[劇毒]自從裝左小熊來電之後……我部電話就無響過……: 4

[1/3/2015 05:17]

當我一打開小熊來電加強版既時侯，佢個介面就彈左三隻紅色英文字： DTA
我再篤一篤個螢幕，果三個英文字就消失左，取而代之既係更多既DTA同一大堆電話號碼。
個Apps停留左喺插尋果一個版面，上面列出左所有被Blocked電話，再附加三個英文字DTA。
我第一步做既係打左Happy既電話上去，果然佢都喺名單上面。
我再試晒身邊所有人既電話上去，當然無一幸免啦，個個都中招。


我即刻破口大罵：「屌！邊個咁大整估啊！」






我嘗試去取消佢地既電話，但係一啲用都無。
於是我試下Del左個Apps，點知我無論解除幾多次個Apps佢都仲存在喺我既電話入面。
「啊！！！究竟個威力加強版有幾勁啊！」面對住一個咁既Apps，我忍唔住又再喺屋入面大叫。
當然啊爸啊媽都係無反應，因為佢地根本就無反應。
我望望電話，原來都五點幾，但係我就連一啲睡意都無。
腦入面不停思考現況，究竟發生咩事啊？
我決定借手機上網，yahoo新聞依然有更新，天文台繼續有定時報天氣。
世界依然在轉，係唯獨我一個消失左。





我訓左上張床到，不停篤篤篤篤篤。
我試晒去唔同既討論區留言，人地打咩我就打咩，就算引用埋其他人既留言，都依然無人理我。
估唔到一晚，只係一晚，因為一個Apps，我就進化左做劇毒撚。
朋友唔理我，女朋友唔理我，屋企人唔理我。
仲有咩人會理我啊？

我就咁訓喺床上面，眼光光等天光直到八點幾果陣，我再上多次高登開左個Post：
[劇毒]自從裝左小熊來電之後……我部電話就無響過……
http://forum6.hkgolden.com/post.aspx?mt=Y&id=5699260&ft=SY&rid=0&page=3




上面寫住：「各巴打，求救啊:~( 
自從裝左小熊來電之後……我部電話就無響過……
係咪我部電話壞左啊？
而且我覺得街上面啲人好似見我唔到咁啊……
我好驚啊……
點解會咁嫁？」

我知我咁做都係多餘，但係我唯一可以做既就係不停去搵方法，去搵一個會理我既人。
正所謂：有頭髮邊個想做幟哥
你估我好想做毒撚咩？現實中無人理我，咪上網搵人理我囉。
我只係個想搵番我既存在感……

我走出廳，坐左喺梳化到，見到原來啊爸已經醒左睇緊新聞。
我無神無氣咁講左句：「早晨……」
但係啊爸無理過我，只係望住cctvb news不停重覆播播播……




「唉……」我嘆左口氣，就決定入番房推下我自己高登開既post。

「come to MK MTR STATION EXIT C at 11:00am」一個叫Major_Tom既人喺我個post留左句。
「哈」我發自心底咁笑左聲，嘴角開始上揚，終於有人理我啊。
有人見到我啊！

Major_Tom，紅Van啊！我決定去會會佢！