傷痕累累（一場Kong U殘殺遊戲）: 7. 延伸遊戲
離開據點前，哈比找我談話。
「喂，吳懿，有啲嘢問你……」哈比說：「Allen叫我問你借把匕首。」
Allen？
「係Allen話要？」我嘗試問個明白。
「佢話俾我保管住，以防有人殺入嚟，始終據點唔太安全，Allen受左傷、Alison又唔打得。」哈比解釋。
「咁唔直接問我攞？」我感到奇怪。
「怕尷尬喔，你知佢任務啦。」哈比摸著頭髮：「但係Allen話唔迫你呀，始終你自己都要出去。」
我看著遠方的Allen正躺在沙發上休息，不知如何是好。
「哈比，我哋比較需要把匕首，最多翻嚟嗰陣，我哋順便搵下有冇其他武器？」旁邊的Janet終於開口。
「唔緊要呀，我純粹代問。加油！」哈比舉起大拇指。
就這樣，我和Janet離開據點。
來到空無一人的世界。
我們放慢腳步，生怕有人從暗處突襲。
緊張沉寂的氣氛令我們神經繃緊，還是說點話比較好。
「點睇之後嘅延伸遊戲？」我打開話題。
Janet思考兩秒，然後神情顯得更為認真。
「阿難，頭先唔應該借把匕首出去。應該咁講，唔好俾Allen同Alison有任何機會接觸到把匕首。」Janet向我說：「你知哈比呆頭呆腦，萬一俾佢哋是但一個呃到把匕首，或者就係一條人命。」
我當然知道。
然而……
「當初係Allen搵到把匕首，佢亦好安份咁俾左我，唔通重唔值得信任？」我想起Allen的「信任論」。
「我唔係質疑Allen同Alison，但始終安全至上。保險起見，都唔應該俾佢哋兩個手握匕首。」Janet說。
也對……
以刀殺死自己的女友。
以刀殺死自己的男友。
實在是你死我活的任務……
「就算係哈比專登話要，都唔好俾。」Janet補充道：「佢嘅任務係割走耳朵，同樣係需要用刀。雖然唔係殺人，但都應該防備下。」
也許，哈比是想借走匕首，然後做出可怕的事情……
不，太陰謀論了。
不消半分鐘，我們就來到智華館一樓外的走廊。
然而，門鎖上了。
「點解鎖左？唔係要入去參加遊戲？」Janet問。
「可能係要又由正門入去。」我假設道。
智華館有多個出入口，而正門就在Delifrance對面。
我們再走下一層，來到依舊平靜的大學街，經過東亞銀行和Delifrance，從正門進入智華館。
我警覺原本拍卡就能進入的普通閘口，已換成危險的通電鐵閘，發出「磁磁」聲響。
保安櫃檯裡空無一人，桌子上卻有部奇怪的機器。
我和Janet上前察看，發現是類似平板電腦的物體，屏幕畫面彈出一個手掌圖案，似乎是掌紋辨識系統，而圖案上方寫著一句：
「自願參加者請放上手掌。注意：兩人一隊。」
我和Janet，剛好二人。
Janet和我輪流掃描掌紋，平板電腦立刻發出「嘟嘟」聲響，播出陳上帝的語音：
「請進，然後移到十一號研習室（Study Room），否則散彈槍侍候，哈哈。」又是他的惡笑話。
鐵閘電流關閉，然後緩緩打開。
步上樓梯，我們來到港大溫習勝地的一樓。
我亦同時發現，通往二樓的樓梯被電流鐵閘封住了，大概是想封閉其他出入口，限制遊戲範圍為「智華館一樓」。所以，我和Janet才無法從一樓走廊外直接進入智華館。
憑著腦海記憶，我們來到十一號研習室。
順帶一提，所謂的研習室，其實就是靜音房間，供學生開會之用。這層合計十二個。
