是咁的，我嘅職業係幫人瞓覺: 二百零六、背後嘅故事

miki歪歪頭，仲係唔死心想知我女朋友咩樣，我忍唔住出手拉住佢，同佢行埋一二邊，細細聲講：「阿老闆以為我要買花，以為你係我女朋友呀，明未呀？」

「點解嘅點解嘅？」

「我點知點解啫，會錯意無得解架喎。」

miki摸摸下巴，點頭自語：「又係喎可。」之後好似記起啲緊要野咁，即刻舉起佢袋肥姐：「係喎你食咗野未？都未答我。」

我搖搖頭，之後miki就拎咗串生腸出嚟：「咁我請你食半串吖。」





我用手擋住。

「不了不了，你都唔知依啲小食店幾多菌，同奶廁所板無分別。我勸你都係食少啲好。」

「我次次落嚟依邊都會食架喎，無得食少啲架。都無菌，你睇下，我食都無事。」miki好似要令我安心咁一口咬咗啖生腸。

「咁你可以試下其他舖頭架嘛。」

話說其實我同miki仲未互相自我介紹，但唔知點解對話嘅流向好似自然就變成咗朋友之間傾計咁。





「不了不了，我淨係食肥姐就得。」佢食得津津有味，啲甜醬呀芥辣醬呀又紅又黃咁痴咗喺佢嘴角。

「其實依條街附近都多好野食架，唔使淨係食肥姐。」

miki無理我，自得其樂咁食完生腸食墨魚。

到伍就食哂嘅時候，我見佢個嘴愈食愈污糟，終於忍唔住拎咗張紙巾畀佢。

「你食到麥當勞叔叔咁喇。」但幾可愛，我睇到忍唔住陰陰嘴笑。





點都估唔到miki已經係個就嚟廿八歲嘅女仔。

女仔生得矮，個樣又得得意意咁，通常睇落都後生幾歲。

miki如果著返套校服，話唔定入馬會都被人查佢身分證。

「麥當勞叔叔⋯⋯」

miki輕聲自語，唔知佢係咪笑緊，但就好似聽到老朋友嘅聲線一樣，一面懷念。

懷念嘅眼神之中，閃過一絲哀傷。

短短半個瞬間，佢眼中嘅感情就被笑容扭曲到消失得無影無蹤。

「唔該～」miki食埋最後一粒雞腎，接過我嘅紙巾抹嘴。





我都係第一次咁專心去觀察一個人，唔知點解佢嘅一舉手一投足，背後都好似有個故事咁。