跟住第二日返到去
晞澄:「尋晚最衰都係你
搞到我夜左瞓
我:「姓賴啦你
明明十一點幾就完
我就唔信你平時十點瞓喇
晞澄:「幫完你仲咁串嘴
早知唔理你算
我:「呵呵
搞掂就得嚕


晞澄:「下次食自己啦
我:「唔好咁啦
頭先我都係同你講下笑啫
一定係我唔啱啦,
係我搞到你遲瞓
老老實實有時真係要佢幫手,
我依家唯有忍聲吞氣
晞澄:「咪走數呀
我:「得喇驚死飲唔切咁樣
小息就買俾你


晞澄:「唔該晒喇喎

跟住我小息就落左去地下買
講起上嚟都真係幾辛苦
我地嗰陣嘅班房就係喺5樓,
晞澄條友話小息唔想出去
因為出面好凍,
佢就識嘆啦
我就要由5樓落去地下
再由地下上返去5樓


淨係數層數都數死
鬼叫自己唔爭氣咩
淪落到要靠人,
係咁架喇
點知好死唔死,
小息前嗰堂個老師遲放
搞到小息得返三個字
真係離晒大譜,
夠薑食埋個三個字丫笨
所以佢一放我地,
我就即刻衝落去
點知落到去又要排隊
火都嚟,
一路排隊就一路講粗口,
好彩冇人聽到啫


正當我買完之後,
小食完結嘅鐘聲咁啱喺呢個時候響起
意味著我又要跑返上去
因為下一堂嗰個老師好嚴
遲少少返去佢就罰你,
唔理你乜野原因
本身小弟唔係田徑隊,
速度氣力又唔係特別強
唔使問,
就梗係唔夠時間返上去啦
我上到去嗰陣,
個老師已經嚟咗,
我都知大鑊
唯有扮死狗啦
嗰包維他奶就收埋喺衫袋嗰度


俾佢見到就一定沒收
最後就俾佢罰企罰左成堂,
個老師走左之後,
我就即刻俾包維他奶晞澄
晞澄:「頭先你遲咗返嚟就係落咗去買維他奶?
我:「廢話
唔通包維他奶自己上嚟
晞澄:「我講下笑咋
都唔心急飮
我:「頂你早響啦
企咗成堂好乸攰
晞澄:「唔好意思呀
跟住佢就自己喺度傻笑
我:「笑乜春
晞澄:「坐低啦你唔攰咩


我:「你又啱,
咁你因乜野喺度傻笑先得架
好心寒
一定唔係好野
晞澄:「唔關你事呀
講你都唔知啦
喂,
你坐低抖下先啦
我:「不過包奶已經等到唔熱
你要鬧就鬧老師
唔關我事
我都想即刻俾你
晞澄:「唔係呀我覺得好好飲喎
我:「完全唔暖咁都好飲
晞澄:「係呀


我:「你肯定係凍傻咗
晞澄:「你識啲咩丫
不過循例都要講,
多謝晒
我:「你今日已經講咗喇
唔使成日多謝,
咁快賣口乖有伏
晞澄:「總之就多謝晒啦
我見佢飲到津津有味,
唔似係喺度擦鞋,
佢條友平時都唔係擦鞋嗰種人
串少一句已經算好啦,
似乎係真心覺得好飲
睇嚟佢真係凍到傻咗,
唔暖都覺得好飲.