四面玻璃，中央是大大的長桌，而長桌上擺放著一個箱子，被電子鎖鎖上，不知用途為何。
我看看手錶，十時二十八分。
差不多開始了。
「重有兩分鐘，重有兩分鐘開始。」陳上帝的廣播。
「阿難，你相唔相信命運？」Janet突然問我。
怎麼突然問這種抽象問題……
「我比較信人定勝天。」我說出心底話：「呢個遊戲，我哋要一齊出到去。」
「希望係咁啦……」Janet說。
「你之前嘅信心呢？唔係話勇敵陳上帝，破解呢個遊戲，然後大家一齊出去？」我鼓勵她。
「你啱，只要大家合作，就唔需要害怕。」
剛才的對話，十足主角之間的對白……
「好啦好啦，十點半，準時開始。」陳上帝說出開場白：「首先，哈哈哈哈哈哈哈哈！！！！！！！我決定改改獎罰制度。頭三名以外，喺輸左嘅隊伍當中，會有隨機三對要俾我處刑殺死。」
「咩話！」我瞪大眼睛。
雖然看不見其他研習室的情景，但相信其他參加者都是嚇了一跳。
「你講大話！唔係話輸左唔會有懲罰？」Janet不忿地說。
「唔係咁講嘅話，你哋會嚟參加咩？」陳上帝在廣播裡說：「有風險，有回報，呢個先係世界嘅原則呀，係你哋正中下懷，以為有免費午餐食。況且，我就係上帝，我中意遊戲點樣，就點樣。而家嘅遊戲，係咪刺激好多呢？」
「可惡……」Janet緊握拳頭。
「我哋已經捲入左遊戲，冇動怒嘅意義。」我安撫道：「反而要諗下點樣進入頭三。」
「遊戲好簡單，就係輕鬆嘅友誼War Game！箱裡面有氣槍、面罩、戰術背心，同埋每組專有嘅『特別物品』。大家陣間務必帶齊。」陳上帝繼續說明：「被射中手腳兩次、被射中身體或者頭部一次、或者用盡槍裡面三十發BB彈，都會計算嗰個人為『出局死亡』，到時你嘅戰術背心就會自動發出紅光，意思係要你即刻瞓低，唔准喐同出聲，直到遊戲完結。當然，請大家保持人道，見到人瞓低就唔好踩佢啦。」
「最後生存嘅組別，就係勝出第一名嘅組別。由於係兩人一組，所以只要其中一個依然未出局，就重有贏出嘅機會！就係咁簡單，大家有冇問題？」
我沒有真正玩過War Game，只能憑感覺行事。
同時，我亦有個疑問：到底那件戰術背心怎樣知道氣槍用盡子彈，或者手腳中槍？
也不理了，反正奇怪的事情夠多。
數十秒後，陳上帝的聲音再次傳來：「至於呢位二號研習室嘅參加者問我，可唔可以近距離肉搏。係可以嘅，不過唔會有任何分數計算，意思係『殺』唔到人。」
「六號研習室嘅問題，係可唔可以執『出局死亡』參加者嘅槍嚟用，答案係可以嘅。只要你自己一開始攞嘅步槍裡面重有子彈，都唔會出局。」
「五號研習室問，射中隊友嘅話點計。射中隊友，即係Friendly-Fire，都係照樣計算，所以自己小心啦，射死隊友好唔抵。」
Janet也決定開口：「喂！陳上帝，如果犯規，例如出左局重繼續行動，咁會點？」
「十一號研習室嘅同學問我，如果出左局後重繼續行動會點。哈哈，如果紅燈亮起三秒後，你重繼續移動或者出聲，你嘅戰術背心就會釋放電流，令你痛到全身麻痺，想喐都喐唔到。當然啦，如果大家乖乖守規矩嘅話，就唔需要驚呢個設定。」
我立刻渾身發抖。
「冇其他問題嗎？咁遊戲會喺五分鐘後正式開始，大家可以商量對策，同埋攞齊裝備。五分鐘後，就必須離開自己嘅研習室，然後所有研習室嘅門就會自動鎖上，唔俾進入。順便提醒大家，大家身上原本有嘅武器要放喺研習室裡面，不准使用。大家have fun！」
