《純愛》平安夜的天使 (完): 第三十二章

第三十二章

「唔俾你喎～」

「喂⋯咪玩啦⋯喺車度㗎，仲玩⋯」

玩捉伊人玩到上巴士，之後各種搶電話，由於係夜晚嘅關係，所以車上除左司機之外，就係得我哋兩個⋯我諗個司機見到有兩個廿幾歲嘅男女喺車上玩捉伊人，肯定會以一面「黑人問號」樣咁望住我哋⋯

「俾返部電話我啦⋯」



「😛唔俾，唔俾，唔俾⋯」

搶到差唔多落車先俾我⋯

Lavina:「嗱～攞住！」佢一嘢拋部電話過黎，我差點接唔住，就同當年包紙巾嘅情景一樣⋯

我：「啊⋯啊！」好在捉得實，如果唔係聽日要買新機⋯部機係Kelsey送嘅，我好唔想換咗佢，因為咁可以提醒我⋯Kelsey喺我心裏面嘅地位同部手機一樣，無佢不可⋯

Lavina愣咗一下，之後佢開始流眼淚、佢突如其來嘅喊搞到我唔知點反應過黎⋯



「下一站，九龍公園，next stop, Kowloon Park」

「做⋯做咩呀⋯」

「冇⋯冇嘢呀🙂」面上嘅笑容同眼中嘅淚水形成咗強大嘅對比，正當我想上前安慰佢嘅時候，佢卻退後⋯

Lavina:「我⋯我落車先啦，聽⋯聽日見啦🙂」

我：「等⋯」個「等」字未講完，佢就衝咗落車，而我諗起當年Angel嘅離去，我唔想重蹈覆轍！



正當司機想開車嘅時候⋯
「唔該開一開門呀！」我同司機大叔講

司機：「做咩呀？激親女朋友仔呀？」

我：「算⋯算係啦⋯唔該呀！」

司機：「年輕人，下次醒定啲呀～」講完呢句之後，門已經開咗，我馬上跑去追返Lavina，遠來聽見司機臨開車走前同我講咗一句：「做得男人要負責呀！」睇黎佢誤會得有啲離譜⋯不過，搵返Lavina先再算啦⋯

我跑到入一個大兒童樂園，我以前細個放學嘅時候好常喺呢度同啲人一齊玩，不過之後由於去咗補習嘅關係就冇再落黎⋯ 而Lavina就坐隔離一張長板凳到喊⋯佢聽到有人行過黎，佢抬起頭便見到我⋯

Lavina:「點⋯點解你會喺度嘅？」佢柔弱嘅聲線同面上嘅淚痕，將佢由一個活潑開朗公主變成一個楚楚可憐嘅小女孩⋯

我：「喔⋯哈哈⋯我⋯妳未加我ig吖嘛⋯所以咪跑過黎問妳攞囉😅」





「並唔喺所有嘢都可以亡羊補牢就可以當咩事都冇㗎，就如一段已逝去嘅感情一樣，就算復合咗，都唔會變返似以前一樣⋯」