[劇毒]自從裝左小熊來電之後……我部電話就無響過……: 6

[1/3/2015 11:14]

「啊~像花雖未紅！」世估唔到幾分鐘之後，我竟然同癲婆企左喺C出口個角落度大唱<李香蘭>。

縱使無一個路人見到我同癲婆喺到做緊既野，但係我咁大個仔都未試過咁尷尬。
雖則衣加我係透明，但係始終我都叫做正常人仲有啲羞恥之心。
我塊面應該紅到同個蘋果無咩分別，但係我再望一望個癲婆，佢竟然豪不動容咁繼續唱。
我開始懷疑佢未裝個小熊來電之前都已經係一個癲婆。

心入面既果種受盡耻辱既感覺，令我忍唔住咁停左口咁問癲婆：「喂啊癲婆，我地仲要唱到幾時啊？」





癲婆即刻停左口答我：「我點知啊，Major Tom又未到，我地唔咁做佢又點會發現我地呢？更何況啊，可能仲有其他人都係咁既狀況呢！」

「但係點解一定要唱歌啊？」

「唉。」癲婆嘆左口氣冷靜咁分析比我聽：「你諗下點解岩岩你會發現我？」

我如實答佢：「嗯……因為你成個癲婆咁又大叫又跳舞，但係其他人又唔理你，所以我咪想整蠱下你囉。」

「無錯，就係我咁大動作都無人理我，衣個就係我地既特徵！加上Major Tom可以聯絡到我地，則係表示佢應該可以見到我地。更何況你既出現證實左我既假設，只有我地衣一類人先可以見到大家。所以我地咁做就可以搵到同我地一樣遭遇既人。」





聽完癲婆既一論解說，我就知道其實我無確切咁分析過自己既處境。

「仲有我唔係癲婆，我叫"Mine""ra"。」

「下？賣華？」

「唉，頂！"Mine""ra"，M，Y，R，A」

「唔識讀啊。」





「算，你叫我啊樺啦。你呢？」

「我叫啊麟，喺Poly到讀緊Engine Year 3。」

「我喺"shitty"讀緊Policy都係Year 3。」

聽到啊樺佢咁諷刺咁講左句"shitty"睇嚟都似係高登絲打。
不過佢既打扮同正常大學生差唔多，一件左淺藍色牛仔褸，入面加件純白低胸T-shirt，再著多條slim cut既黑色休閒褲。
而樣又無咩特別，街上面求其搵到果種，唔會話過份標青，皮膚唔白唔黑咁。

萬華佢見我都無野再好講，就開口再唱，點知地鐵站四面八方都有人走向我地度方向大叫：

「喂！你係咪Major Tom？」
「你係Major Tom？」




「你地邊個係Major Tom？」
「Major Tom？」

最後，計埋我同啊樺在內，總共有九丁友企左喺C出口個角落到。
大家相視而笑，卻又無人打破沉默，大家心入面都存在住同一疑問：邊個係Major Tom？
照道理，我最早到應該我出聲先，不過面對住佢地，我都唔知點出聲好。
衣到足足有九個人，不論MK潮童，援交妹，四眼警察，OL，咩人都有齊。

而打破成個氣氛既係四眼警察，著住一身制服既佢問我地：「你地……邊個係Major Tom？」

但係換來既又係一片寂靜，無人出聲，無人示意。

睇嚟Major Tom仲未出現……

我望望手錶已經11:34，點解 Major Tom未到？





啊樺見大家正想進入番沉默，就同大家提議：「不如我地唱歌，等Major Tom知道我地係佢要搵既人。岩岩我同佢……」啊樺舉起隻拇指指指我「……都係咁樣相認嫁。我地要做啲野等Major Tom注意到我地。」

「你都痴線架。」第一個比反應既就係果個OL，佢「摺」左聲就行左去OK果邊。
有個拎住相機既龍友粒聲都唔出就跟住OL走左去。

「喂！好主意啊！我嚟！我嚟！」MK仔即刻拍曬手掌。

佢無理到我地就開始高歌一曲「K歌之王」，而成個地鐵站就彷如成為左佢既K房。
我地喺佢既帶領下開始跟佢唱，而其中既有個大隻佬擰擰頭就企左去一個遠離我地小小既地方望住我地唱。


「啊！！救命啊！！」點知都我地都仲未唱到尾聲既時侯，有把慘叫既男人聲由月台下面傳上嚟。






發生咩事？


「去救佢，係我地自己友。」啊樺大叫左聲。

比起我地在場每一位，啊樺都更快睇清楚。
地鐵站入面無人聽到或者因為衣下慘叫而作出反應，即係意味住佢係我地既同類。
四眼警察同大隻佬比我地更加快就跑左入閘，我地跟住佢地衝入去。
但係四眼警察同大隻佬都仲未行到去電梯口果陣，有個男人成身染滿血由月台電梯升左上嚟。
大隻佬上前扶佢起身，在旁既四眼警察幫佢一把。
扶傷男喺大隻佬耳邊講左幾句野，大隻佬就急急腳咁拖住佢跑去我地到，仲大叫：「走！快啲走！」


當我地開始意識到咩事既時侯，有班黑衣人由電梯口隨隨升上……