荒島日記（新手、後宮甜）（不定期更新）: 尋仇.五

一定要造成嚴重嘅傷口，先可以令黑熊轉移目標⋯

我突然想起，褲袋裡嘅物品。

係喇！

我從褲袋掏出把瑞士軍刀，右手握實後狠狠地向黑熊背隻插去。

嚓！



瑞士軍刀插入黑熊嘅背隻，我快速拔下軍刀，向另一處位置用力插去。

嚓！

黑熊停止咗郁動，原本想熊抱嘅雙臂定在空中。

成⋯成功咗？

嗚啊！！！！！



原本停止郁動嘅黑熊突然嚟一個向後揮拳，將我狠狠地拍飛到一邊，撞到棵樹後倒在地上。

「我隻手⋯」
我望向左臂嘅位置，衣服上露出兩條破口，左臂上慢慢流出鮮血。

係啱啱俾黑熊拍打嘅時候，俾佢熊掌上嘅爪爪傷⋯

嗚嗚嗚⋯

我望返過去，黑熊對著我滿是怒火，露出尖牙並且發出磨牙吮血嘅聲音。



我用手踭支撐著，並且雙腳用力咁退後，黑熊見我狼狽嘅樣，慢慢一步步咁靠近。

「哈！！！」
原本係地上嚇到呆咗嘅光頭佬，用另一截粗竹再次棒打黑熊。

棒打數下仍然無反應，光頭佬跨上黑熊背隻，再次用佢絕對擅長嘅纏繞功夫對付隻黑熊，把粗竹塞入黑熊嘴裡。

「東哥⋯」
達叔跑咗過嚟我身邊，見到我手臂上嘅傷口後緊張到唔知點算。

「唔好發呆喇！快啲背起佢！」
四眼妹在一旁敦促著。

達叔背起我後拼命地跑，四眼妹係後面亦跟住跑。


「光頭佬！快啲跑啊！」

光頭佬見達叔同四眼妹帶走我後，鬆開拉扯粗竹嘅雙手，用雙拳不斷捶打黑熊嘅頭頂，打到黑熊有啲暈眩。

光頭佬便趁依個機會離開，然後快速咁跟住我地奔跑，唔到廿秒，光頭佬就已經衝咗上嚟。

見到光頭佬咁快就跟到過嚟，四眼妹感到驚訝。
「估唔到你體魄咁好。」

「哈哈～多謝～」
光頭佬笑著咁摸自己嘅光頭，把危險嘅氣氛忘記曬。

跑著跑著，稀疏男亦加入隊伍，見到光頭佬後開始埋怨。
「大佬興⋯你做咩上⋯你知唔知隻熊唔係我地可以對付㗎？你估你係馬川啊？」



光頭佬望向痛苦萬分嘅我。
「我唔救～佢可能會死～」

「救人⋯你知唔知你啱啱差啲死啊？」
稀疏男繼續鬧。

「嗚啊！！！」

眾人回頭望去，黑熊一直發狠地追住大家，睇嚟佢今日係完全唔打算放過我⋯

「死啦死啦⋯隻黑熊追住我地唔放⋯」
稀疏男嚇到眼淚都就飆出嚟。

「唔好返去⋯會連累到大家⋯」
我忍住手臂上傷口嘅疼痛說到。



「連累大家⋯你顧掂自己先喇！我俾你害死喇！」
稀疏男激動地一邊流淚一邊怪責我。

「大陸仔面色蒼白，再咁落去可能會失血過多⋯有⋯有救喇！我地有救喇！」
四眼妹指住前方不遠處，雙眼好似望到希望般。

我趴係達叔嘅膊頭，望向四眼妹指住嘅方向。

「阿sir！救命啊！阿sir！」
四眼妹拼命大嗌，好讓不遠處嘅人聽到。

四眼妹指住嘅方向，就係獅子狗嘅捕獵隊伍，依個時間，係佢地回程返去飛機殘骸，估唔到途中我地會相遇。

高佬佳見我地奔跑過嚟。


「咦？佢地係咁跑，咩料？」

MK傑在一旁笑到。
「可能係想快過我地返到去，然後收埋啲食物唔俾我地發現，次次都俾我地快返到去，唔容易㗎～」

「我估都係喇！」
MK傑同高佬佳大聲笑到。

獅子狗見我地隊伍拼命咁跑，便知道有事發生，立即吩咐佢地隊伍眾人準備好作戰，係隊伍最後嘅肥豬劉，望了一眼我地嘅方向，立即嚇到衝上隊伍前。

肥豬劉驚慌地指著我地。
「阿sir⋯阿sir⋯隻熊又返嚟喇⋯」

「阿sir救命啊！！！」
四眼妹繼續拼命大嗌。

獅子狗聽完肥豬劉嘅說話後大聲命令。
「大家緊貼埋一齊！！唔好落單！！」

獅子狗嘅捕獵隊伍立即團團咁圍埋一齊，眾人聽到黑熊嘅出現紛紛感到害怕，原本嘲笑咁我地嘅高佬佳同MK傑，亦嚇到講不出說話。

「文健！攞枝長矛俾我！」
文健從背後嘅竹籃取出一枝長矛交到獅子狗手上。

獅子狗握著長矛慢慢走出人堆，達叔憤怒咁望了獅子狗一眼，佢雖然唔想去拜託獅子狗去救我地，但此刻別無其他選擇。

獅子狗見到達叔背後面色蒼白嘅我，佢個樣顯得有些詫異，不過好快又消失。

看到獅子狗走上眾人前面，而且無逃跑個意思，四眼妹便對著達叔講。
「達叔，放低大陸仔先，要幫佢止血包紮個傷口。」

「嗯。」
達叔慢慢地將我放低。

四眼妹扯爛我左臂上嘅衣服，傷口盡顯在眾人面前，肥豬劉同高佬佳看到後便滿頭大汗，女生們看到後瑟瑟發抖⋯



待續