親愛的，老師也有喜歡過你: 喂，沒必要叫我老師

講到個「哥」字, 以前係中學大家暗地裡都當大家「兄妹」, 我加k加埋另一個女仔L, 三劍俠, 都係自稱搵食兄妹三人組.
每次一提到要理清關係嘅時候, 大家明知對方冇真心當過對方係兄妹, 但往往唔想用師生關係你形容我哋嘅關係, 所以口口聲聲都當大家兄妹就算

我回過神, 又繼續讀呢封信...

「英國寄俾你個副puzzle應該係我最後一次寄俾你嘅野, 我哋之後都少咗好多聯絡, 所以之後我再去旅行寫好咗嘅明信片,
最後都係冇寄俾你. 因為似乎我哋唔搵對方, 大家一樣都生活得好精彩.」

睇到佢咁講法, 我覺得自己又有少少精神恍惚, 因為又俾佢勾起條筋...
但係佢又講得啱嘅, 其實呢個世界, 冇話冇咗邊個唔得.


始終我都好明白，鍾意、適唔適合、同埋可唔可以喺埋一齊, 係三回事.
既然都明知大家係冇可能、亦知道大家唔適合對方, 大家保持距離, 將最好嘅回憶同時光都封存起來, 未必唔係一個好嘅選擇吖！


我隨手拎起一張明信片, 再翻咗幾翻, 發現全部明信片都寫好晒地址、貼好晒郵票,
啲名信片照咁睇落似係佢去旅行嘅時候買落. 我心諗, 你個白癡仔, 內容寫好晒, 貼晒郵票咁, 做咩唔寄俾我啊.

我放返低手上嘅明信片, 繼續讀封信...

「最近我搬屋執嘢嘅時候搵返呢堆明信片, 我都唔想再留住佢哋喇, 有啲嘢你都應該知道嘅...


信封入面有晒我咁多年來一直想寄俾你, 但係冇寄出嘅明信片, 希望你有時間會睇晒佢.」

咩話？搬咗屋？係喎上次3月尾食飯都講過佢要搬屋喎... 咁佢咪即係冇收到我喺日本寄俾佢嗰封「情信」？
咁係搬咗定未搬？唔係話暑假先搬咩？

「我哋從來都冇成為對方嘅老師或者學生, 其實我哋唔係冇原因地變得咁close㗎.
當初填詞作曲, 通通都係藉口. 或者你會相信緣份, 但其實好多時候, 都係有心人 “裝”無心人.」

頂你個掣吖, 姐係棟我咁話喇下嘛. 不過隔咗咁多年聽返成件事, 都幾浪漫嘅. 好彩當時佢識得退一步,
如果唔係妹妹仔實俾佢冧得掂, 一定會搭沉船. 哈哈哈.



「有時你成日喺度叫我阿sir, 真係好想打爆你個頭, 我知你好多時候都係玩嘢,
我知你冇當過我係你阿Sir. 你啲衰嘢你估我真係唔知咩, 你吉起條尾我都知你想點啦！」

哈哈, 做朋友係咁笑下㗎啦, 做咩啫. 真係咁唔想我提起大家曾經係師生關係呢個事實咩？

「每次見親你, 大家都可以忘記身份咁樣去相處, 其實幾好吖, 雖然知你係玩野, 但都無必要再提起我係 “你老師”,
因為首先, 我從來都冇做過你老師, 而且我從來都冇當過你係我學生, 你知㗎.」

唉, 我哋就係咁, 大家都好清楚對方咩料, 知道冇可能喺埋一齊, 但又唔想對方有其他伴侶喎. 其實我哋都好自私,
我哋兩個都係咁仆街. 或者我哋都唔好再深究我哋嘅關係, 亦唔好深究應該點樣稱呼對方.
或者, 「喂」一聲, 就係令我哋相處得最舒服方式. 可能要「喂」一世, 就係咁, 冇其他.