荒島日記（新手、後宮甜）（不定期更新）: 尋仇.六（4月27號更新）

四眼妹好仔細咁望我手臂上嘅傷口。
「好彩傷口唔係好深，我地先簡單咁止血同包紮，等陣番去再交俾藍醫生處理。」

「嗯。」
達叔在一旁點點頭。

「大陸仔，你忍住痛吓。」
說罷，四眼妹從袋裡掏出個藥樽，對著我傷口不斷地灑藥粉。

然後四眼妹扯爛達叔件衫嘅一角，達叔驚訝咁望住四眼妹。


「四眼妹⋯做咩扯爛我件衫。」

四眼妹白了一眼達叔。
「唔通我扯自己件衫啊？」



黑熊小心翼翼咁來回走動，由於我地人數眾多，而且有人已經生起火把，令黑熊唔敢靠近過嚟。

獅子狗其實內心都有些害怕，咁大隻黑熊喎！你估各個都好似戰鬥民族俄羅斯敢去惹佢啊？



「不如我地走喇？」
高佬佳弱弱地問一句。

肥豬劉無奈地說。
「今日唔同隻黑熊了斷，隻黑熊以後只會繼續搵我地麻煩⋯」

獅子狗回頭望了一眼背後嘅眾人，然後佢緊握著長矛，慢慢咁行去黑熊嘅方向。

看著獅子狗嘅背影，高佬佳打氣。


「阿sir⋯加油啊！」

其他人紛紛為獅子狗打氣。
「阿sir，我地支持你！」

肥豬劉擔心地望了一眼後，便雙手合十祈禱獅子狗打贏黑熊，因為肥豬劉知道，如果連獅子狗依種人都鬥唔贏隻黑熊的話，咁在座其他人都只會係黑熊嘅晚餐。

黑熊見獅子狗握著長矛靠近，慢慢企起身怒視著獅子狗。

獅子狗表現的好冷靜，但佢已經開始手心出汗，不斷地吞口水。


嗚啊！！！




黑熊憤怒地衝向獅子狗，獅子狗緊握長矛，準備對黑熊龐大嘅身軀嚟個穿刺。

黑熊愈嚟愈接近獅子狗，張開雙臂準備熊抱獅子狗，獅子狗見機會到，立即把手中嘅長矛狠狠掟向黑熊。

黑熊見長矛飛咁過嚟，立即趴下躲避，長矛划過黑熊嘅肩膀，然後插係其中一棵樹幹上。

獅子狗無奈地回頭向眾人遞手。
「shit⋯文健，再俾多個長矛我。」

文健聽到獅子狗嘅命令後，從背後嘅竹籃裡攞出另一把長矛，再小心翼翼慢慢咁走向獅子狗。

獅子狗見文健動作太慢，內心十萬句粗口想衝口而出。
「快啲啊！！！文健！」

「係⋯⋯」


文健用顫抖的雙腿，慢慢咁靠近獅子狗方向。

無辦法，文健實在太貪生怕死，佢好清楚知道行去獅子狗位置如同靠近黑熊，萬一黑熊無視獅子狗去襲擊佢嘅話，佢連逃跑嘅時間都無。

「你想點啊！！！」
獅子狗對著文健咆哮，文健才加快腳步走過嚟，長矛就快遞上獅子狗手上。

文健突然十分驚恐望住獅子狗嘅背後，就快遞到獅子狗手上嘅長矛亦立即收回。

獅子狗呆了望住文健，文健握著長矛拼命咁向眾人方向逃跑。

「shit⋯」
獅子狗滿頭大汗，快速擰轉身，黑熊已經衝到佢面前並且伸出雙臂，一嘢熊抱把獅子狗壓在地上。

「阿sir！！！」


望住獅子狗俾黑熊撲倒，高佬佳同肥豬劉難以置信地抱頭。

「啊！！救命啊！！」
握著長矛嘅文健驚慌地跑回眾人裡。

肥豬劉握緊文健嘅衣領。
「你個廢柴！仲好意思跑返嚟？係你害死施sir！你如果肯快手啲！施sir就唔會打唔過隻黑熊！」

「你⋯你咁叻！你去俾佢啊！！」
文健把長矛推俾肥豬劉。

高佬佳用手推一推肥豬劉，肥豬劉望向高佬佳指住嘅位置，而文健用力扯開肥豬劉，好快便鬆了手。

被黑熊壓在地上嘅獅子狗拼命揮拳，對著黑熊頸部以上位置拳拳到肉。



黑熊張開滿是利齒嘅血盆大口，衝著獅子狗條頸咬去，獅子狗拼了老命去躲，雙手緊緊掐著黑熊條頸。

「阿sir！加油啊！！」
高佬佳同肥豬劉緊張地望住在黑熊身下反抗嘅獅子狗。

黑熊用力咁壓下，獅子狗鬥唔過黑熊嘅力氣，黑熊嘅嘴巴愈嚟愈接近獅子狗，口水不斷滴係獅子狗臉上。

「矛⋯矛！矛！！」
係黑熊身下嘅獅子狗大嗌。

「矛⋯文健！阿sir叫你啊！」
肥豬劉擰轉頭唔見剛才在身旁嘅文健，佢擰轉頭望，見到文健已經躲在人群最後。

「長矛係你手啊！你去俾佢喇！」
文健指著肥豬劉，肥豬劉低下頭，見到雙手正握著長矛。

肥豬劉抬頭想吐罵文健，但只見文健已經快速跑返去飛機殘骸方向，眨眼間便消失於叢林裡。

文健逃跑嘅功夫果然係世界第一，佢再次係我面前表演出佢驚人跑速。

「文健你個仆⋯阿佳？不如你將長矛交俾阿sir。」
肥豬劉交出長矛，但已不見高佬佳人影，佢環顧四週，只見高佬佳同MK傑躲在眾人嘅另一邊。

「矛！矛！！」
獅子狗著急地喊著。

「阿sir！師兄佢依家攞咁嚟俾你！！」
高佬佳對著獅子狗大嗌。

肥豬劉瞪大雙眼望住高佬佳，高佬佳隔著眾人，對著肥豬劉催促著。
「師兄！仲唔快啲攞俾阿sir！」



待續