「你真係唔可以比多次機會我?」葉子朗終於講出口,佢今次約我出嚟嘅目的
「機會比咗好多,係你每次都唔好好珍惜,錯過咗啦,就叫我比多次機會你…我要比幾多次先夠?」我反問佢,「由當初你同洛天恩分手,叫我比一次機會你,去到你出軌,又叫我比多次機會你,我一次又一次原諒你,你到最後都係Hurt我…」
「對唔住呀…但我…我真係…」「我知,你係真心中意我嘛!我已經聽咗好多好多次啦…」
「你唔信我?」佢問
「唔係唔信,係唔敢信你…你諗下我每次原諒咗你之後,你就會再出軌,咁我又點敢再信你?」我嘅眼眶又開始泛起淚光
「你諗下以前,我地仲好開心㗎!」佢講以前,佢竟然同我講以前
「嗯…」我點頭
「我地可以番番去以前,好似以前咁開心㗎…」佢伸手為我抹去眼淚,但佢並冇縮手,佢嘅手停喺我嘅臉頰上面,「我可以為你而改…」
葉子朗慢慢咁湊近我,愈貼愈近,然後直接就吻上了
我冇避開,或者係因為呢種熟悉又陌生嘅感覺又番嚟啦…我仍然想要拎番呢個感覺一刻


「其實我地真係冇可能㗎啦…」我企起身
「點解啫?點解冇可能呀?」佢反問我,「本來我地都冇可能㗎,但最後都係有可能,都係一齊啫啦!」
「但我地最後都係分開咗。」我望向佢
「我為咗你,可以同洛天恩分手,我對你嘅維護,對你嘅感情…唔通你都可以忘記得一乾二淨?」佢企起身,然後捉住我嘅手腕
「唔係…」我搖搖頭,「我冇忘記你對我嘅維護…冇忘記過你喺所有嘅同學面前,因為我而同洛天恩分手…亦冇忘記你喺摩天輪上面嘅表白…一切都冇忘記…」

「宜家邊個委屈D呀?人地咩都唔知比你打咗一巴呀!你仲要鬧人地?」葉子朗擋喺我身前
「你咁怕佢搶嘛!宜家我同你分手,咁唔驚啦?」

「我唔會再推開你,所以留喺我身邊啦!我曾經以為我可以放低你,忘記你,但4年啦!我根本就冇辦法去忘記你,每一日都會諗起你,都會後悔點解當日唔同你講清楚我中意你。但我宜家諗清楚啦!我知道我中意你,我唔可以冇咗你,我會對你好㗎!一定會好好對你...我差你一個真誠嘅告白,所以宜家就要同你講!」


「突然做咩呀?」我低頭笑咗一笑
「今日嘅表白唔夠誠懇,所以宜家要再表白多次。」葉子朗牽住我雙手

「一切…都冇忘記…」我苦笑起嚟,「仍然記得你同洛天恩講分手嘅嗰一日,你嘅語氣有幾冷漠;你喺摩天輪上面同我表白嘅嗰一日,你嘅語氣有幾誠懇…但係,呢啲都只係我同你嘅過去。」
「唔係㗎,你仲記得,即係你根本就冇放低過我!」葉子朗反駁
「我想放低啦!要拎住呢啲回憶,好攰呀…」我苦笑道
「唔理點都好,我都會等你㗎…」葉子朗微笑起嚟,「點都等,因為值得我去等嘅,只有你一個。」
我冇出聲,只係耷低頭沉思
「好啦~你番去先啦~」佢話
「嗯…」我點點頭,「拜拜…」


我轉身離開,行到有少許遠嘅時候,我停咗落嚟,然後回頭望去葉子朗嗰度
見到佢拎住袋嘢,然後坐番喺嗰張長櫈度,低頭望住嗰袋手信
我心中忽然泛起歉意
「我同你差少少…就可以永遠喺埋一齊…」我細細聲咁講
---我與你 差一些 永遠一起---
我沿路行番屋企,心中仍然有少少歉意
但係我已經決定咗要放低,所以我一定要做到
唔可以再半途而廢啦…我一定要忘記佢
我番到屋企,將買比屋企嘅手信都放好喺餐枱上面
我番咗入房,然後拎起放喺床頭櫃嘅鐵盒,行到去垃圾桶前
我猶疑咗一陣,然後又行番去住邊坐低
「果然呢…冇辦法掉…」我無奈咁苦笑
我嘆咗一口氣,然後打開鐵盒,一本日記,一封信…
望住呢封信,又勾起以前嘅回憶…



IG Link: https://www.instagram.com/nd_cotttoncandy/?hl=zh-tw
回應link: https://docs.google.com/forms/d/e/1FAIpQLScB_-FcIiKv9bnDe_pWTFd9B7sEtdiGEnKZoJeq5rjmK9JUZA/viewform?usp=sf_link