[愛情甜故] 因為一次睇到佢打飛機,所以我地變咗做炮友: 118.S303.我與你（上）

「消息好靈通喎～」我笑住咁講
「嗯哼～一直都係～」佢都笑起嚟，講完都覺得唔好意思
「點知㗎？」我問佢
「嗰日Stephen飛去Paris傾生意，跟住佢見到你拉住行李入咗Paris機場，咁佢咪即刻call我同我講話我前妻番嚟香港囉～」佢笑咗一笑
冇錯，打比我嘅呢個人就係我嘅前夫，周樂恆，Alvin Chow
「點呀總裁，打嚟提我聽日記得準時番工呀？」我一下子坐起身
「其一啦～」佢即刻笑咗出嚟
「即係仲有其二啦～」我企起身，行到書枱前坐低，然後打開手提電腦
「咁都比你估到，醒喎～」佢話
「咁你講得有其一，就明顯地會有其二啦係咪？」我無奈咁反問佢，「其二係咩呀？」


「你班同事掛住你啦，話聽日一齊食早餐。」佢話
「好呀～」我一口答應咗
好耐都冇見過班同事啦～好想見番佢地，好期待聽日同佢地食早餐
我行出去打開行李箱，然後拎我喺法國買番嚟嘅手信分開放入四個紙袋
「呢個係Alvin嘅…」我將手信放入紙袋，突然記起仲有盒La Maison du Chocolat朱古力，「差啲就唔記得咗佢。」
呢盒朱古力係佢嘅最愛嚟，佢好中意食㗎
之前同佢結咗婚一齊住嗰段日子入面，有時都會陪佢番佢媽媽到食飯
食完飯之後，佢會一邊睇電視，一邊拎住呢盒朱古力食
雖然我地離咗婚，但始終再見亦是朋友，而且畢竟識咗咁多年，都就嚟識咗佢8、9年啦
佢嘅喜好、興趣、習慣等，我仍然記得


放喺我身旁嘅電話響起，係葉子朗打過嚟…今次我㩒咗接聽…
「喂？咩事呀？」
「你終於聽我電話啦？」葉子朗嘅聲線聽起嚟有少許嘅愉悅
「嗯…咩事呀？」
「我…想約你見個面…可唔可以呀？」佢嘅題問都變得小心翼翼
我諗咗一陣，然後望到行李箱入面嘅手信，我喺Paris都有買嘢比佢
見個面，都唔係唔可以，所以我都係答應佢了…
「可以。」
「咁陣間你得唔得閒呀？」佢問
「我得閒呀。」


「咁我約你2點半喺海傍等啦～」佢即刻比時間地點我
「好呀…」
掛了電話，我將電話放埋一邊，收抬好陣間要比葉子朗嘅手信
收抬好之後我再睇下手機時間，2點15分，宜家出門口就差唔多啦
我離開屋企，前往海傍見葉子朗
…
我嚟到海傍，見到葉子朗坐咗喺長櫈上面，佢望住前方
我走過去，行到佢身旁
「葉子朗。」我輕聲呼喚佢
佢見到我即刻企起身
「你到啦。」佢笑咗一笑
「呢個比你㗎…我喺Paris買㗎，我諗你應該會中意…」我將手上裝住手信嘅紙袋遞比佢
「多謝…」佢點點頭，然後苦笑，「你唔係話去散心咩…」
「嗯…係呀…」我微微點頭
我同佢同時坐低喺長櫈上面，氣氛有少許尷尬


「之前嘅事，對唔住…」佢先開口，打破咗沉默
「哦…唔緊要，都過咗去啦…」我微微笑，然後搖搖頭
「我想同你重新開始…」佢突然間提出咗呢個要求
我愕然咁望住佢
「呃，我知道冇乜可能，但係我真係好中意你…你離開咗我身邊，我就發現我真係唔可以冇咗你…」葉子朗即刻就再講，或者係因為佢見我唔出聲，「我係真心中意你，我知道我傷透你嘅心，但係我冇講大話，我真係真心愛你…」
「原來你都知道你傷透我嘅心㗎…」我望住佢，然後笑咗一笑
佢靜咗落嚟，佢冇出聲
過咗一陣，佢講咗一句
「其實你個心入面仲有我㗎係咪呀？」佢問
我沉默咗，冇講嘢，因為我都唔清楚
「我同你，已經過咗去啦…」我答咗佢一句
嗯…已經過咗去啦…

IG Link: https://www.instagram.com/nd_cotttoncandy/?hl=zh-tw
回應link: https://docs.google.com/forms/d/e/1FAIpQLScB_-FcIiKv9bnDe_pWTFd9B7sEtdiGEnKZoJeq5rjmK9JUZA/viewform?usp=sf_link