒成年。

十月果陣冇記錯係搞rugby先,當時都係做啲例行公事,例如早會度輪流宣傳,呼籲下啲人黎睇(講真去promote咁多次都幾無謂,是關比賽都係喺學校入面個場度搞,人地放lunch實見到你打波,有興趣就睇冇興趣就走,唔會因為你promote多幾次而會想睇)。

雖然果排都係做啲手板眼見工夫,但係都要每星期開一至兩次會,次次都起碼搞成粒鐘,搞到我少咗約同班啲死黨一齊走,為咗排遣寂寞(當時醉翁之意只在酒),散會後我同Jenny都一齊走。
已有 0 人追稿