是咁的，我嘅職業係幫人瞓覺: 一百四十二、心結
「好彩嘅係我最後無被嗰位客人嘅潛意識溶咗。」
嘉儀抄低我講落嘅重點。
話說佢女仔之家啲字都算寫得肉酸，仲話送本親筆簽名書畀我留念，唔知佢簽名啲字係咪都咁醜樣架呢？
「潛意識雖然有排他性，即係好似你喺街見到陌生人都會有戒心一樣，但只要用嘅方法啱，就可以化敵為友。當佢認為你唔係敵人，就會放返你走。」
最簡單嘅方法，就係幫佢。
幫潛意識聽落好似好抽象，實際上非常具體。正如我啱啱所講，夢之迷宮好貼近內心深處，亦即係人類最常用嚟埋藏悲傷同遺憾嘅地方。
唔會有人希望帶住遺憾嘅痛苦生存落去，所有人嘅潛意識都希望逃避痛苦。
但無奈嘅係有啲心結，單靠自己嘅力量係無辦法移除。
而如果潛意識知道我依個外人可以介入當中，幫佢主人解開心結，佢就自然會放返我出嚟。