荒島日記（新手、後宮甜）（不定期更新）: 郵輪.三

Miss Chan再次嘆了口氣。
「有啲係發生事故嘅時候就無左爹地媽咪⋯有啲就因為最近發生嘅事⋯佢地真係好可憐⋯不過，我身為佢地嘅Miss，我就一定會好好照顧佢地，無親人接走嘅小朋友，夜晚就會同我留係到陪佢地。」


「Miss Chan你留係到陪佢地？係依個教室？」


Miss Chan點一點頭。
「Yes，依個教室其實好大㗎，之前係Cruise ship嘅兒童遊樂場嚟，我地將佢改建成教室同兩間睡房，我就訓係佢地隔離間房，萬一佢地發生乜嘢事我都起碼第一個知道。」




「真係辛苦曬你喇Miss Chan，要照顧咁多個𡃁仔，如果俾我對住咁多𡃁仔，我個頭肯定會爆炸⋯」
辣椒妹只係幻想一下都感到奔潰。


Miss Chan笑著回答。
「一啲都唔辛苦，佢地各個都好聽話，唔會製造麻煩俾我。」


辣椒妹此刻擺出副唔多相信嘅表情。如果辣椒妹將來生小朋友，佢肯定係交俾工人姐姐照顧。




辣椒妹見到我此刻正在望住佢，於是走到我旁邊挨近在我耳邊細聲說到。
「做咩喎～你係唔係覺得啲小朋友好可愛～所以想我幫你生返一個啊？」


「Miss Chan？」


我地幾人一齊抬頭，向著聲音嘅方向望去，見到樓上幾層對面欄杆上探出頭嘅嘉雯，嘉雯確認係Miss Chan之後便立即飛奔落嚟。




「Miss Chan⋯」
嘉雯緊緊攬住Miss Chan，在Miss Chan懷裏低聲哭泣著。


「嘉雯⋯你都無事實在太好喇⋯」
Miss Chan對於嘉雯也活著而感到欣慰。


不過依種溫馨嘅氣氛好快俾人破壞。


獅子狗亦從樓上走落嚟。
「Miss Chan，好耐無見，都仲係好似以前咁靚女，身材都係咁fit。」




「施Sir？原來你都係到，咁耐無見，你把口都係咁甜。」
Miss Chan一邊安慰著在佢懷裏哭泣嘅嘉雯一邊同獅子狗打招呼。


「Miss Chan，如果你需要我地幫手照顧班小朋友可以同我講。」
秋儀雙眼充滿真誠地望住Miss Chan。


係三女裡面，秋儀嘅性格就係最適合湊小朋友，而且從此刻秋儀嘅表現，睇得出秋儀係幾鐘意小朋友。


「多謝你啊何秋儀，班小朋友目前我一個人都照顧得掂嘅，不過⋯」
Miss Chan突然有些難言之隱。




「不過啲咩？唔怕講出嚟，我地幫到嘅話一定會幫。」
係學校個陣Miss Chan經常幫我地，如果Miss Chan有困難，我地一定會盡力幫到底。


秋儀亦誠懇地說到。
「係啊Miss Chan，我地幫到嘅話一定會幫你㗎。」


「不妨講出嚟俾大家聽吓。」
獅子狗也在一旁說到。


Miss Chan見大家都好樂意去幫佢，便說。


「班小朋友真係好乖好聽話，佢地依家開始發育時期，需要更加多營養，但每日飯堂俾佢地嘅三餐似乎唔係幾足夠⋯好多次幾個小朋友半夜餓醒⋯」


「唔可以叫飯堂俾多啲食物嘅咩？」


「我之前都有同佢地反映過，但佢地話無辦法增加小朋友嘅食物，郵輪上實在太多人需要援助，能夠維持小朋友一日三餐供應已經算唔錯。」
Miss Chan講完便再次深深地嘆了口氣，睇嚟小朋友嘅溫飽問題真係幾嚴重。


