[真人真事][校園][純愛]《總有一天，會再次遇見》: 第八十章

其實喺grad din之前一兩日,

都真係有啲期待晞澄佢會點樣著

我好相信一樣野,

每個男仔,

都會有諗緊某個女仔衣著嘅時候



或者其實好平凡

但總之你就會好想快啲見到

我就係喺呢個階段

始終grad din個個女仔一定會著到鬼火咁架啦

貪靚丫嘛



結果去到嗰日,

一早著定件西裝,

去樓下嗰間髮型屋洗頭兼且gel頭

冇計啦平時唔識gel

費事搞到一鑊粥



加上機會咁罕有,

呢種場合都唔知會唔會再有第二次

有啲錢係要俾架啦

之後我地成班幾個毒男一齊出發

六點鐘就去到宴會場地,

入到去就梗係左望右望啦

我就想睇下晞澄嚟咗未

係咁易行咗一轉,



都見唔到佢嘅蹤影

即係未到啦

咁我就喺度同幾個friend吹下水先,

傾下傾下跟住見到一大班人入嚟

我就梗係即刻起身啦,

睇下見唔見到自己個目標

望下望下就見到晞澄啲friend,



咁我知係喇

晞澄實係佢左右,

果然冇估錯,

跟住就見到佢條馬尾

呢個簡直係指標

講真嗰句,

佢條馬尾真係仲易認過個樣

之前都話咯,



我未見過佢唔係馬尾,

乜野場合都係呢一個髮式

估唔到今日都係

著住白色裙,

唔會太暴露

望落去真係幾得體

當然啦佢點著我都話靚架啦



始終我未見過佢咁樣著

所以俾我嘅衝擊比預期更加大

跟住大家見到大家,

佢就行咗過嚟

晞澄:「真係幾型仔喎今日 」

我:「你都好靚 」

晞澄:「多謝喎 」

我:「講真一見到你條馬尾就知係你 」

晞澄:「係咩 」

我:「嗯 」

晞澄:「估唔到你會gel頭

好唔慣你呢個樣呀哈哈 」

我:「唔係講笑我都覺得自己幾型 」

晞澄:「自戀狂 」

我:「又係你頭先話我今日真係幾型 」

晞澄:「你肯定係冇去過街市啦 」

我:「做咩咁講 」

晞澄:「嗰啲師奶見親有人埋嚟都會嗌靚仔

想佢地買野丫嘛 」

我:「今次我係例外 」

晞澄:「係咩 」

我:「呢一set野買咗好多錢

俾面讚下啦 」

晞澄:「得喇得喇好靚仔喇

咁靚仔就影張相啦 」

我:「好 」

跟住成班人就係咁喺度影相,

玩咗一陣跟住就坐低食飯,

當然喺食緊嘅過程,

會播出我地喺呢間學校嘅片段啦

跟住就會請幾個同學,老師上去講野,

有啲都講到流晒馬尿

我就梗係掛住食啦睬佢都傻.

玩咗一輪,

十點幾就散場

跟住我地班有人話意猶未盡,

不如去飲下野啦

當係吹下水都好

始終今日見完之後,

下次再見就係放榜嗰日

到時仲邊有心情開懷咁樣傾計丫

實緊張到死啦

跟住就去咗喇,

去到坐低飲野傾計

話我地第日要keep住見,

唔好斷聯絡斷得咁快

但嗰陣嘅我其實已經知道,

畢咗業大家分道揚鑣,

除咗玩開嗰幾個之外,

其他人個關係點都會有啲疏遠

始終以前一個禮拜五日成日見住

A Level之後,

升學嘅升學,

做野嘅做野,

出外嘅出外,

接觸時間少咗咁多

點會keep得咁好丫

其實我估佢地都知

只係大家唔想揭破呢個事實,

人最鍾意就係聽唔真實嘅說話

傾完一輪大約一兩點就走人,

跟住我就梗係鼠咗去搵晞澄啦

咁夜咪一齊搭小巴返屋企

因為架小巴直情停喺佢屋企樓下,

晞澄:「今日見完之後就到放榜先見嚕 」

我:「到時氣氛一定凝重好多囉 」

晞澄:「其實你有冇驚呀 」

我:「你講成績 」

晞澄:「嗯.」

我:「都係嗰句啦

唔考都考咗,

驚都於事無補 」

晞澄:「咁又係嘅 」

我:「總之我就做梗你同學 」

晞澄:「好有信心喎今次 」

我:「梗係啦 」

晞澄:「咁我等住我地再做同學 」

我:「好 」

跟住我見到晞澄都有睡意,

瞓咗落我膊頭嗰度

佢瞓覺真係好靜

既然佢依家喺我個膊頭度,

我當然唔會亂郁啦

所以都決定閉目養神,

不過當然想做越軌野啦

放心所講嘅越軌野絕對唔係啲變態野

只係我扮瞓覺嗰陣,

我隻手掂住佢隻手啫

因為我都好想試下拖女仔手

之前試過一次幾舒服,

佢隻手好柔軟

平時我點會有咁嘅勇氣

趁佢瞓咗就係最好機會,

一醒返就甩開

咁就神不知鬼不覺

我真係醒

大約九個字到我地就落車,

由中一開始就好期待嘅grad din,

咁就完咗喇.