【奇幻/神話】我好似唔小心成為神: 第三章 新手上路(三)

  名為安潔拉‧菲爾既白髮女仔同我解釋左大概發生咩事。原來神係存在於呢個世界架。只不過，係墮落既神先會出現，所謂既墮落，只不過係神話入面既神，從神界被降格至人界既神。
  而試煉者，就係對抗神既人。但當然，人係唔會足夠，即使全世界既試煉者傾盡全力對抗一位神，都絕對打唔贏神。
  只有同樣身懷神力既魔王，先可以對抗神明。只有令神明屈服既人類，先可以成為魔王。令自尊心極重、極自我中心既神明屈服，只有一個方法，就係贏過佢地。成為魔王既過程，以前就叫做「神格化」，姐係好似齊格飛阿，珀耳修斯阿，從人成為英雄既故事。
  以上既說話全部係直接抄錄自安潔拉，因為我實在冇呢個概念。
  「PK!8點，喂!我夠鐘返學，你快D走先，有咩遲D再講。」
  我望一望鐘，心知不妙。因為我地學校既校長係一個異常得閒既人，佢日日都好似碌木咁企係校門，所以邊個遲到阿、冇返阿，佢全部都知。已經唔係引薦生既我，操行最差D就一定比人踢出校。
  「Dickson!快D啦，得返3分鐘渣!」朗賢係課室窗邊大叫。
  我既身體亦真係好奇怪，平時係屋企去到學校，路程最少都15分鐘，我全速跑左咁耐，竟然連氣都冇喘。
  「聽講今日會有插班生啵。」Jessica同朗賢行過黎。
  「插班?讀左咁多年書，好似都係第一次渣啵。」我回應佢地。




  「不過話時話，Dickson你搞咩黎阿，點解今日既你，好似......」Jessica斷斷續續咁講。
  「好似特別有魅力?」朗賢異口同心咁講。
  「係阿係阿，你都覺呢?」
  「魅力?依家先發現倒?」唔知點解，我一D都唔開心，究竟佢地以前係點睇我架?
  「全部人返埋位坐低!」班主任用本成尺厚既書拍檯。
  「相信你地可能已經收倒風，今日會有插班生黎學校，而咁好彩地呢，就係我地班。」
  班下面既人都係度起哄，睇黎大家都覺得好新奇。
  「菲爾同學，你可以入黎啦。」班主任向門口講。
  「菲爾?唔係下話......」我心知不妙。
  果然，一個白髮既女仔就入左黎。呢個女仔五官精緻，面上樣冇一點瑕疵，完美表現正值青春既學生魅力。




  班上面既人好似啞左咁，不分男女，原本起哄既聲浪一瞬間跌落冰點。
  「好啦，你就坐果度啦。」班主任指一指班上面既空位。
  突然，呢個白髮女子好細聲咁讀出經文:
  「神阿，我們知道我們從祢而生，但全世界都受那惡者控制。」
  「老師，我想坐係呢個人側邊。」菲爾指住我。
  「唔好傻啦，老師點會比你......」
  「好啦，就照你意思做。」老師有似有少少放空咁講。
  菲爾就好理所當然咁行過黎，而我側邊既果個人就讓左個位比佢。
  「喂!你做左D咩黎?」我細細聲咁問佢。
  「王想知道既話，食飯果時，我會好好解釋。」菲爾滿面微笑咁講。