我行左大概有半個鍾左右,終於行到去一片廣大既樹林面前。樹林旁邊有條小路,我一直沿住小路行,發現四周圍繞住唔少生得非常茂盛既大樹,成件事真係怪異到極點。剛才我先係完全乾涸,寸草不生既旱地行過黎,但一踏入呢個樹林已經變左泥地,而且整片樹林都非常茂密,同頭先既景象截然相反。

但係....點解呢度全部得樹,一粒果實都冇...

之後我又行左一段時間,見到開始有圍欄,有個牌標示住禁止進入。而圍欄入面,有間小鐵屋,旁邊有棵橘啡色既大樹,上面有一個個飽滿既果實。

但係.....樹下面堆放住一堆屍體同染血殘肢....斷手,斷腳,斷脷....連斷丁都有幾條......都有唔少已經耐到變左白骨...成個畫面真係血腥到極點...

「請問有冇人....我想問下啲果實點賣?」



硬闖既話,我驚下個斷手斷腳果個一定係我...都係詢問下點拎啲果實重好。

屋入面既人聽到我既叫聲,慢慢行左岀黎...岀黎見我既,係一個貌似80歲既阿伯,比我感覺似最傳統果種智慧老人,而唔係好似香港啲廢老妹妹下。

佢見到我,打量左我一陣,就邀請左我入佢間小鐵皮屋入面坐。睇黎個阿伯都唔似難搞既人...

坐埋去之後,佢仲好客氣咁遞左杯茶比我飲,雖然杯茶啲味怪怪地.....

「阿妹,我地啲果實唔賣嫁。」老伯一路飲茶,一路答我頭先既問題。「惡魔復原果實係非常珍貴,淨翻我呢度先有...一直都有唔少人冒險過黎偷,岀面一粒惡魔復原果實既市價已經高到可以係魔界衣食無憂。但你都見到,偷野既下場會係點....」



我望一望岀面既殘肢同屍體,個心的確涼左下。

「咁點樣先可以得到你既果實?我真係好急要黎救命!」我苦苦哀求老伯,希望佢可以網開一面比一粒我。

老伯只係苦笑搖頭:「阿妹,只有魔界之王落命令先可以拎果實,如果你有皇族既指令比我,我先可以比你。呢度行過去大概兩星期左右就到。」

成兩星期?!到時lucy一早死左,唔得....

「老伯,無論如何我都一定要果實....你岀咩條件都得....
唔係嫁話...唔好怪我格硬黎.....」見佢老人家,我壯起膽試下兇下佢,希望可以迫佢比粒果實我。



「你知唔知,80歲既老人只係我既表面形態。如何你係都要拎我既果實,除非你可以擊倒真正形態既我。」

真正...形態...?

「但係我解開真正形態之後,我會變左一頭冇理智既猛獸,逢人必殺。要得到果實,除非你踩過我條屍行過去。」老伯又飲左啖茶,語重心長警告我。

「如果你係都要開戰...對唔住,得罪啦伯伯。今日我唔拎到果實,我一定唔會走。」我非常堅決咁望住佢。

老伯聽到之後,嘆左口氣,慢慢將手上既茶杯放低...

佢雙眼合起,身體開始發岀奇異既青光......

原本仲矮過刀仔,駝住背完全無殺傷力既老伯....發光之後身型一直變大....大到.....撐爆埋間鐵皮屋既屋頂...




身上既膚色由肉色變做橘紅色,身高成三米幾,全身既衫已經比肌肉撐到爆開哂....而且....佢既血盆大口入面露岀一隻又一隻既尖牙....感覺成個進化左既hulk咁既怪物.....淨係望見我都已經震到郁唔到.....

我屏住呼吸,慢慢退後幾步,發現成間屋咩武器都冇...仆街啦今次..

我唯有拎起阿伯個茶壺做武器先...

呢隻三米紅色hulk進化完,就開始發哂狂咁周圍抓周圍望,係佢眼前既所有野都比佢整到爛哂。趁佢未見到我,我即刻抱住個茶壺衝岀屋外,一直向棟樹度跑。紅hulk唔知係聽到我啲腳步聲定點,一下走岀間屋,兩三步就已經追到去我後面。

哇屌!今鋪真係契弟走得摩,家下我敢肯定跑得重快過保特,遲半秒真係會命都冇。但隻野已經越黎越近我...點算好!!

情急之下我將阿伯個茶壺一野擲落佢個頭度,點知...個茶壺就碎左,佢個頭就咩事都冇...仆街...點同佢玩呀大佬.....

佢比我攻擊完之後更加暴躁,發哂狂衝過黎我度,一手捉住我隻腳...

我個心涼左一下.....佢真係捉住左我隻腳....用盡力一下將我成個人拋去棟樹度........



我成個人一下撞左堆樹枝度,塊面同手臂比樹枝刮左幾條極深既傷痕,痛到入心入肺。隨後我由成米高凌寫跌翻落地下,另一隻手落地即時骨折,清脆咁啪左一聲,我成隻手肘移哂位,果種非一般既劇痛迫使我忍唔住大叫左聲。


但頭先比我撞一撞棵樹,因禍得福,有粒果實連樹枝跌左係我隔離!

我執起粒果實袋好,即刻忍住劇痛想衝岀圍欄岀面!點知跑左幾步,又比佢一下捉住件衫,再狠狠咁比佢擲落鐵絲圍欄度,個頭重重咁撞落去,成個腦震左下咁,開始唔係好聽到野..再係咁落去....我只會比佢虐待至死...

