可能呢啲就係學生時代初澀嘅感情...: 第三章

行行下，冇幾耐就去到馬路口喇。我特登早到啲，就梗係想早啲見到佢啦~
「劉折盈！」係遠處聽到一把聲，一另轉身就見到佢慢悠悠咁行緊過嚟。
「陳迦俊！！」
「做乜嘢咁激動呀~話說...我哋好似好耐冇見喇喎。」
「係呀...！今日終於又返去探佢哋啦~話說你最近點呀，中學過得還好嗎？」
「都ok啦，下年應該可以入精英班...」
「係係係~好似你啲咁嘅學霸，我高攀唔起㗎啦」
「你都唔差啦~」佢藉著身高差摸左一下我個頭，我向上啤住佢鼓起塊臉...當然~我心入面係點...唔使講都知啦。
就係咁樣單純幾句交頭接耳，都可以令我開心好耐好耐...可能呢啲就係暗戀掛
跟住落嚟就係見返之前某啲嘅同班同學，玩同傾咗一陣間。返去同老師打左招呼，傾咗一下近況，見埋啲D師弟妹之後就準備屋企啦...




走嗰陣時雖然都算係一大班同學一齊，但係咁多人入面...佢都係最耀眼嘅一個。
由六年級到而家...我一直都係咁樣覺得...
呢啲時光真係好難能可貴架...特別係畢咗業都有兩年啦，真係越嚟越少有啦...就算班上面嘅同學，都冇可能再約得哂。
「下次再約啦，拜拜！」「哦...拜拜！」快樂嘅時光總係覺得特別快...差唔多到十字路口，大家都各自返屋企啦。
呢個時候，佢行咗過嚟。
「得閒再約啦，係...中學過得開心啲呀。」
嗰陣時啱啱好黃昏，太陽淡橙色嘅光反射到佢塊臉度。佢嗰兩隻好似腰果嘅眼，微微笑住咁望住我...
呢個畫面...好靚...真係好靚。
「嗯..嗯...拜...」話都仲未講完，佢已經轉咗身要走喇...
但唔知點解...我耳邊隱隱約約咁傳黎一句嘢。




『我會等你架....』
應該...只係幻覺嚟嘅啫。
拜拜啦...我心入邊默默咁對佢講。
....
係依個好唔啱嘅時候，阿軒竟然突然打咗過黎。「喂？咩事呀？」
「今次死啦！我唔記得帶閱讀報告嘅書返屋企呀...你可唔可以借比我呀！求下你啦，一場朋友...」
「...得呀...」「咁..老地方見啦~」
等陣先...
有一股...熟識嘅感覺嘅...？
痴...痴線，快啲上樓攞書先。