[真人真事][校園][純愛]《總有一天，會再次遇見》: 第八十八章

我記得喺樓下行返嚟屋企嗰陣

成個人癡癡呆呆咁樣

冇晒目標

好彩嗰陣屋企冇人,

如果唔係一見我行返去成面眼淚都唔知會點



我喺度諗,

最衰都係我

如果唔係我提議去英國,

而係日本嘅話,

或者唔會發生呢件事



返到屋企入咗間房,

就拿拿臨拎封信嚟睇下究竟佢寫乜野

一見到啲字就忍唔住喊得更加勁

點解

因為啲字嘅深淺程度同佢平時寫嘅有好大分別,



平時佢手字好深色而且好大隻

因為佢寫得好用力

望落去好清楚,

我可以肯定呢樣野冇人清楚得過我

因為呢幾年我都係抄佢嘅功課

但係依家封信嘅字,

大隻就大隻,

但係完全唔深色



或者佢根本已經冇力去寫

我唔知究竟係佢啲字真係唔清楚,

定其實係我隻眼因為淚水而影響視覺

我已經唔識去分辨

跟住再望封信

我明知自己一定會收唔到掣,

但係另一方面又好想睇佢寫乜野



「變態佬,

你知唔知我第一次係咁樣叫你，

可能你已經唔記得啦，記性咁差，

不過我就點都叻過你啲啲，有啲野仲係好記得，

其實呢一直以嚟有好多野都想同你講，

不過‥‥‥可能係唔知點開口掛，

所以好多野都係收埋收埋，

依家啱喇，大家唔使面對面，



可能咁樣先可以一次過講晒，

我一直想講嘅野，可能好長架，不過唔準唔睇呀，

就當係俾面埋我最後呢一次啦。



其實呢，初頭我對你冇乜好感，你知唔知你條友呀，

日日喺我隔離講埋啲衰野，

我都明白男仔係會講呢啲野，不過你都唔使咁大聲丫。



跟住都算喇，你記唔記得我地第一次喺麵包舖嗰度相遇，你條友幾衰格呀，

我都講埋俾你聽我可以俾返錢你，甚至乎再俾多啲錢去買你個菠蘿油，

你知我幾鍾意食架啦，點知你竟然唔制，唔制都算，

仲要做埋一個好黑人憎嘅樣出嚟，我到依家都仲好記得你嗰陣嘅樣，

跟住我就對你呢條友冇乜好感，同時間覺得你好怪，

因為好少男仔對住我唔會獻殷勤，你係少數冇咁做嘅一個，

平時又唔撩我傾計，久而久之，初頭我同你其實關係唔係好好咋哈哈。

係直至到有一次，

我搵唔到一本書去做閱讀報告，

你竟然察覺到呢樣野，靜靜雞將本書塞咗落我櫃桶嗰度，

唔知點解嗰一刻，對你完全改觀咗，女仔就係咁架啦，

改觀只需要一分鐘就可以。

跟住我同你就開始熟咗喇，

其實最奇怪嘅，係你叫我做晞澄而唔係charlotte，

啲人點樣叫我，我都冇乜所謂，

但好似我同你咁講，如果要我揀嘅話，

我會揀晞澄，偏偏就係得你會叫我做晞澄，

所以第一次聽嗰陣真係好開心架，

我都知我好傻，竟然會因為咁樣而開心，因為真係好耐冇聽過人地叫我做晞澄，

唔通我無啦啦就會同人講叫我做晞澄咩，咁樣仲尷尬啦。



依家講俾你知丫，

我每次整完野俾你食，最開心係聽到你話好食，

我相信每個整野食嘅人都會有同感，

就係俾自己重視嘅人讚自己整得好味，

呢一樣野勝過其他人嘅千言萬語，

你知你條友幾特別架啦，鍾意食杏仁朱古力，

咁啱我之前又冇整過，所以第一次整俾你嗰陣

唔多唔少都有壓力架，

我仲記得嗰日我搵咗我個妹係咁幫我試味，有多一個人試點都好過冇啦，

結果最後聽到你話好食真係如釋重負，

或者係你氹我啦，不過我唔會理咁多啦哈哈，

所以每一次整野俾你食其實都真係幾開心，

其實中間仲有好多事可以講，不過原諒我唔能夠一一盡錄，

因為真係實在太多，

我好想寫晒但真係驚自己頂唔住。



你呀真係好鬼蠢嘅啫，

咁話晒我都係女仔嚟，有啲野點開口喎，

所以我就一路都等你出聲啦，點知你竟然一句都冇講過，

你估我唔知咩，成日趁我瞓覺又或者過馬路嗰陣喺度拖住我隻手，

我唔拆穿你咋。

不過咁啦之前有一年除夕我都真係好多謝你嘅，

