[1/3/2015 09:33] 

Major_tom,若然佢見到我既留言,或者我可以借佢一臂之力同外界溝通,又或者佢知道發生緊咩事,總之佢就係我既希望。
我望望手機,雖然衣加十點都未到,但係我真係好心急。
我拿拿聲求其執左件T-SHIRT加條洗水老牛就入廁所沖涼。


「沙……」我開大個花灑,任由熱水流偏我全身。
經歷左一個凌晨,一個恐怖,疑惑,失落既凌晨,我腦入面出現太多既疑問。





點解我打唔到比其他人?
點解Happy,啊爸都聽唔到我講野?
點解我做咁多野都無人理我?
點解好似個個都見我唔到咁?
但係明明琴晚啊媽先叫我去訓,過左陣又無再理我既?
DTA又係咩意思?
個小熊來電係咩Apps將我同成個世界隔離左咁?
我其實係咪死左?

熱水將我一切一切既疑問都沖刷而去,令我感覺到既係實在同安全感。




我係存在既,只係無人見到我咁解姐,唯有Major_Tom幫到我!
我熄左水制,換好衫,著好鞋就走左出村口等紅Van。
好快,就有架紅Van馭緊,我好自然咁伸手,諗住截佢。
「呼~」點知果架接近無人既紅Van以風馳電掣既速度喺我面前經過,完全無停低既意思。

「屌!唔記得左我係劇毒,無人見到我!」我忍唔住要挖苦下自己。

我唯有自己一個喺村口到行番出西鐵站,縱使路上面好似有好多人咁,但係我知道其實成個世界都係得番我,又或者我唔屬於佢地既世界,佢地唔會見到我。
透明真係咁好玩?
我可以同你講唔係,特別係當我行到出市中心,我就明白比人當透明係咩感覺。




「啊!」「啊!」「啊!」
我由市中心行去西鐵站足足叫左唔知幾多次「啊!」
點解?佢地連見都見唔到我,所以就一直向前行,唔會打算避開我。
佢地唔單止一句對唔住都無,仲要繼續向前行。
唉,我真係好想死……


經過無數次既碰撞,我終於去到西鐵站,慣性咁拎起我張八達通拍卡入閘。
「屌!點解道閘唔開既?」我成個人撞左去個閘門搞到我差啲仆低。
我再用多次八達通拍卡,但係一聲「嘟」都無。
「屌啊!!!!點解連八達通機都感應唔到我?」我大大聲咁喺西鐵站到大叫左出嚟。
「正常地」又點會有人聽到我講野啊,我踢左部閘門機幾下,發洩我內心既憤怒。
之後就死死地氣咁擒過道閘門。






比個閘門機玩完一餐,我先上到西鐵。
我求其搵左個位就企就算,廢時一陣有人見唔到我直接坐低。
我拎起個Headphone,random咁點左首歌,係Daft punk既within
https://www.youtube.com/watch?v=Q5l2ChAqRDg



經過一輪坐車轉車,我比起約好既時間遲左幾分鐘先到旺角站。
我C出口個角落到企喺到等Major_Tom……

「喂!!喂!!你喺邊啊?」 點知等左唔夠幾分鐘,我就聽到上閘口果邊條電梯有條女不停大叫。
我走左過去望,見到有個傻婆喺到大吵大鬧,又跳晒舞咁,完全無視身邊既人。


哈,你今日都算唔好彩,遇著我「透明俠」






我走番入閘門到,走左去佢面前大叫:「你個癲婆!等我代替月亮嚟懲罰你啦!」
我擺一擺美少女戰士既招牌動作,再輕輕咁喺佢面前伸一伸腳,心諗你今鋪仲唔仆獲金!
點知個癲婆停低佢既手舞足蹈,望實我問:「你個低能仔做咩野啊?」
「下?」我即刻呆左:「你見到我?」
「我咁問得唔通見你唔到咩?」癲婆見到我咁,忍唔住大笑左出嚟。
搞到我即刻面都紅晒……


癲婆笑左成分鐘先開始正常番,佢拉左我去客戶服務部果邊問:「Er……你係Major tom?」

「我唔係啊……你都係搵Major tom?」

「係,係佢叫我過嚟。」





「你都係發現其他人見你唔到又聽唔到你講野?就連電話打比其他人都長響?」

「係,因為果個Apps……」

我同癲婆異口同聲咁講左個名:「小熊來電加強版!」