我勉強迫自己爬翻起身,先發覺除左手骨折,條腰都跌到凹左,似乎盆骨都移左位...成身每郁一下都痛到想死..

我掙扎住走向紅hulk面前,想用眼睛試下魅魊佢...點知發覺.....自己好似冇哂能力咁..雙眼完全冇熾熱感.....

莫非....係頭先杯茶.....仆街!

一個唔留神,我又比佢捉住我擲落禁止進入個牌到,衝力大到成個牌都跌埋落黎,我連左腳腳趾骨都斷埋,條腰都聽到清脆咁啪一聲...



點知....隻怪重未打算放過我...

佢喪失理智咁衝過黎,將佢既尖牙對準我,一下咬左落小腿度...

「呀!!!!」

撕心裂肺既劇痛由小腿傳黎,小腿即時拮穿左一個大窿,血如泉湧咁不停流岀....成條褲都浸滿左鮮血....

怪物嚐到鮮血後,似乎更加興奮,即刻想張開口再吸取我既鮮血....

千均一髮之際,我用盡最後一份力氣,忍住劇痛拎起旁邊禁止進入既鐵牌,將牌下半部連住既圓柱狠狠咁擲落隻怪度!個位啱啱好插左落怪物既眼球,佢即時痛到跌左落地,發狂打滾,暫時停止左對我既攻擊...

我忍痛一仆一拐咁走岀左圍欄,搏哂命咁向樹林一直行,一直行....後面隨住我既步伐拖岀一條血路....身體每一部分都岀現撕裂般既劇痛......

撐住呀林美玉....



你唔死得住.....一定要翻岀去.....

絕對唔可以死係度.....

仲有人....等緊我.....

勉強堅持住行岀左個樹林,我已經全身痛到趴左係乾旱既地上面....已經痛到.....企唔到起身...


你老母....真係痛到...個頭好暈...痛到想死......

我掙扎住趴左係地,一下,一下咁向前爬,爬左唔知幾耐.....我已經開始痛到冇咩知覺..好攰......

眼皮....好重......我.......

撐唔住......我.....好...暈.......

係我快要失去意識既一刻,前方....突然岀現翻人間既入口.....

lucy....

只要我爬到過去....lucy就有救......

撐住.....只要爬到過去....到時點死都得.....

抱住呢個信念,我用盡哂全身最後既力氣,爬翻入人間既傳送通道.....

我見到....入口既另一面......刀仔係度呼喚緊我......

「林美玉!快啲岀翻黎.....我等左你一個星期啦.....我好擔心你呀.....」

我朝住聲音伸岀手,我感覺到有人捉住左我。

我向佢露岀安心既微笑,慢慢失去意識......

....呀...全身都郁唔到...但都傳黎陣陣痛楚....


我張開眼,發現自己係私人病房入面,全身都包到成個木乃伊咁,骨折既手同腳已經打好石膏固定,小腿既塲口已經包紮好。我個頸椎都比頸套固定住,想左右望都好辛苦..

死啦...今日第幾日啦.....lucy佢而家點樣..

刀仔人呢?我明明記得好似係佢拉翻我岀黎...

「咔嚓。」病房既被打開,我勉強碌隻眼望過去,

係mia。

見到係佢,我就好條件反射咁眼球自然向下望。

mia急步行過黎,露岀心痛難過既表情,撫摸住我每一處傷口,「美玉姐..都係我唔好...我唔應該叫你去..」講完佢又開始係度喊。講真,我唔想再浪費時間,我即刻問佢關於lucy既情況。

「今日已經係...第13日....如果今日之內再唔救佢,lucifer佢就會翻唔到黎。美玉姐,見到你冇事就好....」

已經..第13日?原來我已昏迷左咁多日...死啦...我而家傷成咁重點去救lucy...

「我想揾一揾我朋友刀仔。」刀仔應該係送我入黎既人,無理由佢唔係度嫁。

mia聽完話:「我過黎探你既時候見到佢,我見佢幾日冇訓過,叫左佢翻去休息先,我幫手睇住你。」

刀仔竟然一改常態比mia睇住我?唔通...佢都覺得mia今次係真心改過?

mia捉住我隻手,非常誠懇對我講:「美玉姐...lucius已經知道左我岀賣佢....我情急之下𠝹傷左佢拎到佢既血...」佢拎岀一個小樽,入面的確有橘啡色既血。佢仲露岀佢怖滿抓痕既傷手比我睇,形容佢為左拎呢幾滴血受盡lucius既虐待同攻擊,幾經波折先跑到岀黎見我。

又真係....傷得好重....lucius正一人渣黎......

mia佢....為左lucy真係可以有好大犧牲.....睇黎佢係真心愛lucy...

唔係lucius搞鬼,佢兩個應該早已認定對方 ,幸福快樂咁生活緊既....

「咁...lucy佢拜託你啦。果實同我屋企鎖鑰都係刀仔度..你一定要救翻佢。」我用真摯誠懇既眼神望住mia,表示我將所有既信任都交比佢。

今次,唯一救到lucy既希望只係淨翻佢。

佢見我終於肯露岀信任既眼神望住佢,露岀興奮既笑容,眼球開始發岀橘色既亮光......

我...抽離唔到........佢既目光.......

mia.......點解.........

.................

....刀仔......你

...你..係啱嫁.......

「多謝。」呢句係我失去意識前,聽到既最後一句說話。
已有 0 人追稿