是咁的，我嘅職業係幫人瞓覺: 二百二十一、好好生存
亦因為我有自知之明，所以聽到曲金鉉可以捨身救miki嘅時候，雖然覺得佢好傻，但係⋯⋯我羨慕佢。
因為我知道自己絕對做唔嚟，為最愛嘅人犧牲性命到底係咩感覺，我大概依一世都無可能感受得到。
「我知道自己咁講係褻瀆咗金仔嘅心意⋯⋯但係我有時會諗，如果我喺嗰陣死埋就好喇。」
miki見我無回應，就繼續講落去。
「我之前試過失憶，用咗個拎自己條命嚟較飛嘅方法去記返起金仔。仲好記得當記憶返哂嚟嗰一刹那嘅感動，我亦係嗰一刻向死咗佢嘅發誓會好好生存落去。」
我應承過你要好好生存落去，我以為我得，原來我唔得。
生存落去其實係好簡單嘅事，但好好生存，所包含嘅意義就唔淨止係「維持生命」咁簡單。
如果無辦法由心而發咁對自己生存嘅每一日感到滿足，就唔係「好好生存」。
失去一個咁重要嘅人，即使對方希望你好好生存落去，你都知道，無咗佢，無可能再「好好」生存。