讀書時期,同異性單拖出街最煩嘅事一定係撞到朋友。無論你隔黎條女同你咩關係都好,第朝返到學校班人就會用喱個死人樣望你。

上回講到食糖水,話說我地食完之後,我擺低我果份嘅錢畀Jenny,由佢去埋單,而我行出舖頭外面等,因為間野真係好撚窄,同啲A&F店有得比(利申:有行過,但唔著)。

出到去等咗陣,見Jenny唔知搞乜搞咗幾分鐘,正當我諗住入返去搵佢嘅時候,有條仆街大叫:「傻仔懿,戇鳩鳩企喺度做乜?」

我擰轉頭一望,原來係同班班友踢完波去飲野。
「咦?咁快踢完波?」
「係啊,有人book咗個場,今日咪早少少散。你等人?」
「多得你班仆街之前推咗我去做啲乜committee,啱啱散咗會咪同人食啲野。」



Jenny終於埋完單出黎,見到班友自然,但班人就用上文講到個死人樣望住我同佢,唔駛等第朝。
有條粉皮:「懿哥你真識食,同人單拖,唔怪之得近排少咗同我地踢波啦
我:「請收皮,推我上枱仲賴返我唔搵你地踢波,仲有你地渴撚死未,快啲走
「係嘅係嘅,識做

等班人走咗之後,我同Jenny講:「你識佢地架啦,都知班友成日都神下神下
Jenny:「唔係吖,佢地都幾搞笑,我班啲人讀書多,有時都有少少悶,你班好似開心啲

講返Jenny同我班死黨嘅關係先。Jenny同佢地當中大部份人都好似同過班,所以關係應該好過hi-bye friend。



我當時好自然咁應:「傻啦,班人九成係傻,淨係一成係癲
但現今回想返,其實就係因為我班(連埋我)多癲佬,所以好少會有啲咩拗交;反而Jenny果班分幾個圈子玩。畀我揀多千次萬次,我都會揀返喱班。

吹多兩句行到分岔路,我要轉去地鐵站。
我同Jenny講:「好,係咁,閃人,Bye
中四起放學後同佢單拖食飯食過唔少次,我好少會送佢返去,因為佢真係住得幾近學校
Jenny:「Bye,聽日見

作為一個唔駛煩惱公開考試住嘅學生哥,返到屋企自然搵機打



講起打機我班好過癮,成日一齊玩搵Game玩,例如Heat Project、CS1.6定2.0、AOE、L4D,有時甚至搵埋啲女仔玩跑。當自己一個打機嘅時候,總係對隻Game嘅要求越玩越高,例如畫質同耐玩度。但一班人玩嘅時候,原來跑,都可以咁好玩。

好懷念以前PS隻惡魔城月下夜想曲,真係超級經典。果陣冇電腦唔上網睇攻略唔知原來隻Game入面有好撚多勁武器,靠自己戇鳩鳩用套主角裝爆咗幾次。最好彩有次跌咗把「真空刃」,禁住「口」可以自動係咁斬,用十秒殺咗尼古拉個基友死神。玩過最新果隻惡魔城已經係PS2(多年前嘅事)嘅3D版,畫質靚咗,不過唔知點解,總係覺得2D嘅好玩啲。
已有 0 人追稿