是咁的，我嘅職業係幫人瞓覺: 一百零三、唔係要結果

我同恆仔坐喺梳化，兩條麻甩佬唔太知講乜好，搞到我有啲尷尬。

我坐喺度擔天望地，而恆仔就好專心咁只係望住恆媽。

無耐，恆媽咳咗聲，恆仔即刻走埋去幫佢拍心口。

「媽？醒喇？」

「嗯⋯⋯」恆媽微微張開眼，見到恆仔之後，皺一皺眉。





「你⋯⋯係？」

恆仔忍住眼淚行到我旁邊：「可以訂立契約喇。」

「伯母有老人痴呆症⋯⋯」唔怪之得佢話好耐無同媽咪好好講過一句說話。

恆仔點點頭，好理所當然嘅表情，但佢點頭嗰陣，眼淚流咗出嚟。

「即係佢病情未惡化之前你已經同佢溝通唔到，咁就算我依家幫佢瞓覺，結果都唔會改變。」





結果都唔會改變。

「我唔係想要結果。」

恆仔話，只係想要一個，可以再同有啲精神嘅媽咪傾計嘅機會。