我確信這是一個改變命運的一刻。
 
「嘩!咩黎架?唔係真係執到寶呀?」周老闆看著地上的公事包說。
 
其他人也圍著我的身旁。
 
「快啲開黎睇下裡面有咩啦!可能有金都唔定架!」阿亮說。
 
改變命運的時刻到了,我打開公事包,並查看裡面究竟存放了什麼物品….
 




鑽石!
 
數量多得難以用眼去判斷數量的鑽石!原來鑽石發放的光芒是那麼的奪目。
 
「嘩!發達啦今次!」所有人也高呼起來,我的內心也十分激動,因為只要有我手中的鑽石,我確信我的人生從此會變得順利和歡愉起來。
 
我把包內其中最大的一粒鑽石放進褲袋內。
 
「做咩呀?我地唔係分左佢架咩?做咩你自己袋左最大粒既鑽石呀!」大昌說。
 




「咪係囉!你快啲攞返出黎呀!」阿信說。
 
經紀張見狀,走過去他們的身邊說:「其實之前我地應承左威揚,因為個公事包係佢去攞既,所以我地俾佢選一件先,其他既我地再分。」
 
「點解呀?咁唔公平,即係我地響上面就分小啲?」大昌用手指著我說。
 
「我唔理,總之講好左我可以選擇第一件先,之前我地響地洞時傾好左。」我也回應大昌一個兇惡的眼神。
 
這些鑽石是我拿來的,現在他們竟然想坐收漁人之利?
 




只見周老闆走過去大昌和阿信的身邊竊竊私語,像在討論什麼似的。
 
「好啦,大家同事唔好再嘈啦,我諗我地不如出返去搵返船家同阿釗佢地先,之後我地出去再分鑽石啦,好嗎?」周老闆說。
 
說完後,大昌和阿信像很不服氣似的跟著周老闆走進樹林,當然我們其他人也同意周老闆的建議,我們於是往沙灘的方向走去。
 
我感覺到自己就像站在一個懸崖上,只要稍一不慎就會被推下山,如果我現在不把鑽石看緊,說不定他們就會過來搶我的鑽石,或者因為鑽石會把我殺了也說不定。
 
自從那次撞車意外之後,我再也不信他們的任何說話。
 
「其實你不如攞返舊鑽石出黎分左佢啦,你而家咁樣好似唔係咁好,周老闆佢地條氣又好似唔順咁。」在我身後的志文說。
 
「你都覺得佢地條氣唔順?」我說。
 
「係人都睇到啦,你都係攞返出黎大家平分好啲,唔係佢地三個人強搶你都冇辦法,你知佢地份人點架啦!」志交語重心長的跟我說。




 
「好,我都驚!」
 
我們很快便走到沙灘,只見阿釗和船家他們已經釣了數條魚,並燒了起來。
 
「你地咁勁既?去邊到搵個火出黎呀?」阿亮說。
 
「真係好彩,行行下佢響附近執到個火機,仲可以用到,我睇我地都黑唔晒,哈哈!」船家說。
 
我們找個位置坐下,一邊進食,一邊講解我們在地洞內拿日本兵的公事包的事,阿釗他們看到鑽石也興奮得大叫了起來。
 
我從褲袋裡把之前收好的鑽石拿出來。
 
「我諗都係大家一齊分左佢啦,雖然個公事包係我攞,但其實所有人都有功勞,我之前可能財迷心竅,我同大家講聲對唔住!」我說。
 




「唔緊要啦!我地都冇記上心,做兄弟唔好講咁多!」大昌說。
 
錢就如洪水一樣,可以載舟亦能覆舟,只要運用得好,可保生命安全,反之亦然。
 
我們吃飽之後,便從袋裡把鑽石拿了出來,我們把較小的鑽石平均分好,而大的鑽石根本不能平分,所以我們決定大顆的鑽石就一齊去把它賣掉之後再分錢。
 
「喂,反轉個袋睇下仲有冇?可能有鑽石粒都講唔定!」經紀張說。
 
我於是把公事包打開,再把袋口面向地下不停的搖,看看有沒有有細小的鑽石我們還沒有拿出來。
 
「咔察!」只見一張已經發黃的紙張從公事包裡跌了出來。
 
紙上寫的盡是日文,我們所有人也看不明白,除了一個字。
 
「咒!」