嗰年我好凍，之後你竟然捉實我隻手話等我喛啲，

其實真係好緊張，但係又好開心喎，

呢種忽冷忽熱嘅感覺好興奮，

我唔知你嗰陣點諗啦，不過我到今時今日都仲係好懷緬，

嗰日你有啲啲型仔啦，

講真真係啲啲架咋，唔好諗錯隔離。



喺我臨去旅行之前嗰排，

我都感覺到你開始想同我講啲好特別嘅野架喇，

唔好當我真係傻，

我梗係知係乜啦，話俾你知丫，

即使你係亂咁講，我諗我都會接受，

因為真係等咗好耐，

希望我冇估錯啦，

成日見到你噏喺嘴唇邊但係又講唔出口就覺得好搞笑，

當然啦如果我知件事一早係咁嘅話，

我已經一早會同你講我想講嘅野，

不過有邊個會估到件事發展成咁樣。

我知你收到呢封信嗰陣，你可能會一頭霧水，甚至乎好憎我都未定，

或者你會有一個疑問，

點解我嘅身後事都唔叫你出席，

你千祈唔好怪呀穎，因為其實呢個係我嘅意思，

我唔想破壞喺你腦海入面嘅我，

我依家個樣同你腦海入面完全唔同架信我啦，

最簡單就係我依家放晒頭髮落嚟，冇咗條馬尾，

你成日問我點解要紮馬尾，

其實你問返自己就知答案，

係你好耐以前同我講，話覺得我紮馬尾靚啲，

我先至每一次都係紮馬尾唔轉其他髮式，

等你仲成日問我點解，

講起上嚟真係有啲嬲，

明明個原因就係因為你自己，你就成日問我點解，

就當我自私一次啦，

今次問都冇問過你，唔好嬲我好冇?



記住呀，要俾心機一路讀落去，

其實你真係唔係蠢，同埋都見到你會考之後真係努力咗好多，

呢啲野睇得出嘅，

你認真起嚟做野一定唔會差過其他人，

起碼我仲好記得你嗰日好俾心機咁樣幫我扔公仔，

雖然最後公仔就冇淨係得一支筆，

不過我一直都有用呀，

可能就係咁樣，所以ce同埋a level有好成績，

唔好衰俾其他人睇。

仲有，睇完我封信之後唔好做傻事，第時上到u識女仔嗰陣，

記得要收把口呀，唔好好似當初咁樣亂咁講衰野，

唔係個個好似我咁成日包容你同埋大方架哈哈，

有女仔鍾意就大膽啲啦，唔好成日咁怕醜，冇咁多時間俾你識女仔架，

不過咁呀，

應承我一件事咁多，就係唔準唔記得我呀，

我知你會問點解，我會咁答你，

可能一個人就嚟死嗰陣，諗啲野跳脫啲啦，

依家嘅我其實喺度諗，我同你下一世要再見，

如果你唔記得我，咁再見又有咩用？

他日你唔準飲孟婆湯呀，因為飲咗就乜都唔記得，

唉，不過我估你都係俾孟婆講兩句就認低威架喇，

同埋聽講唔飲就唔準投胎，

所以你都係乖乖地服從啦，

至於再見就到時先算啦，

不過我有信心唔會認錯人，

唔知你信唔信因果循環呢?

今世我同你嘅認識就係來自你搶咗我個菠蘿油，

唔知下一世會唔會調返轉呢，

到我搶走你個菠蘿油，

記住係菠蘿油唔係菠蘿包，

提多你一次係菠蘿油唔係菠蘿包，

不厭其煩講多一次，係菠蘿油唔係菠蘿包，

係菠蘿包嗰個就唔係我呀，

你要記住呀，

你知我不嬲都係鍾意提早約你，我知今次係早咗啲，

但都希望你一如之前咁會應約啦，

以後都唔會再要求你應承我，

呢次係最後一次。



其實講咁多野，

我最想就係我寫嘅呢一封信唔使俾你睇，

我可以返嚟香港同你一齊經歷之後嘅野，

你旋轉泡泡球仲未贏過我架，好想俾機會你報仇，

不過應該唔得喇，

記住千祈唔好自責，

今次呢個係命運唔關你事，可能去第二度都一樣會有意外，

同埋你邊有咁大影響力，可以決定到我去邊哈哈，唔好諗錯隔離。

講咗咁耐，

最後一句要同你講嘅野，

就係我真係好好好鍾意你，今次唔係啲啲呀，

希望你會記得喺你中學生涯入面，

出現過一個好鍾意你嘅女仔啦，真係要講拜拜喇.」


和你道謝 和你道別 無法問候 唯有思念

留低再見 如不再遇見 都感激為更好留低了伏線