[真人真事][校園][純愛]《總有一天，會再次遇見》: 第八十一章

其實放榜邊個會唔緊張丫

我同晞澄咁講都係唔想佢亂諗野啫

因為我知佢係比較騰雞嘅人

如果我再講真說話對件事根本冇幫助

所以咪對住佢講唔緊張囉



講真點會丫

嗰陣我自己都會諗,

萬一分數真係比預期低,

入唔到u應該點樣做

最大路都係I大讀high dip啦



又或者係讀嗰種直資院校

asso亦都有諗過

我最希望當然唔會發生呢種事情啦

因為唔想同晞澄分開

老實講以我幾年嘅觀察,



除非真係好嚴重失手,

否則晞澄係入梗u

相對上我就冇佢咁穩陣

你估我真係冇諗過咩

之前都講啦,

其實我都係大男人性格,

有啲咩煩惱都係唔鍾意搵人傾訴

嘆一口氣自己捱過去就算



嗰陣我都係咁樣處理

即使幾徬徨都好,

我都係冇搵人去傾,

唯有勤力啲去祈禱又或者上一炷香俾觀音

如果唔係都唔知點

嗰排呀邦都有同我講,

乜成績都好



如無意外都會繼續讀書

講真我就唔擔心同佢斷聯絡

亦都係唯一一個我會咁放心嘅人,

當然我唔係基啦

而係我同佢大家都有共識,

知道第日分開咗應該要點樣行

事實證明我同佢依家都好好丫

慶幸當初自己冇睇錯



真心朋友其實唔需要多,

一個就已經夠.

放榜嗰日

班入面嘅氣氛好凝重

平時點樣活潑,點樣癲嘅同學,

喺嗰一刻都係好寧靜

其實都好正常嘅



老土啲都要講,

A Level嘅成績,

真係會影響一世

第時條路點樣行,

遇到嘅經歷會點,

A Level佔咗一個好重嘅角色

係咪好關鍵唔敢講,

不過唔會完全冇影響先

唔好話佢地啦,

嗰陣我都好緊張啦

晞澄:「估唔到你都驚 」

我:「咁你都知我驚 」

晞澄:「見你隻手係咁郁就知啦 」

我:「我諗冇一個唔驚啦下話 」

晞澄:「你又講得啱嘅

驚唔夠分 」

其實我好想好似啲偶像電視劇咁講,

我最驚就係同唔到你一間u

大家要分開

不過當然冇咁講啦

呢啲野真係講唔出口

我:「係呀 」

晞澄:「冇事嘅冇事嘅 」

跟住就逐個逐個去拎成績表,

晞澄學號先過我所以就佢拎先

同當年會考一樣,

佢都係冇揭開個分

話等埋我先揭

冇幾耐之後我就拎埋,

大家都數三二一就開

晞澄:「得咗呀 」

我再望我個分

一路搵緊嗰陣個心就一路跳,

因為好快就知命運係點

跟住終於望到自己幾多分,

原來符合要求有餘

咁當然唔高分啦,

神科就冇我份

但係要同晞澄讀埋同一科應該唔係難事

跟住再望一望晞澄仲高過我兩分

佢真係犀利

我:「晞澄姐勁喎 」

晞澄:「你都差唔多啦 」

雖然依家仲未知我同佢會唔會入埋同一間u兼同一科

不過我同佢都決定左,

大家個優先次序會夾定

因為跟住落嚟嗰幾日係可以改次序

咁就得啦

當然我會就佢讀咩啦

事關我真係冇乜所謂,

讀書為興趣,

呢句說話各有觀點啦

我就唔覺得係嘅,

又或者我真正有興趣嘅科冇得讀啦

所以先至咁覺得,

講開又講,

依家信心點都會大過之前

起碼嗰分有保證先

順便講下其他同學啦,

呀邦就會報I大high dip

呀穎個分都幾高應該入到u,

不過聽晞澄講佢未必會同我地讀同一間u,

因為佢有自己嘅科想讀

係咩我就真係唔記得咗喇.