【奇幻/神話】我好似唔小心成為神: 第五章 新手上路(五)

    我都有D難以置信，受左傷之後，做咩都可以話事事不順。而朗賢更加係眼泛淚光，相信佢都對眼前呢幕感到不可思議。
  「你......你幾時好返架?」朗賢個樣好似就喊就喊咁。
  「我都唔知，可能奇蹟出現左掛。」事實上，呢句亦都係我既感想。
  「你地打住先，我去確認下D野。」我輕輕帶一帶過就跑去搵安潔拉，想了解下咩事。
  「喂，我個身體究竟咩事阿?」安潔拉係太陽遮下面乘涼。
  「呢個都係神力。」安潔拉好似知道我又會問佢咁。
  「神力有冇咁便利阿?咩都得架?」我開始懷疑佢係咪中二病係度吹緊水。
  「當然係咁便利，弗雷係農業之神，同大地有密不可以既關係，而農作物既成長、收成就係代表農作物不斷重生既過程，加上弗雷亦掌握甘露、陽光，兩樣都有利農作物既重生，所以你既身體就有相關既能力，令你隨時保持最佳狀態，當然傷勢都會迅速消失。」安潔拉長篇大論咁講，但大致上姐係我可以高速回復咁上下啦。
  「但即使有呢種能力，弗雷作為個體亦都打唔贏索爾。所以，請王你好好諗下，同我地『陽之典』合作共存。」安潔拉似乎唔會打消呢個念頭。
  「我再諗下啦，走先。」我再唔返去同朗賢打波，佢又唔知點睇我同安潔拉。




  正當我跑緊過去既時候，天空突然變到好黑，甚至令人覺得要落黑雨停課。個天從晴空萬里變到烏雲密佈都只係幾秒既事，實在有太大既違和感。
  「王!Dickson，快D走阿，阿薩神族既神黎左啦!」安潔拉以好快既速度走上黎。
  「赫耳墨斯阿，求祢賜予我飛鞋，讓祢的子民擁有翱翔天際既能力。」安潔拉對鞋突然生左對翼，拖住我既手就飛走。
  「喂!我地咁樣走左，咁其他人點阿?」
  「當墮落之神出現既時候，我地全世界試煉者對平凡人下既咒就會出現，令佢地既時間停止，呢個係我地試煉者長時間研究柯羅諾斯得出既成果。除非神或者魔王有意出手，呢D冇乜魔力既人都唔會有事。」安潔拉仍然好集中咁逃走。
  「哼!區區人類還想插手神和魔王的戰爭。」天空出聲一把雄壯既聲線。
  隨即一道落雷就擊中左我地，安潔拉既飛鞋都好似唔能夠再用，但我就好似乜事都冇咁。
  「唔通......係奧丁直接出手?」安潔拉面色變到好蒼白。
  「走阿，王......Dickson，佢唔係身為初哥既你可以打得贏既對手。」安潔拉唔知係邊變左把劍出黎，睇黎佢唔諗住走。
  「咁你點阿?」




  「作為試煉者，保護魔王，確保佢地成長到獨當一面可以對抗神明就係我地既職責。」講完之後，安潔拉就衝左上前，似乎係想拖延時間，比我逃走。
  我可以點做呢?
  放棄眼前呢個女仔，拔腿就走?
  放棄眼前所有既人?
  呢一個應該與我無關既濁水，我應唔應該闖呢?呢樣係賭上性命既事，我應該唔應該......
  係我未得出答案既時候，我身體已經衝左上去。
  「既然係咁好啦!我就成為你所講既魔王啦!」我大嗌回覆安潔拉，而且用盡我最快既速度追上去。
  我接受左成為魔王、獲得神力既事實，而我既身體亦愈來愈亢奮。然後，我腦海就浮現左弗雷既能力出黎。
  「現身吧!穿越烈焰既聖馬，我以弗雷—豐饒之神既名義命令你，作為我既聖獸，現身彰顯我既威名!」一匹純白、馬蹄有火炎纏繞既馬憑空出現，亦拉開左我第一次「聖戰」既序  幕。