[真人真事][校園][純愛]《總有一天，會再次遇見》: 第十六章

跟住一月尾就放新年假
期間都冇乜特別
都係喺屋企或者出去拜年,
間唔中咪玩下電腦
同呀邦佢地打機
亦都有同晞澄玩嗰啲msn遊戲
不過好多時都係我輸,
晞澄條友玩旋轉泡泡球好勁
其實問心我就唔覺得好好玩
只不過嗰陣晞澄話不如一齊玩啦


反正成個新年都冇乜野做
咁咪當陪下佢一齊玩囉,
當然,
人類總係犯同樣的錯誤
最尾嗰幾日係咁喺度趕功課
有時自己識做嗰啲就當然就係自己做,
又或者有來源嘅話,
咁就梗係抄人啦
你都傻傻地
真係咁得閒自己做咩


有時唔識做又或者無來源嗰陣都要麻煩晞澄幫手
鬼叫自己唔爭氣,
好彩晞澄都夠義氣
問親永遠都係冇托手踭,
都真係有啲估唔到,
我以為佢條友肯定係喺度扮晒蟹
點知又唔係喎,
跟住落嚟都冇乜特別
不如講下踏入二月份嘅事啦
二月份唔使講,


最重要一定係情人節啦,
你問我有咩感覺
冇呀,
咁多年都未拍過拖,
我點知有咩感覺
年年咪喺度呃朱古力食,
咁當然有啲同學就幾好嘅
成日都會整多幾舊朱古力,
益埋一班同學,
我就係因為咁樣而受惠
老老實實都算唔錯呀
有冇人指定送俾我
印象中就冇
就算有都唔多,
鬼叫我唔出名咩


運動又唔運動,
亦唔係成績好嗰類
更加唔係靚仔
最慘仲要係窮人,
有時就係咁現實
不過好彩自己知自己咩事
所以咁多年都冇特別去強求,
唔會成日喺度叫春
點解冇女仔指定送俾我咁樣,
有得食已經偷笑啦
仲會要求咁多咩.

喺情人節嘅前一日,
小息嗰陣我聽到晞澄同佢啲friend講
話今日放學之後要去買朱古力整


聰明如我,
就梗係即刻問佢整咩啦
睇下可唔可以韜光丫嘛
我:「你今晚整朱古力呀 」
晞澄:「係呀 」
我:「唔通你想送俾情人
識你咁耐都未聽過你呢啲野,
老老實實想送俾邊個 」
晞澄:「講真真係冇喎
係成班話整我先整埋一份 」
我:「實係咁啦 」
晞澄:「唔信就算 」
我:「真係唔信 」
晞澄:「咁你都老老實實,
想收邊個嘅朱古力 」


我:「你都傻嘅,
邊個整得好食咪想食邊個 」
晞澄:「我見成班男仔話想收某個靚女)嗰啲喎 」
我:「我睇佢條友姐手姐腳咁樣
應該唔慌好食 」
晞澄:「哈哈乜關事嘅咩 」
我:「梗係啦,
邊個呀靚女煮野一定好食
我就好功利 」
晞澄:「係咪真係呀,
佢派俾你我唔信你唔食 」
頂晞澄真係幾了解我
晞澄:「冇野講呢 」
我:「我都聽講有唔少人想食你嗰啲朱古力 」
晞澄:「係咪真係呀


講明未必好食 」
我:「又唔係喎,
你條蛋散上次整甜品幾好食
我信你呀 」
晞澄:「你條友賣口乖,
即係想食啫下話 」
我:「你真係愈嚟愈醒目
最好整有花生或者杏仁嘅朱古力 」
晞澄:「未試過整喎,
你條友真係麻鬼煩
咁多要求架 」
我:「我知你識嘅
邊有野難到你係咪先
晞澄姐喎 」
晞澄:「睇下點先啦 」
我咁樣賣口乖法,
希望佢肯整啦,
事關我最鍾意就係食有杏仁嘅朱古力
平時嗰啲唔係唔鍾意食,
不過依家可以要求
就梗係要求啦,
係咪先