【奇幻/神話】我好似唔小心成為神: 第八章 新手上路(八)

  「Dickson，得左啦，咁下一步點阿?」安潔拉問。
  「呃......呢個係一個好問題......咁呢，我地呢，係佢地，呃......」我大汗耷細汗。
  「你唔係淨係諗到呢步阿......」安潔拉既表情變到生無可戀，就好似將軍命令你去踩地雷既士兵一樣。
  「新手係咁架啦，你有冇咩好方法阿。」我反問安潔拉。
  睇黎呢個問題都難倒安潔拉，我召喚出黎既天馬同船都已經消失左，短時間都好似唔可以再召喚。係呢個咁危急既時間，我既小宇宙好似爆發左咁。
  「安潔拉，你有冇玩過UNO?」傷勢開始慢慢康復。
  「UNO?果個卡牌遊戲?」安潔拉一臉茫然。
  「如果你用左轉色之後，最後一張數字卡係紅色，你會轉咩色?」我講緊D好似唔關事既野。
  「廢話，當然係紅啦，咁樣下一個回合咪贏囉。」
  「係呢，但係，我會揀黃色!一間你幫我一個忙。」我將計劃講比安潔拉知。




  係我地傾緊計既時侯，奧丁同索爾打得難分難解，但佔上風既係索爾。
  傳說索爾戰力驚人，一生中無能人敵，除左佢既宿敵大蛇耶夢加得—與世界同樣龐大既巨蛇。
  奧丁雖然同樣係戰神，但實力明顯較弱，係正面食左索爾兩錘之後，傷勢已經影響倒戰鬥，速度亦慢左落黎。
  奧丁比連綿不斷既攻勢逼到向後退，但防守時亦不忘進攻，用手上既永恆之槍貫穿左索爾既右腿，但索爾忍痛用雷神之鎚強擊奧丁既胸膛作為還擊。
  「可惜阿，真係可惜阿索爾!如果你傷勢已經痊癒，恐怕吾位就要被搶走啦。」奧丁胸有成竹咁講。
  「德羅普尼爾阿，將吾之矛再次分裂吧!」奧丁又將矛分裂。
  「係時候啦!」我同安潔拉講。
  「兩位愚蠢既神明阿!係你地互相殘殺既時候，似乎忘記左我呢個魔王既存在阿!」我向奧丁大嗌。
  「係今日，我就要成為弒神既英雄!」
  「哼，冇左利劍的弗雷，吾等係冇可能......唔通?」奧丁自信滿滿既表情終於出現轉變。




  「哈!冇錯，你估岩啦!」
  「位於神話三寶具之一既勝利之劍阿，掌握你如同掌握勝利，一如往常，為使用你的人帶來理所當然的勝利吧！我以弗雷之名命令你，現身吧!勝利之劍!」我係講緊既時候，身體出現左金光，附近既風都好似被我所吸引，連大地都出現震動。
  「可恨的弗雷!可恨的勝利之劍!索爾，先將吾等既恩怨放下，等待痊癒先一次清算!」一隻狼出現，將奧丁吞噬，並且消失左。
  「哈哈哈，重握勝利之劍既弗雷，待吾傷康復，吾等會向你挑戰!」索爾都化身為閃電，迅速離開左。
   係兩個神都走左之後，我同安潔拉都鬆左口氣，因為咩勝利之劍，我都係吹出黎既。
  「終於，無事啦!」我吸一口氣，向天大嗌。
  「果然，Dickson你擁有稱王既潛能，希望你同我地『陽之典』合作。」安潔拉仲係提住呢單野。
  「係呢，咁呢D破壞左既地方會點架?」我拉開話題。
  「我地時間之神柯羅諾斯既魔法會將所有野回復到時間停止之前，但死左就唔可以回復，希望你同我......」
  「係呢，你岩岩既魔法係咩黎架?」




  「當我地使用魔法之神既神話之後，就可以做倒呢個事，但都只限於惡作劇既威力，當然比唔上王，希望你可以......」
  「係呢，今日天氣幾好啵。」
  「Dickson，你係咪係度拉開緊話題阿?」安潔拉終於發現。
  「對唔住，呢樣野遲下再講!」時間回復之後，我就即刻走。
  冇錯，呢個就係我既首戰，贏得又光彩，同時又惡劣既首戰。