在IG上重遇你: 06

第六章

時間過得好快，呢幾日忙到我死，因為就快完sem，科科都要做present，搞到日夜顛倒，差啲死左係學校。

我：「終於忙完啦，我飲紅牛多過飲水」

組員A：「今晚終於可以訓覺，我再唔訓真係會返天國見耶穌」

輝：「我終於可以打籃球，我以為呢世都見唔到籃球。威少，聽日打唔打籃球？」





我：「聽日呀？ 晏晝應該得，返學校打？」

輝：「好呀！我叫埋大家一齊打」

我心諗佢叫大家返黎打，咪姐係U Team練波，到時肯定攰死，不過聽日先算，今晚一定要補眠。跟住我見到Bobo嘅whatsapp
就知道佢應該講聽日食飯嘅事。

Bobo：「記唔記得聽日約左我？」
我：「唔記得，係唔係可以唔去🤣🤣」
Bobo：「你咪唔好黎，我慳番」




我：「😵😵」
Bobo：「😂😂聽日7:00，尖沙咀海港城等，ok？」
我：「ok」

突然間，後面傳黎一把奸笑聲，我肯定係阿輝個衰仔偷睇我。

輝：「笑得咁開心，係唔係約左女女？」

我：「我唔係你，食女王。我約左小同食飯，唔係你諗個啲」





我執埋啲notes入locker，跟住同其他人一齊行去地鐵站，點知撞到我最唔想見嘅人——前度Hazel。佢仲要拖住個著住成身名牌嘅西裝男行緊返學校，雖然想避開佢，但始終比佢見到我。

Hazel：「阿威，好耐冇見。同你介紹，佢叫Hayden，屋企係做鐘錶生意。」

Hayden：「Nice to meet you. 我知你係Hazel嘅前度，叫…叫咩話？」

我：「我冇嘢同你地講，麻煩你借借，唔好阻住我地」

Hazel：「你依家咩態度呀！當初我都唔知點解會同你一齊，我地走，唔好同佢一般見識」

雖然阿輝想衝上前打佢兩把，但比我同其他人阻止住。

輝：「你有冇嘢？條女真係五行欠打，你對佢咁好，佢居然咁話你，睇下佢幾時比人飛」

我：「算啦，依家咪睇得一清二楚。拜金女，見高就拜，見低就踩」





今日嘅心情比佢搞到差晒，返到屋企之後，我就匿埋係間房入面。我都唔明點解我付出咁多，最後要受呢啲痛苦？唔知係咪我老豆feel到我有啲唔開心，佢竟然係食完飯之後同我傾計。

老豆：「今日見你好似遊緊魂，係咪有事發生？」

我：「冇，今日見到前度拖新仔，比佢踩左幾下」

老豆：「既然係咁，下次你要帶條更索嘅女，係佢面前踩返佢。記住如果佢活得比你好，你就要活得比佢更好，咁先可以以牙還牙，以眼還眼，比佢知道你生活得更開心！」

我冇諗過自己老豆會講啲咁嘅說話，不過都因為呢番説話，我先唔洗再頹落去。

我：「老豆，多謝你」

老豆好瀟灑咁轉身離開，我好似冇見過咁型嘅老豆，我有少少迷上佢啊！