在IG上重遇你: 30

第三十章

話咁快就到左星期二，本來我屋企人話要一齊去機場接阿妹，點知有個親戚突然入左院，最後得我去接阿妹。佢本來話佢班機下午四點左右到，跟住佢再同我講班機遲左起飛，搞到我就一條友坐係機場呆等。

足足等左兩個幾鐘，佢班機先到香港，不過要等佢攞埋行李，最後我等到六點幾先見我阿妹。

我：「成三年冇見，你好似一樣冇高過，都係一個矮妹」

琪：「生咁高做咩姐，成枝竹咁！你快啲幫我落行李啦！阿媽話今日你係黎做工人，我可以任意叫你做嘢」





我：「真係慘，阿哥都唔叫聲，就對我呼呼喝喝。點解會有個咁嘅阿妹？」

琪：「你係咪想我叫你聲哥哥先？不過叫完之後，你會發生啲咩事，我就唔敢擔保！」

我：「叫我聲哥哥，我可以承受一切後果」

琪：「費鬼事采你，我要快啲返屋企，食住家飯！」

我：「你可能要失望，今日冇人煮飯，我地要自己買飯盒食」





琪：「唔係掛，第一日就要食飯盒，點解要咁對我？」

阿妹話要去廁所，我唯有企係外面等下，我又無聊睇下IG Story，發現Bobo都係機場，我望下個時間，只係十分鐘前上載，我就試下whatsapp佢。

我：「Bobo，你係咪返左黎香港？」
Bobo：「係呀！咁快就知我返左黎🤔🤔」
我：「咁啱睇到IG Story先知」
Bobo：「仲以為你咁好，過黎機場接我機」
我：「我依家係機場呀😀」
Bobo：「認真咩😂😂」





呢個時候我阿妹已經出左黎，我同佢諗住搭機場快線走。唔知係咪咁有緣，我竟然迎面撞到Bobo同佢班fd。

Bobo：「阿威，你真喺係機場，我以為你講笑㗎！你隔離嗰位係？」

我：「佢係我……」我都未講完，我阿妹已經快我一步答左。

琪：「我係佢係外國嘅女朋友，我叫Jessie」

Bobo：「女…朋…友？」

我：「咪聽佢亂講，佢係我個妹Jessie，係外國讀書，今年返香港過暑假」

Bobo：「我記得啦，以前跟住我地係學校操場玩嘅妹妹」





我：「你仲記得㗎，你真係好記性」

Bobo：「下次我地先再傾，我班fd等得唔耐煩」佢望一望企係隔離等嘅fd，我都唔好意思再煩住佢，就同佢講拜拜。

見完Bobo之後，我發覺阿妹好似靜晒咁，唔係點理我。我都唔知自己做錯啲咩，直到坐地鐵嘅時候，佢突然間講嘢。

琪：「我記得佢係邊個啦！佢係好人姐姐，成日請我食嘢，仲送左好多公主貼紙俾我」

我：「咁耐之前嘅事你仲記得咁清楚，你係真唔係？」

琪：「我緊係記得啦，我同佢講過好多秘密㗎。你幾時約姐姐出黎，下次要帶埋我去！」

我：「好，不過介唔介意講下你有咩秘密同佢講？」

琪：「唔話你知，八卦仔！」