陳上帝開懷大笑：「好好培養，殺人嘅感覺。」
「簡直荒謬……」Janet感到不屑。
好好培養，殺人的感覺？
廣播停止，箱子上的電子鎖自動解開。
「居然，真係要有人死，而且……有可能係我哋。」Janet苦惱起來。
「所以，先要咬緊牙關，就好似我相信人定勝天一樣。」我說：「要走落去，就要捱過呢個遊戲，生存落嚟，之後再諗辦法。雖然有犧牲，但一切都係陳上帝嘅錯。」雖然說出振奮人心的話，但內心也是怕得不行。
有誰真的不怕死？
「係。我哋要放膽面對。」她的神情放鬆了點。
隨後Janet打開箱子，拿出兩套物品，包括War Game步槍、黑色面罩和深綠色戰術背心，最後從箱子底部找出兩部對講機。
之前陳上帝沒有提及過對講機這回事，應該就是我們組別的「特別物品」。
「對講機？有咩用？」Janet問我。
「當然有用，其他組別如果冇對講機，就好難分開行。但我哋唔同，即使分開左，都可以知道大家嘅情況同位置，方便合作。」我仔細分析。
「咁我哋分開行，定一齊行？」Janet再問。
「我哋兩個都冇乜經驗，一齊走會比較好。萬一分開左，先用對講機啦。」我說。
「好。」Janet點頭認同。
我感到好奇，其他組別的「特別物品」又是什麼？
接著，我們談論之後的行走路線，以及實際打法。
中學時，我和死黨常到網吧玩射擊遊戲，故此對射擊戰術也有微薄的認知。
既然是最後生存者勝出，那就不用刻意主動出擊，讓其他人打個痛快，兩敗俱傷吧。最好的計劃，應該是找個可以潛伏的暗處，守株待兔，等著自投羅網的敵人。
手上的步槍比想像中輕巧，看來是上等氣槍。我瞄準玻璃，習慣拿槍的動作，Janet呆呆地觀察，擺出奇怪的姿勢。
「唔係咁呀，手要放鬆曲住，瞄準嘅時候要望住準星。」我不自覺地握著Janet的右手，到她臉蛋通紅，我才驚訝地放開，實在慚愧。
不過，她怕羞迴避的樣子，顯得更加可愛。
「唔好意思……」我說。
「吓？冇……冇嘢呀……」Janet逐漸恢復鎮定：「阿難，點解你會識用槍？」
「其實唔識，只係打機同睇電視劇都會留意下個動作。」
「都唔專業……」
「好！五分鐘完啦！請九個組別離開研習室，開始戰鬥。」陳上帝打斷我們，宣布遊戲開始。
九個組別，意味著我和Janet有16個敵人。
18人當中，有六個死亡名額。
我放下匕首，然後開門走出。
智華館裡依然寂靜無人。
然而，各個研習室的位置說遠不遠，說近不近，一不小心把便要碰上敵人。
我和Janet潛步行走，匿藏行縱。
如此看來，智華館裡的沙發、桌子、擺設都可當成障礙物，躲過攻擊。
我頓時覺得，這個室內War Game場地頗為適宜，不但地方寬敞，而且障礙物不會過於蔬落。
忽然，遠處傳來連續槍聲。
「砰砰砰！砰砰砰！砰砰！」
似乎是有人開戰了。
聲音微弱，這些人的位置離我們甚遠，應該不成威脅。
我們的計劃不是找人迎戰，而是搜尋良好的潛伏位置。這些戰事，可免則免。
我向Janet打了個眼色，示意不要理會。
誰知，兩個人影從前方的轉角處驀然現身，直接與我碰面。
這一戰，看來避不了。
我絕不能在此死去……
我絕不能成為遊戲的犧牲者……