愛在香港，食在英國: 第三章

筆者按：幾年前睇過一篇長故，佢亦都係夾雜咗高登icon（當時佢喺高登上連載），我幾鍾意喱種感覺。故喱章起試用高登icon，學ICU肥仔話齋：個人認為較有親切感。

我同Jenny住得算近，佢由學校行返去就要兩三個字，而我搭兩個站就返到屋企。佢果頭有條都算出名嘅食街，咩名就廢事講喇，隨時IP都唔駛check。

前文講到我同親班友放學，好多時都會去果條食街拮燒賣（唔係拮女），點解？是關我中學放就放三點半，lunch就十二點食，我屋企癲拿就八點先開飯，如果放學唔食啲野就等餓到仆街。

發育期嘅我，要將幾個鐘前食嘅lunch搾乾搾淨容乜易，所以一散會我就同Jenny去食啲野，不過多數係我食佢唔食，一來又話驚肥，二來又話怕街邊野唔乾淨（佢係鍾意舖面乾淨同食生勾勾果類人）。

「食唔食？」我一路咬住粒魚蛋一路問Jenny
「唔啦，你兜車仔麵咁肥。 」





我食車仔麵揀嘅餸黎黎去去都係果幾樣，總之就係好有男人味。你可能問，點樣可以食車仔麵食得有女人味？清湯、淨魚蛋、生菜同腸。

「我同你黎咗冇廿次都有十次，次次得我食好冇癮姐。」我將碗底最後一條麵吞落肚
我繼續講：「我唔夠飽，再食少少野好唔好？ 」
佢笑笑口（就係喱個樣 ）答：「食撚記好唔好？」

當然，平時斯斯文文嘅佢點會無啦啦講粗口，撚記算係一間遠近馳名嘅甜品店，我在此姑且稱呼佢為撚記。

「車仔麵你就驚肥，甜品你就唔驚？ 」




「你理得我，係咪再食，係就去唔係就bye bye。 」
「是但你，食囉。」

我以前同Jenny對食嘅要求應該係完全相反，我食甜品就愛好比較傳統同舊式啲，例如豆腐花、紅綠豆沙果啲；佢就鍾意啲新穎野，而家成日走去試咩macaron（macaron？macaroon？macaroni？），我諗楊枝甘露對佢黎講已經算係幾outdated。

入到間撚記，搵咗個二人位坐低咗。隔咗咁耐唔太記得果次食咩，佢好似揀咗布甸定雪糕（十月秋風起我唔明食乜鳩凍野），我就食總之係熱嘅甜品。

我寫文果陣原本諗住稱呼間撚記為糖水舖，但又好似唔太貼切，以前嘅糖水舖同現今嘅甜品店差好遠。糖水舖畀我嘅感覺係：有部機（類似搾汁機）入面有個攪拌器轉下轉下賣火麻仁同廿四味，而畀客食野嘅枱要係摺枱。我唔知咁算唔算係舊式，但我屋企附近就有間咁嘅舖，食咗都有一段日子。