「先生,等陣吖。頭先唔該晒你幫我解圍呀。」

「我係幫自己啫。」德叔其實喺嗰陣已經認得出芸姨㗎啦,只係佢見對方好似唔認得自己咁先至無出聲啫。

不過佢唔出聲就差啲錯過咗對方,好彩芸姨原來都一樣認得佢,仲比佢更加主動添。

「係喇,我想問你係咪阿德呀?」

聽見芸姨咁問,德叔心裏面嘅反應係有啲興奮,但面嗰浸都要扮吓嘢,做到好似要啲時間認返芸姨咁囉。





「哦…你係嗰個,噏到口唇邊,呀係啦家政好叻嗰個…徐珮芸?」

「係呀係呀你仲記得我呀?」

德叔就緊係記得啦,但我點都無諗過,佢由呢刻開始講邂逅芸姨嘅故事,會由我想像中嘅夢幻變成係我嘅一場噩夢!

「……令我開始對佢展開猛烈嘅追求……」

德叔已經講咗三個鐘,佢就連芸姨平時喺船度行路係八字腳咁行又或者耳仔釘咗幾多個耳窿都要講一大餐,我就快頂唔順喇!





「阿叔呀我保你大啦,你可唔可以快啲入正題呀?」

「唔得喎,後生仔畀多少少耐性喇,成日想一步登天,咁唔得㗎。」但問題係我隨時都會死,德叔唔好再玩我啦。

「嗯…不如咁樣喇,我依家都講到有啲肚餓喇,如果你可以去梁順記買佢哋最出名嘅燒鴨畀我食,我或者仲可以考慮吓講快少少嘅。」

德叔真係識食,梁順記燒鴨,出晒名係貴呀,半隻已經七百幾蚊。皆因佢哋舖頭用咗嚟自瑞士日內瓦湖空運過嚟嘅天然走地鴨,每日供應嘅冰鮮鴨唔會超過十隻,限量發售咪會咁貴囉。

「你唔係講笑呀,呢個鐘數仲邊有鴨賣㗎?」





「所以我今次其實係想交託一個任務畀你,你要留心聽我講,唔好令我失望,知道嗎?」

呢次德叔向我透露咗一個關於梁順記但好少人知道嘅秘密。

佢話梁順記雖然對外聲稱每日只係供應十隻燒鴨,但實情係仲有第十一隻鴨畀佢哋一家人每晚食飯加餸,咁唔知德叔係咪想叫我潛入梁順記偷走最後一隻燒鴨呢?

「真係荒謬!我似係啲會做犯法嘢嘅人咩?留心聽我講埋佢喇。」

德叔繼續解釋佢心目中嘅計劃,我亦從佢口中知道咗多一個關於梁順記嘅秘密。

呢個秘密係嚟自梁順記嘅老闆娘㗎。話說老闆娘梁崔氏早年喪夫,表面上努力經營亡夫留畀佢嘅燒臘舖,實際上一直都好渴望得到感情上嘅第二春,於是佢都經常有搵啲做援交嘅囝囝嚟慰解一下自己囉。

所以聽到呢度,我開始有啲驚啦……

「古仔,我要你——去玩弄嗰個老女人嘅感情!」





待續...
已有 0 人追稿