那年，我為左發達去左做全職義工。: 《 5 靈機一觸 》
呢次真係偷雞唔到蝕渣米，連煙都要幫兩個廢老買埋，為咗宣洩我心頭之恨，我專登叫七仔個姐姐比包爛腳包裝既我。
探訪完佢地兩老仲特登同陳姑娘講「呢個後生仔好幫得手，好好傾，下次叫佢再嚟」
「屌你，仲有下次」望返轉頭，佢地仲一路好走咁既面口對住我揮晒手，果下真係嬲到紅都面晒。
返到屋企攤落床諗真d「唔work喎！我做中間人籌錢，一陣又走個黃伯咁出嚟話要爆我大鑊要掩口費或者好似江伯咁利事都要攞返一半咁我咪仆街」
諗諗下不知不覺間睡意來襲，正常我合埋眼，思想開始雲遊太虛之際...
「吼⋯汪汪汪汪汪⋯汪汪」又係隔離個港女隻芝娃娃，一有人行過佢門口就狂吠。芝娃娃真係好on9，細又細粒過人，聲又大過人。
「屌！好撚嘈呀！吠吠吠！吠極都無人知你吠咩架啦！收聲啦！」等我聽日又向房署投訴佢先，等佢成家屋都無埋。
「咪住，係喎！點解我一早諗唔到？無人識聽貓狗講野架！咁咪唔驚佢地爆我大鑊同要脅我囉！」
於是，我念頭一轉，決定向動物義工呢條路邁進。