[劇毒]自從裝左小熊來電之後……我部電話就無響過……: 7

[1/3/2015 11:47] 

大隻佬扶住成身血既負傷男，對我地大大聲咁咆哮：「走啊！」

但係我地剩低幾條友仲on居居咁企喺道閘門前面等佢地跑過嚟，而本來入左OK既港女OL同龍友即刻走番出嚟睇下發生咩事。
當大隻佬同四眼警察合力咁幫負傷男走過道閘門果陣，龍友好仆街咁走過嚟影住佢地三個如斯狼狽既樣。
大隻佬額頭上面開始露出一條條青筋，對我地大叫：「望咩啊！一係過嚟幫手一係走啊！仲影！」
龍友比大隻佬嚇到死下死下，即刻收埋部相機，走過去幫佢地一把。
而我地六條友一路望住佢地三個，一路向住C出口斯斯然然咁行。
直到援交妹指住電梯口果邊，我地先知死……




有四個帶住電單車頭盔既西裝友由電梯跑上嚟，更重要既係佢地手上拎住把染血既武士刀。
佢地好順利咁一跳就跳過道鐵閘向我地沖過嚟。

「跑啊！」MK仔比我地任何人都更快沖上去，佢喺人群之間穿嚟穿去，而我地就跟住佢既路線行。
但係本來領先我地既大隻佬同四眼警察因為要顧住負傷男，已經變到跑到好後。

「砰！」四眼警察拎起把警槍求其向其中一個西裝友射左槍，又好彩地打穿左個頭盔。
不過衣一槍完全無減慢到佢地既速度。

「FUCK！」大隻佬咩起負傷男開始向前衝，而四眼警察都唔理三七廿一繼續向前行。





好彩既係有班路人喺到阻一阻，果啲西裝佬先追唔到我地。
如是者，我地跟住MK仔跑，終於跑出地面，對正朗豪坊H&M既門口。
一出到地面，啊樺指一指砵蘭街既方向，就帶住我地喺人群間穿插。
當我地跑到去近翠華既時候，班西裝友既身影已經喺街尾出現。
我地無視佢地一路向前跑，再經Collect point既門口穿過雅蘭中心走番出彌敦道。
西裝友既身影開始消失，而我地咩都唔理繼續跑，喺啊樺既帶領下沿住彌敦道跑，穿過六福珠寶同創興中間果條行人隧道，走到去行人專區果邊。


「呼！入去！」啊樺指一指間商務，就帶左我地入去。





「下~下~下~」我地上左二樓，搵左個無人睇書既角落頭坐晒喺地下，不停咁喘氣，特別係大隻佬，佢足足咩住負傷男足足跑左幾條街。
雖然個個面都紅晒，仲要係咁喘氣，但係每個人既目光都集中到負傷男身上。
負傷男面青口唇白，睇嚟都流左唔小血。

「等我幫佢止左血先啦。」衣個時侯，一個運動姐姐級喺我地十個之中走出嚟，由佢個背囊到拎左個急救包出嚟，幫負傷男止血。

好彩既係深口唔會話太深，都仲算止到血，但係負傷男都無神無氣咁。
運動姐姐喺佢個背囊再拎多支水同一粒得力素比負傷男食。

負傷男佢食左粒糖，飲左啖水話：「我……就係Major Tom……」