可能呢啲就係學生時代初澀嘅感情...: 第二章

意識...漸漸清醒過黎。擘開雙眼，窗簾透入一絲絲溫暖嘅陽光，仲有啲雀仔既叫聲...原來已經朝頭早喇。我去到廁所諗住刷牙洗面，竟然...見到自己塊臉上面有淚痕...
唔好諗咁多啦，一定唔關個夢事嘅......
著埋校服，紮完馬尾之後，望一望個鐘...七點幾啦，差唔多應該出門口喇。
一出大廈嘅大閘，又見到嗰條友仔靠著欄桿撳電話啦。
「7點15分...小姐~遲咗兩分鐘喎~」
「兩分鐘啫...日日都7點13分，個時間咁奇怪...不如以後以15分作準啦！」
「唔得！我就要呢個時間！」
「...唉...話說仲講？架巴士都走啦，快啲上車啦！」
「係嘅係嘅~」
望住佢跑上巴士嘅背影，忍唔住微微咁抽起咗自己嘅嘴角。




因為緣分，我哋幼稚園同校...中學再次相遇。
因為機遇，佢咁啱搬屋，嚟咗同我一樣嘅屋邨住...仲要係隔離棟樓...
因為信任佢，所以就算唔使特登約定...都可以喺同一個時間一齊返學。
...
但我哋只係好好嘅交心朋友...僅止如此。
我亦都好清楚自己個心係邊個到...一定唔會錯。
...
「黄梓軒啊~你一陣間入到去課室，千其唔好打草驚醒啊下...如果唔係一陣間又要畀人傳緋聞..」
「我唔介意呀。」
「...我介意吖嘛！」




好啦，最終結果唔使諗...入到去當然又係一陣起哄~然後畀人猛咁fing個身，再畀人話虐狗之類咁嘅嘢啦...
再之後就係嘩啦啦巴啦啦上曬啲堂，都唔知Miss阿sir噏咗啲乜就放學啦......
不過今日有件事令我特別期待同開心，
就係...今日終於返去之前間小學探老師同師弟師妹啦~
不過...重點唔係我啱啱講啲人度，而係...我鍾意嗰個人都會返去母校。
「聰明」嘅我早已經約好佢喺馬路口一齊行返去~
雖然已經唔係第一次，
不過而家...真係越諗越緊張同興奮！