我望去獅子狗，獅子狗正以掃視著Miss Chen全身，感覺到我在望佢後，便以輕佻的眼神看了我一眼。


一個嬌滴可愛嘅小朋友打開門探出頭尋找著Miss Chan。
「Miss，我地已經識唱喇。」




「Good，我唔同你地傾住喇，我要繼續同班小朋友上堂，下次再傾過，byebye。」
Miss Chan同我地講再見，便同小朋友入返去教室。


我地幾個係二樓閒逛了一陣後，便上去搵四眼妹，順便去揀返一間房。


行到五樓樓梯嘅時候，便聽到樓上傳嚟四眼妹嘅聲音。
「大陸仔！你地啱啱去咗邊啊？我地係咁搵你都搵你唔到。」


「去搵人聚舊姐，咁急搵我有事？」
行到上六樓樓層，便見到有個四五歲左右嘅小妹妹企咗係到，佢雙水汪汪嘅大眼睛一直望住我地，而雙手抱著一隻藍灰色嘅英短貓。


「做咩自己一個係到啊小妹妹？貓貓。」
秋儀上前問到，然後伸手摸著小妹妹抱著嘅英短貓，英短貓好乖巧咁任由秋儀觸摸。


我見秋儀摸的咁開心，於是我亦伸手摸英短貓嘅大圓臉，英短貓好享受咁咪埋雙眼任由我摸，嘴裡發出喵喵嘅叫聲。


「你地幾個唔好掛住玩貓喇，依家快啲跟我過嚟。」
說罷，四眼妹便帶著我同三女走。


四眼妹帶住我地走到605房門前。


「大陸仔，依間係我地幫你搵嘅房，包你一定滿意！」
說罷，四眼妹便打開605房門。


房內有獨立嘅廁所浴室，而梳化同化妝台都齊全，並且有兩張雙人床，可以將雙人床合併，而房間嘅盡頭係個露天陽台。


「點啊？係唔係好滿意啊？依間係露台客房，設備齊全，而且有個大露台睇景色，算係郵輪上嘅頂級客房嚟。」


「唔錯唔錯，你住係隔離604？」


四眼妹指一指隔離嘅房門。
「我住係隔離603，可能04數字唔吉利，所以無604嘅房間。」


「間房幾靚喎。」
三女立即走入房間裡觀看，辣椒妹更直接跳上張床大字型訓低。
「終於有教好訓喇！張床真係好軟熟好舒服啊～」


「咪住⋯弊⋯⋯」
四眼妹見三女已走入房間裡感到驚慌。


「咩嚟㗎？啊！」
房內突然傳嚟辣椒妹嘅叫聲，不久後便聽到雪兒同秋儀在尖叫。


「係蟲啊！！！」
三女被嚇到跑咗出嚟，辣椒妹直接嚇到跳到我身上用雙腿夾住我。


四眼妹無奈地說到。
「我正想同你地講⋯間房由於太內無人入住同打掃⋯已經滋生唔少蚊蟲係裡面⋯我個間都係咁樣⋯」


「全部都係蟲⋯點住啊⋯」
辣椒妹不斷看自己身上所有部位，確定無蟲爬係身上便鬆了口氣。


三女唔係係叢林住咗大半年咩？應該習慣曬啲蛇蟲鼠蟻先啱㗎，點解到依家都仲係咁驚蟲⋯


此刻，個位抱住英短貓嘅小妹妹亦走咗過嚟，並且好好奇咁望向房間裡面。


「小妹妹，你係唔係蕩失路啊？」
秋儀屈膝地問抱貓嘅小妹妹，小妹妹無回答秋儀，而係好怕醜咁避開秋儀嘅目光。


雪兒蹲下身對著小妹妹溫柔地問到。
「有咩係姐姐可以幫到你㗎？」


小妹妹仍然無講嘢，直到附近嘅房間裡走出個老婆婆。
「乖孫，我嘅乖孫。」


「婆婆。」
小妹妹便攬住英短貓走到老婆婆旁邊，係門外依依不捨咁望咗我地一陣後，便跟著老婆婆入房裡。


三女同一時間望住我，而四眼妹好尷尬咁笑著，睇嚟佢地要我一人入去對付昆蟲大軍。


「咁啲蟲就交俾你喇，我地去其他樓層行吓，希望返嚟個陣你已經解決到喇。」
辣椒妹講完，四人便手挽手匆匆離開，留低我一個人在原地。



待續