親愛的，老師也有喜歡過你: 其實你嬲都好可愛

我承認我哋兩個都成日曖曖昩昩咁, 兩個都好仆街. 但佢呢條咁嘅蛋散, 大把兄妹關係, 大把「我其實冇當過你係我學生」嘅對象啦！
所以即使佢一次又一次咁對我講埋呢啲咁嘅說話, 我都會好清醒同冷靜咁同自己講： 冇事嘅，唔好諗多咗啦！

當我讀完呢句咁曖昧嘅說話之後, 我有少少嬲, 又有少少心癢癢. 所以放低左封信, 求其拎起咗一張明信片.

Witty,

啱啱嗰幾日行完尼拉貢戈火山, 你收得到呢張明信片, 即係我行完都未死. 估唔到上到去3千幾米, 我都冇高原反應喎. 非洲真係好正, 幾時同我一齊去玩？等我返嚟, 搬埋屋, 再約再埋L 一齊出嚟食飯啦! 你自己喺北京都小心啲呀, 返嚟再傾.

哥
16/7/2016

係咪傻㗎, 講左幾多十萬次我六月尾就返咗香港...是但啦都慣咗, 佢次次問親啲野, 都冇真係記住我講嗰啲咩...
咪住, 乜佢2016年暑假搬過屋嘅咩？諗真啲又好似係有講過喎…

2016年6月頭我去北京之前佢比咗個地址我, 嗰陣就話收到姐... 我啱啱18年4月尾係日本寄既嗰張明信片，
都係寫咗佢當年比我嘅地址... 但佢非洲玩完之後搬過屋喎, 雖然都仲係住係同一個屋苑... 但個地址理論上係唔同咗囉.
換言之，其實佢唔會收到我寄比佢嘅名信片囉...佢永遠都唔會收到...

西藏嗰張就寄咗去天堂, 日本呢張寄咗去地獄, 或者連個天都叫我唔好講我嘅心聲俾佢知...



當我發現咗呢個事實之後, 我突然之間又覺得好空虛 (都話咗我幾咁衰格架啦!) 我嘆一嘆氣, 再拎返起佢果封水蛇春咁長嘅信, 繼續讀落去...

「有冇人同你講過你發嬲個陣, 其實都幾可愛. 但其實你又幾"小氣器"同"記仇"喎... 三月同你食飯, 都仲要講番2016年年頭黃金果單野.​」

咩小氣啊, 真係嬲囉嗰次...btw 冇睇​「咁樣算唔算師生戀​​」嘅讀者應該唔知"黃金"果單野食咩事,
咁事源係咁果陣係2016年年頭, K同L約好咗食飯, 佢地又去咗九龍度一齊唔知報咗啲咩Course,
總之佢地就一齊去交報名費咁上上, 咁佢地約好咗, 就順便叫埋我一齊食咁, 我果日新界西parttime收6點,
佢兩條友都係住大西北, 大家都係騎牛番工番學, 交完學費咪死番入黎囉, 叫我放工出去旺角搵佢地, 係咪傻_咗...
兩個得閒嘅人要個啱啱收工嘅人出九龍食飯, 咩玩法...



佢地約咗搭半, 去到屯市唔見人, 我等到搭八, 都仲係未見人, 咁我咪whatsapp佢地囉, 冇人應...
心諗, 你地拍拖就咪_約我出來啦. 後來K應機話佢地係 "黃金", 咁傻嘅都知深水埗黃金中心先叫黃金,
我心諗, 頂你地老娘個掣....約搭半, 搭八係深水埗????後尾佢打埋"海岸"兩隻字我仲嬲, 團火一野燒到上頭頂. 
心諗, 仆你地個街, 兩個一早番到屯門, 但因為我地約得晏, 所以兩個自己去黃金海岸hea.
咁K最後就話係巴士行屯門公路番入黎經過黃金海岸喎...佢咁講, 我咁聽啦.

「其實果次你呷晒醋咁, 真係笑死我, 好難睇唔出你做咩囉. 邊個叫你次次約親你都係度話好忙好忙,
又話果啲course通常都係伏, 所以唔一齊報姐. 見你咁鬼衰我先特登覆啲唔覆啲, 我知你一定會燥爆, 哈哈.
但果陣整到你嬲咗成晚, 心知不妙, 都唔知點樣先氹得番你個小氣鬼. 不過我知你嬲我唔落嘅.」

喂喂喂, 咩通常都係伏, 我幾時有講過啊. 我連佢地報course 我都唔知囉...我幾時講過我唔會一齊報?
大前提係如果有人問過我, 我先會比comment囉, 我點會無啦啦咩都唔知, 但跟住又比comment啊腦細.
好聽啲就三人行, 講白啲就三角戀, 呢啲情況入面, 實係好易有人亂講野中傷對方, 我明喎... 但出現上面呢個誤會, 其實只有兩個情況.

一, K自己腦殘, 記錯野, 自己無中生有, 話晒佢都一把年紀, 記錯有咩咁出奇.


二, L小姐為咗同佢獨處, 幫我求其作咗個藉口.

唉, 不過都過咗咁耐, 都係算啦. 可以做到啲咩喎. 不過K先生原來都係童心未泯, 特登搞埋啲小風波出黎整嬲我, 真係嫌命長啊!!!!!

「​咁講好似好衰, 但次次見到你嬲爆爆, 嘟起個嘴望住我我, 成件事都幾治癒. 見到你果個樣, 我次次都好想話你知, 我係特登整嬲你架,
因為我好想見到你果個咁可愛嘅衰樣. 不過你可唔可以唔好再嬲我?」