【奇幻/神話】我好似唔小心成為神: 第六章 新手上路(六)

  「你終於肯承認你係魔王啦。」安潔拉露出小惡魔般既笑容，睇黎呢個都係佢既目的之一。
  「我識叫佢出黎，唔代表我識用架。」我指住果隻好似係我召喚出黎既馬。
  「上啦，聖馬，攻擊佢啦。」我真係唔知點解突然浮現出寵物小X靈的命令方式。
  但佢又好似真係明白咁，飛翔向發出雷電既奧丁。
  「果然是可恨的弗雷繼承人，老夫今日就要收拾你!」呢個中年阿叔突然好激動。而且高舉佢手上既長槍，數之不盡既雷電就馬上向我同安潔拉襲擊，雷電亦同時阻止住聖馬。
  我即刻抱起安潔拉，繼續逃走。
  「點樣先可以打敗佢阿?」我自言自語既同時亦想問下安潔拉。
  「呢個問題我真係答你唔倒，如果我地知道，咁魔王既存在就唔再珍貴。而且我唔相信會有人挑戰神咁蠢。」安潔拉好似係度笑緊我咁。
  「不過弗雷係擁有勝利之劍，理論上點都有希望既。」安潔拉好不負責任咁講。
  「不過勝利之劍係比弗雷拋棄既神劍，你用唔用倒佢都係未知之數。」安潔拉補充。




  「的確，我個腦冇出現勝利之劍的使用方法。」
  「王......Dickson，我相信無論點都好，想挑戰奧丁，最低限度都要掌握佢既神話知識。」安潔拉一語道出我最大既弱點。
  神話係神既起源，唯一有機會對抗近乎無敵既神，就只有係神話中找出佢既弱點。就好似美杜莎咁，大部份既人都從神話知道對抗美杜莎既方法同佢既弱點。
  「但係係呢個咁緊急既情況，我點學得切阿?」事實上抱住安潔拉逃走已經好吃力，奧丁綿綿不絕既攻擊令我分身乏術。
  聖馬雖然不斷同奧丁周旋，令奧丁攻擊冇咁凌厲，但始終比唔上奧丁。
  「咁諗你就錯啦，Dickson。」安潔拉突然將額頭貼住我既額頭。
  雖然我對佢就冇乜好感，但一個正值年華，外表又吸引既女仔做D咁既野，的確令人心跳加速，正當我想推開佢既時候，大量既知識湧入我既頭腦，呢一個應該係魔法既動作掛，姐係好似美少女變身既指定動作咁。
   奧丁係北歐神話中最強既神，同時係戰神、知識神，擁有智、勇、力既佢，被尊為眾神之父。身為最高神既佢，會為人類帶為黎和平，同時亦會帶黎戰爭，係一個反覆無常既神。成就呢個戰神既武器當然亦大有來頭，係三大神器之一既永恆之槍，以必定擊中及擊穿敵人成名。同時亦代表奧丁既地位。
  關於奧丁既知識源源不絕湧緊入黎既時候，除左了解到奧丁既力量係幾咁大既時候，我亦諗倒一D對付佢既方法。
  「你係咪話我一個唔足以對抗奧丁既，咁如果多一個幫手呢?」我開始覺得有打贏神既勝算。




  「你係想利用......應該係可行架。」安潔拉都意會倒我想做咩。
  「世界最大既寶船阿，你足夠載運世界所有既物品，我以弗雷之名將你展開，從塵埃般既大小展開至足夠吞沒現世，現身彰顯我既威名!」一艘船應聲出現，向上空不斷移動而且變大。
  「可憐既弗雷繼承人阿，你將呢個龐然大物召喚出黎都係於事無補架!定係你已經技窮啦?」奧丁帶有取笑我既口氣攻擊巨船，睇黎我既目的應該成功啦。