我同表妹去單車鋪一人租咗一架,然後就由單車鋪(巴士站果邊)向水壩方向踩過去。要上水壩前,會先經條斜坡踩上去:

表妹喘晒氣咁:「太斜啦,踩唔郁呀...」

其實我都踩唔郁...真係幾斜下...

我:「我地推上去啦」

千辛苦苦推到上去,終於見到條壩啦!原黎咁多人黎呢到玩,有同我地一樣踩單車既人、放風箏既有、帶狗散步既都有、連玩航拍既人都帶。我望一望條壩,睇落都好似幾長下。





表妹:「嘩,好多人呀...」

我見到都好興奮下:「gogogo,我地出發啦,先踩去對面再踩返黎」

表妹:「我地鬥快啦!」

我:「你認真?」

表妹:「你要讓我架!」





我:「好好好,出發!」

一路踩,一路乘風而行,好舒服!好爽呀!所有既壓力係呢一刻好似煙消雲散咁,無晒煩惱,特別舒暢開朗,盡情騎行!

踩咗個幾鐘,表妹見攰,所以我地兩個乾脆坐住係石壆上休息,兩人迎住海風互相依偎,好享受呢個幸福快樂既moment。

表妹:「間唔中咁樣,其實真係好開心,你話係唔係呀?」

我:「係呀,咩煩惱都無晒!」,講完我對住個海大聲咁叫「呀~~~~~~~」,叫完心情舒暢咗好多!





表妹:「我又要試下!」,之後表妹學我咁大聲叫!

表妹:「哈哈,真係好爽呀!」

我:「係呢,d唔開心既野好似即刻消失晒咁!」

表妹露出小小憂傷既表情咁講:「如果我地兩個,可以永遠好似而家咁,你話幾好呢」

我:「可以架!」

真係可以嗎?因為Michelle 既出現,其實我內心真係無個底...

我:「黎!我地再踩多陣就返去啦!」

還完單車,行返去大約5點左右。四老話過應該會5點半前黎。





我同表妹返到去,見到Michelle 依然一個坐係咗係到,但都望到佢不斷咁R痕。我望一望Michelle 既手臂同條長腿,有多一點點紅,睇黎應該比蚊咬咗唔少...唔知點解有種心痛既感覺...

Michelle停止咗R,之後笑咗對我地講 :「你地返黎啦,踩得開唔開心呀?」

我:「OK呀」

我對表妹:「你係咪帶咗好多防蚊裝備黎呀?

表妹:「係呀」

我:「拎出黎」,我指一指Michelle 手同腳。

表妹:「無問題呀」





表妹拎咗支無比滴同蚊怕水比我。

我再拎比Michelle :「Michelle ,用無比滴搽下佢先,好有效架。仲有支蚊怕水,噴一噴佢驅蚊啦」

Michelle :「唔該晒~」

過咗一陣,四大長老都黎啦!

細姨一見到Michelle ,好好奇咁同老母講:「哎喲,呢個咁靚既女仔,係咪你講果個明仔既‘朋友’呀,呵呵」

Michelle 微笑對四老點一點頭,然後講:「Auntie 、Uncle你地好,我叫芷澄 ,係阿明既同學,今日打搞晒啦~」

我老母:「打搞d咩呀,我唔知幾開心芷澄係黎呀」

我老豆:「企住唔攰咩?快d坐低先啦」





老母:「衰佬,成日打斷人講野。」

細姨:「係係係,我地先坐低放低d野先」
已有 0 人追稿